ನವದೆಹಲಿ: 2020ರಲ್ಲಿ ರೈಲು ಪ್ರಯಾಣ ದುಬಾರಿಯಾಗಲಿದೆ. ಹೌದು ಪ್ರತಿ ಕಿಲೋಮೀಟರ್ಗೆ ಒಂದು ಪೈಸೆ ಬೆಲೆ ಹೆಚ್ಚಳವಾಗಿದೆ.
ಸಾಮಾನ್ಯ ಪಯಣಕ್ಕೆ ಪ್ರತಿ ಕಿಮೀಗೆ 1 ಪೈಸೆ, ಮೈಲ್ ಹಾಗೂ ಎಕ್ಸ್ಪ್ರೆಸ್ಗೆ ಪ್ರತಿ ಕಿ.ಮೀ.ಗೆ 2 ಪೈಸೆ, ಎಸಿ ಪ್ರಯಾಣಿಕರಿಗೆ ಪ್ರತಿ ಕಿ.ಮೀ.ಗೆ 4 ಪೈಸೆ ಹೆಚ್ಚಿಸಲಾಗಿದ್ದು ಇಂದು ಮಧ್ಯರಾತ್ರಿಯಿಂದ ಹೊಸ ದರ ಅನ್ವಯವಾಗುವಂತೆ ರೈಲ್ವೇ ಇಲಾಖೆ ಮಂಗಳವಾರ ಆದೇಶ ಹೊರಡಿಸಿದೆ.
ರೈಲ್ವೇ ಸಚಿವಾಲಯವು 1 ಜನವರಿ 2020ರಿಂದ ದರ ಏರಿಕೆ ನಿರ್ಧರಿಸಲಾಗಿದೆ ಎಂದು ದರ ಏರಿಕೆ ಮಾಡಿ ನೀಡಿದ ಸೂಚನೆಯಲ್ಲಿ ಇಲಾಖೆ ಸ್ಪಷ್ಟಪಡಿಸಿದೆ.
ರೈಲ್ವೇ ಮಂಡಳಿ ಅಧ್ಯಕ್ಷ ವಿನೋದ್ ಕುಮಾರ್ ಯಾದವ್, “ದರ ಏರಿಕೆ ಬಗ್ಗೆ ಕೇಂದ್ರ ಸರ್ಕಾರದ ಎದುರಿಗೆ ಯಾವ ಪ್ರಸ್ತಾವವಿಲ್ಲ” ಎಂದು ಹೇಳಿದ ಮರು ದಿನವೇ ಪ್ರಯಾಣದ ದರವನ್ನು ಏರಿಸಲಾಗಿದೆ. ಕಳೆದ ಬಾರಿ ಪ್ರಯಾಣ ದರ ಏರಿಕೆಯಾಗಿದ್ದು 2014-15ರಲ್ಲಿ ಎಂದು ಇಲಾಖೆ ರೈಲು ಪ್ರಯಾಣಿಕರಿಗೆ ತಿಳಿಸಿದೆ.
ಆಫ್-ಬೋರ್ಡ್ ಮತ್ತು ಆನ್-ಬೋರ್ಡ್ ಎರಡರಲ್ಲೂ ಉನ್ನತೀಕರಣ ಮತ್ತು ಸೌಲಭ್ಯಗಳ ವಿಸ್ತರಣೆಯಾಗಿದೆ. ಬೋಗಿಗಳ ಆಧುನೀಕರಣ ಮತ್ತು ನಿಲ್ದಾಣಗಳಲ್ಲಿ ಸುಧಾರಿತ ಸೌಲಭ್ಯಗಳನ್ನು ಒದಗಿಸುವ ಮೂಲಕ ಪ್ರಯಾಣಿಕರ ಉನ್ನತ ಅನುಭವವನ್ನು ಹೆಚ್ಚಿಸಲು ಭಾರತೀಯ ರೈಲ್ವೆ ನಿರಂತರವಾಗಿ ಪ್ರಯತ್ನಿಸುತ್ತಿದೆ ಎಂದು ರೈಲ್ವೆ ಸಚಿವಾಲಯ ಹೇಳಿಕೊಂಡಿದೆ.
ಈಗಾಗಲೇ ಮುಂಗಡವಾಗಿ ಟಿಕೆಟ್ ಬುಕ್ ಆಗಿದ್ದರೆ ಆದರೆ ಹೆಚ್ಚಿನ ಬೆಲೆಯನ್ನು ಪಡೆಯಲಾಗುವುದಿಲ್ಲ. ಆದರೆ ನಿಲ್ದಾಣಗಳಲ್ಲಿ ಮತ್ತು ಟಿಕೆಟ್ ಕಲೆಕ್ಟರ್ ಪರಿಶೀಲಿಸಿದ ಟಿಕೆಟ್ಗಳಿಗೆ ಹೆಚ್ಚನ ದರ ವಿಧಿಸಲಾಗುತ್ತದೆ ಎಂದು ಸಚಿವಾಲಯ ತಿಳಿಸಿದೆ.
ರಾಜಧಾನಿ, ಶತಾಬ್ದಿ, ಡುರಾಂಟೊ, ವಂದೇ ಭಾರತ್, ಹಮ್ಸಫರ್, ಮಹಾಮಾನ, ಗತಿಮಾನ್, ಅಂತ್ಯೋದಯ, ಗರೀಬ್ ರಥ, ಜನ್ ಶತಾಬ್ದಿ, ರಾಜ್ಯ ರಾಣಿ, ಯುವ ಎಕ್ಸ್ಪ್ರೆಸ್, ಸುವಿಧಾ, ವಿಶೇಷ ರೈಲು ಮತ್ತು ಎಸಿ ಮೆಮು ಹಾಗೂ ಎಸಿ ಡೆಮು ರೈಲುಗಳ ದರದಲ್ಲಿ ಏರಿಕೆಯಾಗಿದೆ ಎಂದು ಇಲಾಖೆಯ ಸೂಚನೆ ತಿಳಿಸಿದೆ. (ಏಜೆನ್ಸೀಸ್)