ಭುವನೇಶ್ವರ: ಬಾಲಿವುಡ್ನಲ್ಲಿ ತೆರೆ ಕಂಡಿರುವ ಧೂಮ್ ಚಿತ್ರದ ಪ್ರೇರಣೆಯಿಂದಈ ಖತರ್ನಾಕ್ ಕಳ್ಳರು ಮಾಡಿರುವ ಕಳ್ಳತನಕ್ಕೆ ಎಂತಹವರೂ ಬೆರರಾಗುತ್ತಾರೆ.
ಹೈಫ್ರೊಫೈಲ್ ಕಳ್ಳತನ ಮಾಡುವುದು ಹೇಗೆ, ಅದಕ್ಕಾಗಿ ಯಾವ ರೀತಿ ಸಿದ್ಧತೆ ಮಾಡಿಕೊಳ್ಳಬೇಕೆಂಬುದನ್ನು ಹಿಂದಿಯಲ್ಲಿ ತೆರೆ ಕಂಡ ಧೂಮ್ ಸರಣಿ ಚಿತ್ರಗಳೇ ಉದಾಹರಣೆಯಾಗಿವೆ. ಭಾರೀ ಹಿಟ್ ಆದ ಈ ಚಿತ್ರಗಳು ಇದೀಗ ಕಳ್ಳತನಕ್ಕೆ ದಾರಿ ಮಾಡಿಕೊಡುತ್ತಿದೆ.
ಧೂಮ್ ಚಿತ್ರ ವೀಕ್ಷಿಸಿದ ಕಳ್ಳರು, ಒಡಿಶಾದ ಶಾಲಾ ಕೊಠಡಿಗೆ ಶುಕ್ರವಾರ ರಾತ್ರಿ ನುಗ್ಗಿ ಅಲ್ಲಿದ್ದ ಕಂಪ್ಯೂಟರ್ಸ್, ಪ್ರಿಂಟರ್ಸ್ ಹಾಗೂ ಎಲೆಕ್ಟ್ರಾನಿಕ್ ವಸ್ತುಗಳನ್ನು ಕಳವು ಮಾಡಿ ಪರಾರಿಯಾಗಿದ್ದಾರೆ. ಕಳ್ಳತನ ಮಾಡಿರುವುದಷ್ಟೇ ಅಲ್ಲ, ಬದಲಾಗಿ ಬೋರ್ಡ್ ಮೇಲೆ ಧೂಮ್-4, ಶೀಘ್ರದಲ್ಲೇ ಮತ್ತೆ ಬರುತ್ತೇವೆ ಎಂದು ಬರೆದಿದ್ದಾರೆ.
ಮಾರನೇ ದಿನ ಶಾಲಾ ಕೊಠಡಿಯನ್ನು ತೆರೆದ ಶಿಕ್ಷಕರು ಇದನ್ನು ನೋಡಿ ದಂಗಾಗಿದ್ದಾರೆ. ಅರೇ ಕಳ್ಳತನ ಮಾಡಿದ್ದಲ್ಲದೇ ಮತ್ತೆ ಬರುತ್ತೇನೆ ಎಂದು ಹೇಳಿರುವ ಈ ಕಳ್ಳರ ಧೈರ್ಯವನ್ನು ಮೆಚ್ಚಲೇಬೇಕಿದೆ ಎಂದು ಶಿಕ್ಷಕರು ಸೇರಿದಂತೆ ಗ್ರಾಮಸ್ಥರು ಹುಬ್ಬೇರಿಸಿದ್ದಾರೆ.
ಖತಿಗುಡಾದ ಇಂದ್ರಾವತಿ ಪ್ರೌಢ ಶಾಲೆಯಲ್ಲಿ ಈ ಕಳ್ಳತನ ನಡೆದಿದೆ, ಶಾಲೆಯಲ್ಲಿದ್ದ ಪ್ರಿಂಟರ್, ಕಂಪ್ಯೂಟರ್ ಕಳವು ಮಾಡಿದ್ದಲ್ಲದೇ, ನಿಮಗೆ ತಾಕತ್ತಿದ್ದರೆ ನಮ್ಮನ್ನು ಹಿಡಿಯಿರಿ ಎಂದು ಬೋರ್ಡ್ ಮೇಲೆ ಬರೆದು ಸವಾಲು ಕೂಡ ಹಾಕಿದ್ದಾರೆ.ಸದ್ಯ ಈ ಬಗ್ಗೆ ಶಾಲಾ ಮುಖ್ಯ ಶಿಕ್ಷಕ ಸರಬೇಶ್ವರ್ ಬೆಹ್ರಾ ಅವರು ಖತಿಗುಡದ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಈ ಧೂಮ್ ಕಳ್ಳರನ್ನು ಪೊಲೀಸರು ಹಿಡಿಯುವರೇ ಎಂಬುದನ್ನು ಕಾದುನೋಡಬೇಕಿದೆ. (ಏಜೆನ್ಸೀಸ್)
ಹಣಕ್ಕಾಗಿ ಮನೆ ಮಾಲೀಕನ ಮಗನನ್ನೇ ಕಿಡ್ನ್ಯಾಪ್ ಮಾಡಿ ವಿಫಲ ಯತ್ನ, 24 ಗಂಟೆಯಲ್ಲೇ ಸೆರೆಸಿಕ್ಕ ಖದೀಮ ದಂಪತಿ!