ನವದೆಹಲಿ: ಭಾರತೀಯ ಮಹಿಳಾ ಟೆನಿಸ್ ರಂಗದಲ್ಲಿ ತಮ್ಮದೇ ಆದ ರೂಪ-ಲಾವಣ್ಯ ಹಾಗೂ ಆಟದಿಂದ ಖ್ಯಾತರಾಗಿರುವ ಸಾನಿಯಾ ಮಿರ್ಜಾ ಇತ್ತೀಚೆಗೆ ತಾವು ಗೆದ್ದ ‘ಹೃದಯ’ವನ್ನು ತೆಲಂಗಾಣ ಮುಖ್ಯಮಂತ್ರಿ ಪರಿಹಾರ ನಿಧಿಗೆ ಅರ್ಪಿಸಿದ್ದಾರೆ!
ಸಾನಿಯಾ ಗೆದ್ದ ಹೃದಯ ಯಾವುದು? ಅವರು ದಾನ ಮಾಡಿದ್ದು ಏನು ಎಂಬ ಪ್ರಶ್ನೆಗೆ ಇಲ್ಲಿದೆ ಉತ್ತರ. ಅಂತಾರಾಷ್ಟ್ರೀಯ ಟೆನಿಸ್ ಮಹಾಒಕ್ಕೂಟ (ಐಟಿಎಫ್) ಫೆಡ್ ಕಪ್ ಟೆನಿಸ್ ಟೂರ್ನಿಯಲ್ಲಿ ತಾವು ಪ್ರತಿನಿಧಿಸುವ ರಾಷ್ಟ್ರದ ಪರ ಮೈದಾನದಲ್ಲಿ ದಿಟ್ಟ ಹೋರಾಟ ಸಂಘಟಿಸಿ, ಗೆಲುವಿನ ಬದ್ಧತೆ ಪ್ರದರ್ಶಿಸುವ ಆಟಗಾರ್ತಿಯರಿಗೆ ದ ಫೆಡ್ ಕಪ್ ಹಾರ್ಟ್ ಅವಾರ್ಡ್ ಅನ್ನು ನೀಡುತ್ತದೆ. 2 ಸಾವಿರ ಡಾಲರ್ (1.51 ಲಕ್ಷ ರೂ.) ಬಹುಮಾನ ಮೊತ್ತ ಹೊಂದಿರುವ ಈ ಪ್ರಶಸ್ತಿಗಾಗಿ ಮೇ 1ರಿಂದ ಒಂದು ವಾರ ಐಟಿಎಫ್ ಆನ್ಲೈನ್ನಲ್ಲಿ ವೋಟಿಂಗ್ ಏರ್ಪಡಿಸಿತ್ತು.
ಇದನ್ನೂ ಓದಿ: ಶೀಘ್ರದಲ್ಲಿ ತಾಪ್ಸೀ ಪನ್ನು ಕಲ್ಯಾಣ! ಮದುವೆ ಗಂಡು ಯಾರು?
ಈ ಬಾರಿ ಏಷ್ಯಾ/ಓಷೇನಿಯಾ ಪ್ರದೇಶದಿಂದ ಆರು ಬಾರಿಯ ಗ್ರಾಂಡ್ಸ್ಲಾಂ ಪ್ರಶಸ್ತಿ ವಿಜೇತೆ ಭಾರತದ ಸಾನಿಯಾ ಮಿರ್ಜಾ ಮತ್ತು ಇಂಡೋನೇಷ್ಯಾದ 16 ವರ್ಷದ ಪ್ರಿಸ್ಕಾ ಮ್ಯಾಡೆಲಿನ್ ನುಗ್ರೊಹೋ ಹೆಸರುಗಳು ನಾಮಕರಣಗೊಂಡಿದ್ದವು.
2018ರ ಅಕ್ಟೋಬರ್ನಲ್ಲಿ ಪುತ್ರ ಇಜಾನ್ಗೆ ಜನ್ಮ ನೀಡಿದ್ದರು. ಆನಂತರದಲ್ಲಿ ಟೆನಿಸ್ ರಂಗದಿಂದ ದೂರವುಳಿದಿದ್ದರು. ಒಟ್ಟು ನಾಲ್ಕು ವರ್ಷಗಳ ಬಳಿಕ ಫೆಡ್ ಕಪ್ ಟೂರ್ನಿಯಲ್ಲಿ ಭಾರತದ ಜರ್ಸಿ ತೊಟ್ಟಿದ್ದ ಅವರು, ತಂಡವನ್ನು ವರ್ಲ್ಡ್ ಪ್ಲೇಆಫ್ ಹಂತಕ್ಕೆ ತಲುಪಿಸುವಲ್ಲಿ ಯಶಸ್ವಿಯಾಗಿದ್ದರು. ಇದಕ್ಕೂ ಮುನ್ನ 2020ರ ಜನವರಿಯಲ್ಲಿ ಮತ್ತೆ ರಾಕೆಟ್ ಹಿಡಿದಿದ್ದ ಅವರು ಹೋಬರ್ಟ್ ಇಂಟರ್ನ್ಯಾಷನಲ್ ಟೂರ್ನಿಯಲ್ಲಿ ನಾಡಿಯಾ ಕಿಚೆನೋಕ್ ಜತೆಗೂಡಿ ಪ್ರಶಸ್ತಿ ಗೆದ್ದುಕೊಂಡಿದ್ದರು. ಈ ಎಲ್ಲ ಕಾರಣಗಳಿಂದಾಗಿ ಸಾನಿಯಾ ಈ ಬಾರಿ ನಾಮಕರಣಗೊಂಡಿದ್ದರು.
ಇದನ್ನೂ ಓದಿ: ತಿರುಪತಿ ದೇವಾಲಯಕ್ಕೆ 400 ಕೋಟಿ ರೂ. ನಷ್ಟ!
ಮೂರು ಪ್ರದೇಶಗಳ ಗ್ರೂಪ್ 1 ನಾಮನಿರ್ದೇಶಿತ ಸ್ಪರ್ಧಿಗಳ ಪರವಾಗಿ ಒಟ್ಟು 16,985 ಮತಗಳು ಆನ್ಲೈನ್ನಲ್ಲಿ ಚಲಾಯಿಸಲ್ಪಟ್ಟಿದ್ದವು. ಅವುಗಳ ಪೈಕಿ ಸಾನಿಯಾ ಮಿರ್ಜಾ ಪರ 10 ಸಾವಿರ ಮತಗಳು ಚಲಾವಣೆಗೊಂಡಿದ್ದವು!
ಚಲಾವಣೆಗೊಂಡ ಒಟ್ಟಾರೆ ಮತಗಳ ಶೇ.60 ಮತಗಳನ್ನು ಗಳಿಸಿದ ಮೂಗುತಿ ಸುಂದರೆ ಫೆಡ್ ಕಪ್ ಹಾರ್ಟ್ ಅವಾರ್ಡ್ ಗೆದ್ದುಕೊಂಡು 1,51,858 ರೂ.ವನ್ನು ತಮ್ಮದಾಗಿಸಿಕೊಂಡಿದ್ದರು. ತನ್ಮೂಲಕ ಅವರು ಭಾರತ ಅಷ್ಟೇ ಅಲ್ಲ, ಇತರ ರಾಷ್ಟ್ರಗಳಲ್ಲೂ ಇರುವ ತಮ್ಮ ಜನಪ್ರಿಯತೆಯನ್ನು ಅವರು ಜಗಜ್ಜಾಹೀರುಗೊಳಿಸಿದ್ದರು. ಹಾಗೂ ಈ ಪ್ರಶಸ್ತಿ ಗೆದ್ದ ಭಾರತದ ಮೊದಲ ಆಟಗಾರ್ತಿ ಎಂಬ ಹೆಗ್ಗಳಿಕೆಯನ್ನೂ ಗಳಿಸಿಕೊಂಡರು.
ಇದನ್ನೂ ಓದಿ: ಗಳಿಸಿದ್ದನ್ನೆಲ್ಲ ವ್ಯಯಿಸಿ, ಊರು ತಲುಪಿದರೂ ಮನೆಗೆ ಸೇರಿಸಲಿಲ್ಲ ಪತ್ನಿ..!
ಕೋವಿಡ್ 19 ಲಾಕ್ಡೌನ್ನ ಸಂಕಷ್ಟದ ಪರಿಸ್ಥಿತಿಯಲ್ಲಿ ಭಾರಿ ತೊಂದರೆಗೆ ಒಳಗಾದವರಿಗೆ ನೆರವಾಗಲೆಂದು ಈ ಮೊತ್ತವನ್ನು ಅವರು ತೆಲಂಗಾಣ ಮುಖ್ಯಮಂತ್ರಿ ಪರಿಹಾರ ನಿಧಿಗೆ ಅರ್ಪಿಸಿದ್ದಾರೆ.
ಯುರೋಪ್/ಆಫ್ರಿಕಾ ಪ್ರದೇಶದಿಂದ ಅನ್ನೆಟ್ ಕೋಂಟಾವಿಟ್ (ಎಸ್ಟೋನಿಯಾ) ಮತ್ತು ಅಮೆರಿಕಾಸ್ ಪ್ರದೇಶದಿಂದ ಮೆಕ್ಸಿಕೋದ ಫರ್ನಾಮಡಾ ಕಾಂಟ್ರೇರಸ್ ಗೋಮೇಜ್ ಈ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.