ನವದೆಹಲಿ: ಗೂಗಲ್ ಪ್ಲೇ ಸ್ಟೋರ್ನಲ್ಲಿ ಇಲ್ಲ ಎಂದಿದ್ದ ಪೇಟಿಎಂ ಇದೀಗ ಕೆಲವೇ ಗಂಟೆಗಳಲ್ಲಿ ಮರಳಿದೆ. “ಅಪ್ಡೇಟ್: ಆ್ಯಂಡ್ ವೀ ಆರ್ ಬ್ಯಾಕ್” ಎನ್ನುತ್ತ ಪ್ಲೇ ಸ್ಟೋರ್ಗೆ ಪೇಟಿಎಂ ಆ್ಯಪ್ ವಾಪಸ್ ಬಂದಿದ್ದು, ಹಲವರು ನಿಟ್ಟುಸಿರು ಬಿಟ್ಟಿದ್ದಾರೆ.
ಕೆಲವೇ ಗಂಟೆಗಳ ಹಿಂದೆ ಪೇಟಿಎಂ ಆ್ಯಪ್ಅನ್ನು ಗೂಗಲ್ ಪ್ಲೇಸ್ಟೋರ್ನಿಂದ ತೆಗೆಯಲಾಗಿತ್ತು. ಅದನ್ನು ಸ್ವತಃ ಪೇಟಿಎಂ ಹೇಳಿಕೊಂಡಿತ್ತು. “ಪೇಟಿಎಂ ಆ್ಯಂಡ್ರಾಯ್ಡ್ ಆ್ಯಪ್ ಗೂಗಲ್ ಪ್ಲೇ ಸ್ಟೋರ್ನಲ್ಲಿ ತಾತ್ಕಾಲಿಕವಾಗಿ ಲಭ್ಯವಿರದ್ದರಿಂದ ಡೌನ್ಲೋಡ್ ಅಥವಾ ಅಪ್ಡೇಟ್ ಸಾಧ್ಯವಿಲ್ಲ. ಆದರೆ, ನಿಮ್ಮ ಎಲ್ಲ ಹಣವೂ ಸುರಕ್ಷಿತವಾಗಿರಲಿದೆ, ನಾವು ಶೀಘ್ರದಲ್ಲೇ ವಾಪಸ್ ಬರಲಿದ್ದೇವೆ” ಎಂದು ಕಂಪನಿ ಟ್ವೀಟ್ ಮಾಡಿತ್ತು. ಇದಾದ ಸುಮಾರು ನಾಲ್ಕು ಗಂಟೆಗಳಲ್ಲಿ ಪೇಟಿಎಂ ಗೂಗಲ್ ಪ್ಲೇ ಸ್ಟೋರ್ಗೆ ಮರಳಿದೆ.
Update: And we're back! 🥳
— Paytm (@Paytm) September 18, 2020
“ಆ್ಯಪ್ ಮೂಲಕ ಪೇಟಿಎಂ ಜೂಜಿಗೆ ಉತ್ತೇಜನ ನೀಡುತ್ತದೆ. ಆದ್ದರಿಂದ ಅದರ ಮೇಲೆ ನಿಷೇಧ ಹೇರಲಾಗಿದೆ. ಜೂಜು ಕಟ್ಟುವ ಯಾವುದೇ ಆ್ಯಪ್ ಅಥವಾ ಗೇಮ್ಗಳನ್ನು ಪ್ಲೇಸ್ಟೋರ್ನಲ್ಲಿ ನಾವು ಇರಿಸಿಕೊಳ್ಳುವುದಿಲ್ಲ. ಈ ಬಗ್ಗೆ ಪೇಟಿಎಂ ಆ್ಯಪ್ ಡೆವಲಪರ್ಗಳಿಗೂ ತಿಳಿಸಲಾಗಿದೆ” ಎಂದು ಗೂಗಲ್ ಸ್ಪಷ್ಟನೆ ನೀಡಿತ್ತು. ಆದರೆ ಈ ನಾಲ್ಕೈದು ಗಂಟೆಗಳಲ್ಲಿ ಗೂಗಲ್ ಹಾಗೂ ಪೇಟಿಎಂ ಮಧ್ಯೆ ನಡೆದ ಒಪ್ಪಂದ ಏನು? ಯಾವ ಷರತ್ತಿನ ಮೇಲೆ ಪೇಟಿಎಂ ಆ್ಯಪ್ಗೆ ಮತ್ತೆ ಪ್ಲೇಸ್ಟೋರ್ನಲ್ಲಿ ಅವಕಾಶ ನೀಡಲಾಗಿದೆ ಎಂಬುದು ಸದ್ಯಕ್ಕೆ ಬಹಿರಂಗಗೊಂಡಿಲ್ಲ. (ಏಜೆನ್ಸೀಸ್)