ಪಲಮನೇರು: ಪ್ರೇಯಸಿಯನ್ನು ಭೇಟಿ ಮಾಡಲು ಹೋದ ಯುವಕನೊಬ್ಬ ಆಕೆಯ ತಂದೆಯಿಂದ ಬರ್ಬರವಾಗಿ ಹತ್ಯೆಯಾಗಿರುವ ಘಟನೆ ಚಿತ್ತೂರು ಜಿಲ್ಲೆಯ ಪಲಮನೇರುವಿನಲ್ಲಿ ನಡೆದಿದೆ.
ಮಗಳೊಂದಿಗೆ ಆಕೆಯ ಪ್ರಿಯಕರ ತನ್ನ ಮನೆಯಲ್ಲಿಯೇ ಮಲಗಿರುವುದನ್ನು ನೋಡಿದ ತಂದೆಗೆ ಅತೀವ ಸಿಟ್ಟು ಬಂದು, ಕೋಪ ತಾರಕಕ್ಕೇರಿ ಕೋಲಿನಿಂದ ಬಡಿದು ಯುವಕನನ್ನು ಸ್ಥಳದಲ್ಲೇ ಕೊಲೆ ಮಾಡಿದ್ದಾನೆ. ಈ ಘಟನೆ ಚಿತ್ತೂರು ಜಿಲ್ಲೆಯ ಪಲಮನೇರು ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.
ಕೊಲೆಯಾದ ಯುವಕನನ್ನು ಧನಶೇಖರ್ (23) ಎಂದು ಗುರುತಿಸಲಾಗಿದೆ. ಈತ ಪಲಮನೇರು ಮಂಡಲದ ಪೆಂಗಾರಗುಂಟ ಮೂಲದವನು. ಬೆಂಗಳೂರಿನಲ್ಲಿ ಚಾಲಕನಾಗಿ ಕೆಲಸ ಮಾಡುತ್ತಿದ್ದ. ಲಾಕ್ಡೌನ್ ಹಿನ್ನೆಲೆಯಲ್ಲಿ ಇದೇ ತಿಂಗಳು 22ರಂದು ತವರಿಗೆ ಮರಳಿದ್ದ. ಅದೇ ದಿನ ರಾತ್ರಿ 10 ಗಂಟೆಗೆ ಫೋನ್ನಲ್ಲಿ ಮಾತನಾಡುತ್ತಾ ಮನೆಯಿಂದ ಕಣ್ಮರೆಯಾದ ಯುವಕ ಮರಳಿ ಬರಲೇ ಇಲ್ಲ. ಆತನ ತಂದೆ ಸ್ಥಳೀಯ ಪೊಲೀಸ್ ಠಾಣೆಗೆ ಮೇ 26ರಂದು ನಾಪತ್ತೆ ಪ್ರಕರಣ ದಾಖಲಿಸಿದ್ದರು. ಮೃತ ಧನಶೇಖರನ ಫೋನ್ ಕಾಲ್ ಮಾಹಿತಿ ಆಧಾರಿಸಿ ಪೊಲೀಸರು ತನಿಖೆಗೆ ಇಳಿದರು.
ಕೊನೆಯದಾಗಿ ಧನಶೇಖರ್ ಕರೆ ಮಾಡಿದ ಜಾಡು ಹಿಡಿದು ಹೊರಟ ಪೊಲೀಸರಿಗೆ ಎದುರಾಗಿದ್ದು, ಪೆಮ್ ಗರಗುಂಟಾ ನಿವಾಸಿ ಬಾಬು. ಈತ ಧನ್ಶೇಖರ್ ಪ್ರೀತಿಸುತ್ತಿದ್ದ ಹುಡುಗಿ (16 ವರ್ಷ)ಯ ತಂದೆ. ಹಲವು ವರ್ಷಗಳಿಂದ ಧನಶೇಖರ್ ಮತ್ತು ಹುಡುಗಿ ಪ್ರೀತಿಸುತ್ತಿದ್ದರು.
ಮೇ 22ರ ರಾತ್ರಿ 10 ಗಂಟೆಗೆ ಧನಶೇಖರ್ ಹುಡುಗಿಗೆ ಕರೆ ಮಾಡಿ, ಆಕೆಯ ಮನೆಗೆ ತೆರಳಿದ್ದಾನೆ. ಇತ್ತ ತೋಟಕ್ಕೆ ಹೋಗಿದ್ದ ಹುಡುಗಿಯ ತಂದೆ ಬಾಬು 11 ಗಂಟೆಗೆ ಮನೆಗೆ ಮರಳಿದ್ದಾನೆ. ಈ ವೇಳೆ ಮನೆಯಲ್ಲಿ ಕೇಳಿಬಂದ ಶಬ್ದ ನೋಡಿ ಮಗಳ ಕೋಣೆಯನ್ನು ತೆರದಾಗ ಇಬ್ಬರು ಒಟ್ಟಿಗೆ ಮಲಗಿರುವುದನ್ನು ನೋಡಿ ಆತನಿಗೆ ಸಿಟ್ಟು ಬಂದಿದೆ. ತಕ್ಷಣ ಕೈಗೆ ಸಿಕ್ಕ ಕೋಲಿನಿಂದ ಚೆನ್ನಾಗಿ ಥಳಿಸಿ, ಯುವಕನನ್ನು ಬಾಬು ಹತ್ಯೆಗೈದಿದ್ದಾನೆ.
ಇದಾದ ಬಳಿಕ ಬಾಬು ಯುವಕನ ಮೃತದೇಹವನ್ನು ಬಟ್ಟೆಯಲ್ಲಿ ಸುತ್ತಿ ಹತ್ತಿರದ ಚಿನ್ನಕುಂಟದಲ್ಲಿರುವ ಬಾವಿಯೊಂದಕ್ಕೆ ಎಸೆದು ಮನೆಗೆ ಹಿಂದಿರುಗಿದ್ದಾನೆ. ಎರಡು ದಿನಗಳ ಬಳಿಕ ಬಾವಿಯ ನೋಡಿದಾಗ ಮೃತದೇಹ ತೇಲುವುದನ್ನು ನೋಡಿ, ಕೆಲವರ ಸಹಾಯದಿಂದ ಅದನ್ನು ಮೇಲೆತ್ತಿ, ತುಂಡು ತುಂಡಾಗಿ ಕತ್ತರಿಸಿ ಹತ್ತಿರದ ಕಾಡಿನಲ್ಲಿ ಹೂತು ಹಾಕಿ ಬಂದಿದ್ದ. ಪೊಲೀಸರು ಶುಕ್ರವಾರ ಮೃತದೇಹವನ್ನು ವಶಕ್ಕೆ ಪಡೆದುಕೊಂಡಿದ್ದು, ತನಿಖೆ ಮುಂದುವರಿಸಿದ್ದಾರೆ. (ಏಜೆನ್ಸೀಸ್)
ಹಗಲಲ್ಲೇ ಕಾರು ಅಡ್ಡಗಟ್ಟಿ ವೈದ್ಯ ದಂಪತಿಯ ಹತ್ಯೆ: 2 ವರ್ಷಗಳ ಹಿಂದಿನ ಅಕ್ರಮ ಸಂಬಂಧದ ಸೇಡು?!
ಫಿನ್ಲ್ಯಾಂಡ್ ಪ್ರಧಾನಿಯ ಬ್ರೇಕ್ಫಾಸ್ಟ್ ಬಿಲ್ನಲ್ಲಿ ಅಕ್ರಮ ಶಂಕೆ: ಪೊಲೀಸ್ ತನಿಖೆ ಘೋಷಣೆ