ಹೈದರಾಬಾದ್: ಸರ್ವಿಸ್ ರೈಫಲ್ನಿಂದ ಅಕಸ್ಮಾತ್ ಆಗಿ ಹಾರಿದ ಗುಂಡು ಪೊಲೀಸ್ ಕಾನ್ಸ್ಟೆಬಲ್ ಒಬ್ಬರನ್ನು ಬಲಿ ಪಡೆದುಕೊಂಡಿದೆ. ಅಚಾನಕ್ ಆಗಿ ಚಿಮ್ಮಿದ ಗುಂಡಿನಿಂದಾಗಿ ಕರ್ತವ್ಯದಲ್ಲಿದ್ದ 31 ವರ್ಷದ ಪೇದೆ ಮೃತಪಟ್ಟಿದ್ದಾರೆ.
ಹೈದರಾಬಾದ್ನ ರಾಣಿಗುಂಜ್ ಪ್ರದೇಶದ ಸರ್ಕಾರಿ ಸ್ವಾಮ್ಯದ ಬ್ಯಾಂಕ್ ಇದ್ದ ಕಟ್ಟಡದಲ್ಲಿ ಭದ್ರತೆಗಾಗಿ ಈ ಪೊಲೀಸ್ ನಿಯೋಜನೆಗೊಂಡಿದ್ದು, ಬೆಳಗ್ಗೆ ಏಳು ಗಂಟೆ ಸುಮಾರಿಗೆ ಈ ಅವಘಡ ನಡೆದಿದೆ.
ಸ್ಪೆಷಲ್ ಪ್ರೊಟೆಕ್ಷನ್ ಫೋರ್ಸ್ನಲ್ಲಿದ್ದ ಇವರು, ಸೆಲ್ಫ್ ಲೋಡಿಂಗ್ ರೈಫಲ್ (ಎಸ್ಎಲ್ಆರ್) ಹೊಂದಿದ್ದು, ಅದರಿಂದ ಚಿಮ್ಮಿದ ಗುಂಡು ಇವರ ಕೆನ್ನೆಯ ಮೂಲಕ ಹಾದುಹೋಗಿದ್ದು, ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಅಲ್ಲೇ ಭದ್ರತೆಗೆ ನಿಯೋಜನೆ ಆಗಿದ್ದ ಇತರ ಮೂವರು ಪೊಲೀಸರು ಗುಂಡಿನ ಶಬ್ದ ಕೇಳಿ ತಕ್ಷಣ ಸ್ಥಳಕ್ಕೆ ಧಾವಿಸಿದ್ದರು. ಅಷ್ಟರಲ್ಲಿ ಪೊಲೀಸ್ ಮೃತಪಟ್ಟಿದ್ದು, ಪ್ರಕರಣ ದಾಖಲಾಗಿದೆ. (ಏಜೆನ್ಸೀಸ್)