ಹೆಚ್ಚಿನ ಬೆವರಿನಿಂದ ಬಳಲುತ್ತಿದ್ದೇನೆ. ನನಗೆ ಮಧುಮೇಹ, ರಕ್ತದೊತ್ತಡ ಇಲ್ಲ. ದೇಹದ ಬೆವರಿನ ಸಮಸ್ಯೆಯನ್ನು ನಿಯಂತ್ರಿಸಲು ಯಾವ ಯೋಗ ಮತ್ತು ಮುದ್ರೆ ಮಾಡಬೇಕು?
| ವಿಶ್ವನಾಥ 50 ವರ್ಷ
ಹಾರ್ಮೋನುಗಳ ವ್ಯತ್ಯಾಸ, ಆತಂಕದ ಸಂಯೋಜನೆ ಇರುವ ಅನೇಕ ಜೀವನ ಸಂದರ್ಭಗಳಲ್ಲಿ ಸಂಭವಿಸಬಹುದು. ಕೆಲವೊಮ್ಮೆ ಯಾವುದೇ ಕಾರಣವಿಲ್ಲದೆ ಅತಿಯಾದ ಬೆವರು ಇರುತ್ತದೆ. ಅತಿಯಾದ ಬೆವರುವಿಕೆಯನ್ನು ಕಡಿಮೆ ಮಾಡಲು ಯೋಗ ಮತ್ತು ಮುದ್ರೆಗಳು ಸಹಕಾರಿಯಾಗುತ್ತವೆ. ಆತಂಕಕ್ಕೊಳಗಾದಾಗ ಭಯ, ಉದ್ವಿಗ್ನತೆಯ ಅನುಭವವಾಗಿ ಬೆವರುತ್ತದೆ. ಆತಂಕ, ಇನ್ನಿತರ ಸಮಸ್ಯೆಗಳ ನಿಯಂತ್ರಣಕ್ಕೆ ಪ್ರಾಣಾಯಾಮ (ನಾಡೀಶುದ್ಧಿ) ಹಾಗೂ ಬೆಳಗ್ಗೆ ಮತ್ತು ಸಂಜೆ ಉಸಿರನ್ನು ಗಮನಿಸುವ ಹತ್ತು ನಿಮಿಷದ ಧ್ಯಾನ ಮಾಡಿ. ಬೆವರಿನ ಸಮಸ್ಯೆ ಸಾಮಾನ್ಯ ವಿಷಯ. ಚಿಂತೆ ಬಿಡಿ, ಚರ್ಮದ ಮೂಲಕ ವಿಷವನ್ನು ತೆಗೆದುಹಾಕಲು ಯೋಗ ಸಹಾಯ ಮಾಡುತ್ತದೆ. ದಿನಕ್ಕೆ ಮೂರು ನಾಲ್ಕು ಬಾರಿ ಶವಾಸನ ಮಾಡಿ. ಬೆವರುವುದು ನೈಸರ್ಗಿಕ ವಿದ್ಯಮಾನ. ಅತಿಯಾಗಿ ಬೆವರುತ್ತಿದ್ದರೆ ಆದರೆ ದೇಹದ ವ್ಯವಸ್ಥೆಯನ್ನು ಮರು ಸಮತೋಲನಗೊಳಿಸುವ ಯೋಗ ಸಹಕಾರಿಯಾಗುತ್ತದೆ.
ಸೂಚಿತ ಆಸನಗಳು: ಸುಖಾಸನ, ಉತ್ತಾನಾಸನ, ಬದ್ಧಕೋಣಾಸನ, ಪಶ್ಚಿಮೋತ್ಥಾನಾಸನ, ಶಶಾಂಕಾಸನ,
ಅರ್ಧ ಉಷ್ಟ್ರಾಸನ, ವಿಪರೀತಕರಣೀ, ಹಲಾಸನ, ಅಧೋಮುಖ ಶ್ವಾನಾಸನ, ಮಕರಾಸನ, ಶವಾಸನ
ಮುದ್ರೆಗಳು: ಇಪ್ಪತ್ತು ನಿಮಿಷ ಜಲೋದರನಾಶಕ ಮುದ್ರೆ, ಹತ್ತು ನಿಮಿಷ ಪ್ರಾಣಮುದ್ರೆ, ಹತ್ತು ನಿಮಿಷ ಹಾಕಿನಿ ಮುದ್ರೆ ಮಾಡಿ.
ಇದನ್ನೂ ಓದಿ ಕರೊನಾ ಸೋಂಕಿತರ ಸಂಖ್ಯೆ: ಆರೋಗ್ಯ ಇಲಾಖೆ ಎಡವಟ್ಟು
ವಿಶ್ರಾಂತಿದಾಯಕ ಶವಾಸನದ ಪ್ರಯೋಜನವನ್ನು ತಿಳಿಸಿ.
| ಕಾರ್ತಿಕೇಯ 29 ವರ್ಷ, ಮಧುರೈ
ಶವಾಸನ ಡೆತ್ ಪೋಸ್ ಎಂದು ಕರೆಯಲ್ಪಡುತ್ತದೆ. ನೋಡಲು ಅಥವಾ ನಿರ್ವಹಿಸಲು ಸುಲಭವಾದ ಭಂಗಿಯಂತೆ ಕಂಡರೂ ಹೆಚ್ಚು ಕಷ್ಟಕರವೆಂದು ಪರಿಗಣಿಸಲಾಗಿದೆ. ಶವದ ಹಾಗೆ ಅಲುಗಾಡದೆ ಇರುವ ಭಂಗಿಯಾಗಿದೆ. ಇದರಲ್ಲಿ ದೈಹಿಕ, ಮಾನಸಿಕ ಮತ್ತು ಆಧ್ಯಾತ್ಮಿಕ ಪ್ರಯೋಜನಗಳಿವೆ. ಯೋಗಾಭ್ಯಾಸದ ಕೊನೆಯಲ್ಲಿ ಕಡ್ಡಾಯವಾಗಿ ಶವಾಸನವನ್ನು ಮಾಡಲಾಗುತ್ತದೆ. ಕಾಲಿನ ಹೆಬ್ಬೆರಳಿನಿಂದ ತಲೆಯ ನೆತ್ತಿಯವರೆಗೆ ದೇಹದ ಎಲ್ಲ ಭಾಗಗಳನ್ನು ಹಂತಹಂತವಾಗಿ ಸಡಿಲಗೊಳಿಸುತ್ತ ಬನ್ನಿ. ಆಗ ಪೂರ್ತಿ ಶಾಂತಸ್ಥಿತಿಯ ಅನುಭವವಾಗುತ್ತದೆ. ಮನಸ್ಸಿನ ಗಮನವನ್ನು ಸಮ ಉಸಿರಾಟದಲ್ಲಿರಿಸಿ. ಮನಸ್ಸಿನಲ್ಲಿ ಯಾವ ಆಲೋಚನೆಗಳು ಬಾರದಂತೆ ನೋಡಿಕೊಳ್ಳಿ.
ಈ ವಿಶ್ರಾಂತ ಸ್ಥಿತಿಯಲ್ಲಿ ಸುಮಾರು ಎಂಟರಿಂದ ಹತ್ತು ನಿಮಿಷಗಳ ಕಾಲ ವಿಶ್ರಮಿಸಿ.
ಪ್ರಯೋಜನ: ಮಿದುಳನ್ನು ಶಾಂತಗೊಳಿಸುತ್ತದೆ. ಒತ್ತಡ ಮತ್ತು ಸೌಮ್ಯ ಖಿನ್ನತೆಯನ್ನು ನಿವಾರಿಸಲು ಸಹಾಯ ಮಾಡುತ್ತದೆ. ದೇಹಕ್ಕೆ ವಿಶ್ರಾಂತಿ ನೀಡುತ್ತದೆ. ತಲೆನೋವು, ಆಯಾಸ ಮತ್ತು ನಿದ್ರಾಹೀನತೆಯನ್ನು ಕಡಿಮೆ ಮಾಡುತ್ತದೆ. ರಕ್ತದೊತ್ತಡವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಈ ಭಂಗಿಯು ಆಳವಾದ ವಿಶ್ರಾಂತಿ ಸ್ಥಿತಿಯನ್ನು ತರಲು ಸಹಾಯ ಮಾಡುತ್ತದೆ. ಇದು ಒತ್ತಡ ಮತ್ತು ಸ್ನಾಯುಗಳ ಒತ್ತಡವನ್ನು ಬಿಡುಗಡೆ ಮಾಡಲು ಸಹಾಯ ಮಾಡುತ್ತದೆ. ಶಕ್ತಿಯುತ ಅಭ್ಯಾಸದ ನಂತರ ಇದು ದೇಹದ ಉಷ್ಣತೆಯನ್ನು ಮರುಹೊಂದಿಸಲು, ಕೇಂದ್ರ ನರಮಂಡಲವನ್ನು ಶಾಂತಗೊಳಿಸಲು ಮತ್ತು ಉಸಿರಾಟವನ್ನು ಸಾಮಾನ್ಯ ಸ್ಥಿತಿಗೆ ತರಲು ಸಹಾಯ ಮಾಡುತ್ತದೆ.
ವಿಶ್ವ ಆರೋಗ್ಯ ಸಂಸ್ಥೆ ಬೇಡ ಎಂದರೂ ಭಾರತದಲ್ಲಿ ಎಚ್‌ಸಿಕ್ಯೂ ಬಳಕೆ ಮುಂದುವರಿಕೆ