ಬೆಂಗಳೂರು: ಕರೊನಾ ಸೋಂಕು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಇದಾಗಲೇ ಕೆಲವೊಂದು ಹೊಸ ರೂಲ್ಸ್‌ಗಳನ್ನು ಸರ್ಕಾರ ಮಾಡಿದೆ. ಇದರ ಬೆನ್ನಲ್ಲೇ ಸೋಂಕು ಪೀಡಿತರು, ಸೌಮ್ಯ ಲಕ್ಷಣ ಇರುವವರು ಮತ್ತು ಲಕ್ಷಣಗಳೇ ಇಲ್ಲದವರು ಮನೆಯಲ್ಲೇ ಐಸೋಲೇಟ್ ಆಗಲು ಕೇಂದ್ರ ಆರೋಗ್ಯ ಸಚಿವಾಲಯ ಹೇಳಿದ್ದು, ಈ ಸಂಬಂಧ ಹೊಸದಾಗಿರುವ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ.
ಕರೊನಾದ ಸೌಮ್ಯ ಗುಣಲಕ್ಷಣಗಳನ್ನು ಹೊಂದಿರುವ, ಲಕ್ಷಣರಹಿತ ಸೋಂಕಿತರಿಗೆ ಮಾತ್ರ ಈ ಹೊಸ ನಿಯಮ ಅನ್ವಯ ಆಗುತ್ತಿದೆ. ಸಣ್ಣಪ್ರಮಾಣದಲ್ಲಿ ಉಸಿರಾಟ ತೊಂದರೆ, ಆಕ್ಸಿಜನ್ ಮಟ್ಟ ಶೇ. 93ಕ್ಕಿಂತ ಕಡಿಮೆ ಇದ್ದವರು ಮನೆಯಲ್ಲಿ ಐಸೋಲೇಟ್ ಆಗಬಾರದು. ಇಂಥವರು ಕ್ಷಣವೇ ಆಸ್ಪತ್ರೆಗೆ ದಾಖಲಾಗಬೇಕು ಎಂದು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ.
ಮನೆಯಲ್ಲಿ ಇರುವವರು ಸೋಂಕಿತರಿಗೆ ಈ ನಿಯಮಗಳು:
* ಕರೊನಾ ಸೋಂಕಿತರು ಉಳಿದ ಸದಸ್ಯರ ಸಂಪರ್ಕಕ್ಕೆ ಬರಬಾರದು. ಮನೆಯಲ್ಲಿ ವೃದ್ಧರು, ಅಸ್ವಸ್ಥರು ಇದ್ದರಂತೂ ತುಂಬಾ ಜಾಗರೂಕರಾಗಿರಬೇಕು.
* ಸೋಂಕಿತರು ಇರುವ ಕೋಣೆ ಸದಾ ಗಾಳಿಯಾಡುವಂತೆ ಇರಬೇಕು. ಕಿಟಕಿಗಳನ್ನು ತೆರೆದಿಡಬೇಕು.
* ಸೋಂಕಿತರು ಮೂರು ಲೇಯರ್ಗಳ ಮಾಸ್ಕ್ ಧರಿಸಬೇಕು. ಎಂಟು ಗಂಟೆಗೊಮ್ಮೆ ಅದನ್ನು ಬದಲಿಸಬೇಕು. ಅದನ್ನು ಎಲ್ಲೆಂದರೆಲ್ಲಿ ಎಸೆಯುವಂತಿಲ್ಲ. ಅವುಗಳನ್ನು ತುಂಡುತುಂಡಾಗಿ ಕತ್ತರಿಸಿ, ಅದನ್ನು 72 ತಾಸುಗಳ ಕಾಲ ಕಾಗದದ ಬ್ಯಾಗ್ನಲ್ಲಿ ಇಟ್ಟು ನಂತರ ಡಿಸ್‌ಪೋಸ್‌ ಮಾಡಬೇಕು.
* ಕರೊನಾ ಸೋಂಕಿರುವ ಸಂದರ್ಭದಲ್ಲಿ ದ್ರವ ರೂಪದ ಆಹಾರಗಳನ್ನು ತೆಗೆದುಕೊಳ್ಳಬೇಕು. ನೀರನ್ನು ಚೆನ್ನಾಗಿ ಕುಡಿಯಬೇಕು. ಉಸಿರಾಟಕ್ಕೆ ಸಂಬಂಧಪಟ್ಟ ವ್ಯಾಯಾಮ ಮಾಡಬೇಕು. ವಿಶ್ರಾಂತಿ ತೆಗೆದುಕೊಳ್ಳಬೇಕು. ಸ್ಯಾನಿಟೈಸರ್ ಬಳಕೆ ಮಾಡಬೇಕು.
* ಸೋಂಕಿತರು ತಾವು ಬಳಸಿದ ಪಾತ್ರೆಗಳು ಸೇರಿ ಇನ್ನಿತರ ಯಾವುದೇ ವೈಯಕ್ತಿಕ ವಸ್ತುಗಳನ್ನೂ ಮನೆಯಲ್ಲಿ ಇತರರೊಟ್ಟಿಗೆ ಹಂಚಿಕೊಳ್ಳಬಾರದು. ಮನೆಯ ಉಳಿದ ಜನರೂ ಕೂಡ ಈ ಬಗ್ಗೆ ಗಮನಹರಿಸಬೇಕು.
* ಪಲ್ಸ್ ಆಕ್ಸಿಮೀಟರ್ಗಳನ್ನು ಖರೀದಿ ಇಟ್ಟುಕೊಂಡಿರಬೇಕು. ಆಕ್ಸಿಜನ್ ಮಟ್ಟವನ್ನು ಆಗಾಗ್ಗೆ ಚೆಕ್ ಮಾಡಿಕೊಳ್ಳಬೇಕು. ದೇಹದ ಉಷ್ಣತೆಯ ಬಗ್ಗೆಯೂ ಗಮನ ಇರಬೇಕು. ಯಾವುದೇ ಸಣ್ಣ ಲಕ್ಷಣಗಳು ಕಂಡುಬಂದರೂ ನಿಮಗೆ ಕೊಡಲಾದ ಕಂಟ್ರೋಲ್ ರೂಂ ನಂಬರ್ಗೆ ಕರೆ ಮಾಡಬೇಕು.
ಸೌಮ್ಯ ಲಕ್ಷಣ ಅಥವಾ ಲಕ್ಷಣ ರಹಿತವಾಗಿ ಇದ್ದವರು ಏನು ಮಾಡಬೇಕು?
* ಮನೆಯಲ್ಲೇ ಐಸೋಲೇಟ್ ಆಗಿರುವ ಸೌಮ್ಯ ಅಥವಾ ಲಕ್ಷಣ ರಹಿತ ಸೋಂಕಿತರು ಸೋಂಕು ನಿರ್ವಹಣೆಗೆ ಮಾರ್ಗದರ್ಶನ ನೀಡಲು, ಜಿಲ್ಲೆ/ಉಪಜಿಲ್ಲಾ ಮಟ್ಟದಲ್ಲಿ ಕಂಟ್ರೋಲ್ ರೂಂಗಳನ್ನು ಸ್ಥಾಪಿಸಿ, ಅದರ ನಂಬರ್ನ್ನು ನೀಡಲಾಗುತ್ತದೆ.
* ಮನೆಯಲ್ಲಿ ಇರುವ ಸೋಂಕಿತರ ಮೇಲೆ ನಿಗಾ ಇಡಬೇಕು. ಕೇರ್ಟೇಕರ್ಗಳು ಎರಡೂ ಡೋಸ್ ಕೊವಿಡ್ 19 ಲಸಿಕೆ ತೆಗೆದುಕೊಂಡವರು ಆಗಿರಬೇಕು.
* 60 ವರ್ಷ ಮೇಲ್ಪಟ್ಟವರು, 60 ವರ್ಷ ಮೇಲ್ಪಟ್ಟು ಇತರ ರೋಗಗಳಿಂದ ಬಳಲುತ್ತಿರುವವರು ಕರೊನಾ ಸೋಂಕಿಗೆ ಒಳಗಾಗಿ ಅವರಿಗೆ ಸೌಮ್ಯ ಲಕ್ಷಣಗಳಿದ್ದರೆ ಅಥವಾ ಲಕ್ಷಣರಹಿತರಾಗಿದ್ದರೆ, ಅವರು ಒಮ್ಮೆಲೇ ಹೋಂ ಐಸೋಲೇಶನ್ಗೆ ಒಳಗಾಗುವಂತಿಲ್ಲ. ಒಮ್ಮೆ ಸಂಬಂಧಪಟ್ಟ ವೈದ್ಯರ ಬಳಿ ಸಂಪೂರ್ಣ ತಪಾಸಣೆ ಮಾಡಿಸಿಕೊಳ್ಳಬೇಕು. ನಂತರ ಅವರ ಸಲಹೆ ಮೇರೆಗೆ ಮನೆಯಲ್ಲಿ ಐಸೋಲೇಟ್ ಆಗಬೇಕು.
ಆಸ್ಪತ್ರೆಗೆ ಯಾವಾಗ ದಾಖಲಾಗಬೇಕು?
* ಪದೇ ಪದೇ ಜ್ವರ ಶುರುವಾದಾಗ (100 ಡಿಗ್ರಿ ಸೆಲ್ಸಿಯಸ್ನಷ್ಟು ಜ್ವರ 3 ದಿನಗಳಾದರೂ ಕಡಿಮೆಯಾಗಿಲ್ಲದಾಗ)
* ಉಸಿರಾಡಲು ತೊಂದರೆಯಾದಾಗ
* ಆಕ್ಸಿಜನ್ ಮಟ್ಟ ಕಡಿಮೆಯಾದಾಗ
* ಎದೆ ಭಾಗದಲ್ಲಿ ನೋವು ಶುರುವಾದರೆ
* ಅತಿಯಾದ ಆಯಾಸ ಉಂಟಾದರೆ
* ಮಾನಸಿಕವಾಗಿ ಏನಾದರೂ ಕಿರಿಕಿರಿ, ಗೊಂದಲಗಳು ಹೆಚ್ಚಾದರೆ.
ವೀಕೆಂಡ್‌ ಕರ್ಫ್ಯೂ ವೇಳೆ ಬಸ್‌, ಮೆಟ್ರೊ ಸೇವೆ ಇರುತ್ತಾ? ಏನೇನು ಹೊಸ ರೂಲ್ಸ್‌? ಇಲ್ಲಿವೆ ಡಿಟೇಲ್ಸ್‌