ಖಾನ್ಪುರ: ರಾತ್ರಿ ಎಷ್ಟು ಹೊತ್ತಾದರೂ ಟಿವಿ ಆಫ್ ಮಾಡದೇ ಇದ್ದ ತಂದೆ ವಿರುದ್ಧ ಸಿಟ್ಟಾದ ಮಾಜಿ ಯೋಧ, ಅವರನ್ನು ಶೂಟ್ ಮಾಡಿ ಕೊಂದು ಹಾಕಿದ್ದಾನೆ. ಪರಿಣಾಮ 80 ವರ್ಷ ವಯಸ್ಸಿನ ಲಾಲಾ ರಾಮ್ ಎಂಬಾತ ಸ್ಥಳದಲ್ಲೇ ಮೃತಪಟ್ಟಿದ್ದಾನೆ.
ಉತ್ತರ ಪ್ರದೇಶದ ನಾಸೀರ್ಪುರ್ ಗ್ರಾಮದಲ್ಲಿ ಗುರುವಾರ ರಾತ್ರಿ ಈ ಪ್ರಕರಣ ನಡೆದಿದೆ. ಪುತ್ರ, ಮಾಜಿ ಯೋಧ ಅಶೋಕ್ ಕಟಿಯಾರ್ ಈ ಕೃತ್ಯ ಎಸಗಿದ್ದಾನೆ. ಟಿವಿ ಆಫ್ ಮಾಡುವ ವಿಚಾರಕ್ಕೆ ತಂದೆ-ಮಗನ ನಡುವೆ ವಾಗ್ವಾದ ನಡೆದಿದೆ. ಟಿವಿ ಆಫ್ ಮಾಡಿ ಎಂದರೂ ತಂದೆ ಇನ್ನೂ ಟಿವಿ ನೋಡುತ್ತಲೇ ಇದ್ದಿದ್ದರಿಂದ ಸಿಟ್ಟಾದ ಪುತ್ರ ಮೊದಲಿಗೆ ತಂದೆಯನ್ನು ತಳ್ಳಿದ್ದಾನೆ. ನಂತರ ತನ್ನ ಬಳಿ ಇರುವ ಡಬಲ್ ಬ್ಯಾರೆಲ್ ಗನ್ನಿಂದ ಶೂಟ್ ಮಾಡಿದ್ದಾನೆ. ಗಂಭೀರ ಗಾಯಕ್ಕೊಳಗಾದ ತಂದೆ ಮೃತಪಟ್ಟಿದ್ದಾರೆ ಎಂದು ಎಎಸ್ಪಿ ಅನೂಪ್ ಕುಮಾರ್ ತಿಳಿಸಿದ್ದಾರೆ.
ಮಾಜಿ ಯೋಧ ಅಶೋಕ್ ಕುಟುಂಬದ ಜತೆ ನಾಸೀರ್ಪುರದಲ್ಲಿ ನೆಲೆಸಿದ್ದು, ಮದ್ಯವ್ಯಸನಿ ಆಗಿದ್ದು ಚಿಕ್ಕ ಚಿಕ್ಕ ವಿಷಯಕ್ಕೂ ಜಗಳ ಮಾಡುತ್ತಿದ್ದ. ಆತನ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)