ನವದೆಹಲಿ: ಇಂದು ದೇಶಾದ್ಯಂತ ‘ಕರೊನಾ ವಾರಿಯರ್ಸ್’ಗೆ ಭಾರತೀಯ ಸಶಸ್ತ್ರ ಪಡೆಗಳು ಗೌರವ ಸಲ್ಲಿಸಿವೆ. ಮಿಲಿಟರಿ ಪಡೆಗಳು ವಿವಿಧ ರೀತಿಯ ಚಟುವಟಿಕೆಗಳ ಮೂಲಕ ಕರೊನಾ ವಿರುದ್ಧ ಹೋರಾಟದಲ್ಲಿ ಮುಂಚೂಣಿಯಲ್ಲಿರುವ ವೈದ್ಯಕೀಯ ಸಿಬ್ಬಂದಿ, ಸ್ವಚ್ಛತಾ ಕಾರ್ಮಿಕರು, ಪೊಲೀಸರಿಗೆ ಕೃತಜ್ಞತೆ ಸಲ್ಲಿಸಿರುವ ಕೆಲವು ವಿಡಿಯೋಗಳನ್ನು ಸಂಯೋಜನೆ (ಕೊಲ್ಯಾಜ್) ಮಾಡಿದ ಒಂದು ವಿಡಿಯೋವನ್ನು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ತಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ಶೇರ್ ಮಾಡಿಕೊಂಡಿದ್ದಾರೆ.
ವಿಡಿಯೋ ಪೋಸ್ಟ್ ಮಾಡಿರುವ ನರೇಂದ್ರ ಮೋದಿಯವರು, ಕೊವಿಡ್-19ರ ವಿರುದ್ಧ ಹೋರಾಟದಲ್ಲಿ ಮುಂಚೂಣಿಯಲ್ಲಿದ್ದುಕೊಂಡು, ಧೈರ್ಯದಿಂದ ಹೋರಾಡುತ್ತಿರುವ ಎಲ್ಲರಿಗೂ ಪ್ರಣಾಮಗಳು. ಅಂಥವರಿಗೆ ಇಂದು ನಮ್ಮ ಸಶಸ್ತ್ರಪಡೆಗಳು ಅದ್ಭುತ ಗೌರವ ಸಲ್ಲಿಸಿವೆ ಎಂದು ಬರೆದಿದ್ದಾರೆ.
ಇದನ್ನೂ ಓದಿ: 2 ಪ್ಯಾಕೆಟ್ ಕುರುಂಕುರುಂ ತಿಂಡಿ ಕೇಳಿದ್ದಕ್ಕೆ 2 ಲಕ್ಷ ರೂಪಾಯಿ ಗುಳುಂ! ಆಗಿದ್ದೇನು?
ಮೋದಿಯವರು ಶೇರ್ ಮಾಡಿಕೊಂಡಿರುವ 2 ನಿಮಿಷ, 16 ಸೆಕೆಂಡ್ಗಳ ವಿಡಿಯೋದಲ್ಲಿ, ಮಿಲಿಟರಿ ಸಿಬ್ಬಂದಿ ಬ್ಯಾಂಡ್ಗಳನ್ನು ಬಾರಿಸುವುದನ್ನು, ಆಸ್ಪತ್ರೆ, ವೈದ್ಯಕೀಯ ಸಂಸ್ಥೆಗಳ ಎದುರು ನಿಂತ ಕರೊನಾ ವಾರಿಯರ್ಸ್ ಮೇಲೆ ಹೂಮಳೆ ಗರೆಯುವುದನ್ನು ನೋಡಬಹುದು.
ಅದಕ್ಕೆ ಪ್ರತಿಯಾಗಿ ಆರೋಗ್ಯ ಸಿಬ್ಬಂದಿಯೂ ಕೂಡ ಚಪ್ಪಾಳೆ ಹೊಡೆಯುತ್ತ, ಸ್ಪಂದಿಸುವುದನ್ನು ವಿಡಿಯೋದಲ್ಲಿ ಕಾಣಬಹುದು.
ಭಾರತೀಯ ಸೇನೆಯ ಮೂರು ಪಡೆಗಳಿಂದ ಕರೊನಾ ವಾರಿಯರ್ಸ್ಗೆ ವಿಶೇಷ ಗೌರವ ಸಲ್ಲಿಸಲಾಗುವುದು ಎಂದು ಶುಕ್ರವಾರ ಸಿಡಿಎಸ್ ಮುಖ್ಯಸ್ಥ ಬಿಪಿನ್ ರಾವತ್ ಘೋಷಣೆ ಮಾಡಿದ್ದರು. (ಏಜೆನ್ಸೀಸ್)
ಇದನ್ನೂ ಓದಿ: ಕರೊನಾ ಹಾಟ್ಸ್ಫಾಟ್ ಆಗಿದೆ ದಾವಣಗೆರೆ; ಇಂದು ಒಂದೇ ದಿನದಲ್ಲಿ ಬರೋಬ್ಬರಿ 21 ಕೇಸ್ಗಳು ಪತ್ತೆ…