ಹುಬ್ಬಳ್ಳಿ: ಲಾಕ್ಡೌನ್ ಸಮಯದಲ್ಲಿ ಫಿಟ್ ಆಗಿರಲು ಯೋಗ ಮಾಡಿ ಎಂಬ ಸಂದೇಶ ಸಾರಿದ ಹುಬ್ಬಳ್ಳಿ ಬಾಲಕಿಯ ವಿಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಕಾರಣ, ಈ ಬಾಲೆಯ ಯೋಗಾಭ್ಯಾಸವನ್ನು ಮೆಚ್ಚಿಕೊಂಡು ಪ್ರಧಾನಿ ನರೇಂದ್ರ ಮೋದಿ ಟ್ವೀಟ್ ಮಾಡಿರುವುದು ಇದಕ್ಕೆ ಕಾರಣ.
ನಗರದ ಓರಿಯಂಟಲ್ ಪಬ್ಲಿಕ್ ಸ್ಕೂಲ್ನಲ್ಲಿ 2ನೇ ತರಗತಿಗೆ ಹೋಗಬೇಕಿರುವ 6 ವರ್ಷದ ಬಾಲಕಿ ಇರ್ಫಾ ಮುಲ್ಲಾ, ಪ್ರಧಾನಿ ಮೋದಿ ಅವರ ಮೆಚ್ಚುಗೆಗೆ ಪಾತ್ರವಾಗಿರುವ ಬಾಲಕಿ.
ಲಾಕ್ಡೌನ್ ಸಮಯದಲ್ಲಿ ಮನೆಯೊಳಗೆ ಯೋಗ ಮಾಡುತ್ತಿರುವ ವಿಡಿಯೋವನ್ನು ಆಕೆಯ ತಂದೆ ಇಮ್ತಿಯಾಜ್ ಮುಲ್ಲಾ ಅವರು ಕೆಲದಿನಗಳ ಹಿಂದೆ ಟ್ವಿಟ್ಟರ್ನಲ್ಲಿ ಪೋಸ್ಟ್ ಮಾಡಿದ್ದರು. ಇದನ್ನು ಲೈಕ್ ಮಾಡಿ ಪ್ರತಿಕ್ರಿಯಿಸಿರುವ ನರೇಂದ್ರ ಮೋದಿ ಅವರು, ಗ್ರೇಟ್, ಸ್ಟೇ ಹೋಮ್, ಸ್ಟೇ ಹೆಲ್ದಿ ಆ್ಯಂಡ್ ಫಿಟ್ (ಅದ್ಭುತ, ಮನೆಯಲ್ಲಿಯೇ ಇರಿ. ಸ್ವಸ್ಥ ಮತ್ತು ಆರೋಗ್ಯದಿಂದಿರಿ)’ ಎಂದು ಹೇಳಿದ್ದಾರೆ. ಇದೀಗ ಈ ವಿಡಿಯೋವನ್ನು ಸಾವಿರಾರು ಜನ ವೀಕ್ಷಿಸಿದ್ದು, ಮೆಚ್ಚುಗೆಯನ್ನೂ ವ್ಯಕ್ತಪಡಿಸಿದ್ದಾರೆ
ಟಿವಿ, ಪುಸ್ತಕ ನೋಡಿ ಮಗಳು ಯೋಗ ಕಲಿತಿದ್ದಾಳೆ. ಶಾಲೆಯಲ್ಲಿ ಪ್ರತಿ ಶನಿವಾರ ಶಾರೀರಿಕ ವ್ಯಾಯಾಮ ಮಾಡಿಸುತ್ತಿದ್ದರು. ಈಗ ಲಾಕ್ಡೌನ್ ಸಮಯದಲ್ಲಿ ಟಿವಿ ನೋಡುತ್ತ ಯೋಗ ಮಾಡುತ್ತಿದ್ದಳು. ಇದನ್ನು ನೋಡಿ ನನ್ನ ಪತ್ನಿ (ಬಾಲಕಿಯ ತಾಯಿ) ವಿಡಿಯೋ ಮಾಡಿ ನನಗೆ ಕಳುಹಿಸಿದ್ದಳು. ಈ ವಿಡಿಯೋವನ್ನು ಏ.10ರಂದು ನನ್ನ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದೆ. ಜತೆಗೆ ಪ್ರಧಾನಿ ನರೇಂದ್ರ ಮೋದಿ, ಬಾಲಿವುಡ್ ನಟ ಅಕ್ಷಯ ಕುಮಾರ್ ಇನ್ನಿತರರಿಗೆ ಟ್ಯಾಗ್ ಮಾಡಿದ್ದೆ. ಇದನ್ನು ಏ.15ರಂದು ಗಮನಿಸಿರುವ ಪ್ರಧಾನಿ ಅವರು ರಿಟ್ವೀಟ್ ಮಾಡಿದ್ದಾರೆ’ ಎಂದು ಇಮ್ತಿಯಾಜ್ ಮುಲ್ಲಾ ವಿಜಯವಾಣಿಗೆ ತಿಳಿಸಿದ್ದಾರೆ.
ಮಗಳ ಯೋಗಾಭ್ಯಾಸದ ವಿಡಿಯೋವನ್ನು ದೇಶದ ಪ್ರಧಾನಿಯವರು ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿರುವುದು ನಮ್ಮ ಪಾಲಿಗೆ ಹೆಮ್ಮೆಯ ವಿಷಯ. ಇದು ಅವಳಿಗೆ ತುಂಬಾ ಪ್ರೇರಣೆ ನೀಡಲಿದೆ ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ.
ಇಮ್ತಿಯಾಜ್ ಮುಲ್ಲಾ ಹುಬ್ಬಳ್ಳಿಯಲ್ಲಿ ನೈಋತ್ಯ ರೈಲ್ವೆ ಪ್ರಧಾನ ಮುಖ್ಯ ವೈದ್ಯಕೀಯ ನಿರ್ದೇಶಕರ ಕಚೇರಿಯಲ್ಲಿ ಅಧೀಕ್ಷಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.
ಕರೊನಾ ವೈರಸ್ ಪತ್ತೆ ಮಾಡುವ ಡೋರ್ಬೆಲ್ ಸಂವೇದಕ ಯಂತ್ರ ಶೋಧಿಸಿದ 16ರ ಬಾಲಕ