ಮುಂಬೈ: ಬಾಲಿವುಡ್ ನಿರ್ದೇಶಕ ಅನುರಾಗ್ ಕಶ್ಯಪ್ ವಿರುದ್ಧ ಅತ್ಯಾಚಾರದ ದೂರನ್ನು ಮುಂಬೈ ಪೊಲೀಸರಿಗೆ ನೀಡಿದ್ದ ನಟಿ ಪಾಯಲ್ ಘೋಶ್, ದೂರು ಕೊಟ್ಟು ಇಷ್ಟು ದಿನವಾದರೂ ಅನುರಾಗ್ ಕಶ್ಯಪ್ ಅವರನ್ನು ಯಾಕೆ ವಿಚಾರಣೆ ಮಾಡಿಲ್ಲ ಎಂದು ಪೊಲೀಸರನ್ನು ಪ್ರಶ್ನಿಸಿದ್ದಾರೆ.
ಇದನ್ನೂ ಓದಿ: ಎಸ್ಪಿಬಿ ಹಾಡಿದ ಕೊನೆಯ ಹಾಡು ಯಾವ ಹೀರೋಗೆ? ನೀವೇ ನೋಡಿ …
ತನ್ನನ್ನು ಅನುರಾಗ್ ಕಶ್ಯಪ್ 2013ರಲ್ಲಿ ಬಹಳ ಕೆಟ್ಟದಾಗಿ ನಡೆಸಿಕೊಂಡಿದ್ದರು ಎಂದು ಪಾಯಲ್, ಅನುರಾಗ್ ವಿರುದ್ಧ ಇತ್ತೀಚೆಗೆ ವರ್ಸೋವಾ ಪೊಲೀಸ್ ಸ್ಟೇಶನ್ನಲ್ಲಿ ದೂರು ದಾಖಲಿಸಿದ್ದರು. ಅಷ್ಟೇ ಅಲ್ಲದೆ, ಡ್ರಗ್ಸ್ ಆಕ್ಟ್ನಡಿ ಅನುರಾಗ್ ಕಶ್ಯಪ್ ವಿರುದ್ಧ ಪಾಯಲ್ ಇನ್ನೊಂದು ಕೇಸನ್ನು ದಾಖಲಿಸಿದ್ದರು. ಆದರೆ, ವರ್ಸೋವಾ ಪೊಲೀಸರು ಇನ್ನೂ ಅನುರಾಗ್ ಅವರನ್ನು ಕರೆದು ವಿಚಾರಣೆ ಮಾಡಿಲ್ಲವಂತೆ.
ಈ ಕುರಿತು ಮಾತನಾಡಿರುವ ಪಾಯಲ್, ‘ಅನುರಾಗ್ ವಿರುದ್ಧ ನಾನು ದೂರು ಕೊಟ್ಟು ಒಂದು ವಾರವಾಯಿತು. ಪೊಲೀಸರು ನನ್ನನ್ನು ಸಾಕಷ್ಟು ಬಾರಿ ಠಾಣೆಗೆ ಅಲೆದಾಡಿಸಿದ್ದಾರೆ. ಪರೀಕ್ಷೆಗೆಂದು ಆಸ್ಪತ್ರೆಗೇ ಮೂರು ದಿನ ಕರೆಸಿಕೊಂಡಿದ್ದಾರೆ. ಆದರೆ, ಆರೋಪಿ ಅನುರಾಗ್ ಅವರನ್ನು ಒಮ್ಮೆಯೂ ಕರೆಸಿಲ್ಲ. ನಾನು ಬೀದಿಬೀದಿ ಸುತ್ತುತ್ತಿದ್ದರೆ, ಅನುರಾಗ್ ಮಜವಾಗಿ ಓಡಾಡಿಕೊಂಡಿದ್ದಾನೆ’ ಎಂದು ಪಾಯಲ್ ಹೇಳಿದ್ದಾರೆ.
ಇದನ್ನೂ ಓದಿ: ಕಾರಾವಾನ್ನಲ್ಲಿ ಕುಳಿತು ಡ್ರಗ್ಸ್ ತೆಗೆದುಕೊಳ್ಳುತ್ತಿದ್ದರಂತೆ ಸುಶಾಂತ್
ಇನ್ನು ಪಾಯಲ್ ವಕೀಲರು ಸಹ ವರ್ಸೋವಾ ಪೊಲೀಸರ ಕಾರ್ಯವೈಖರಿಯ ಬಗ್ಗೆ ಗರಂ ಆಗಿ ಮಾತನಾಡಿದ್ದಾರೆ. ‘ದೂರು ಕೊಟ್ಟು ಇಷ್ಟು ದಿನವಾದರೂ ಅನುರಾಗ್ ಕಶ್ಯಪ್ ಅವರನ್ನು ಕರೆದು ಪೊಲೀಸರು ವಿಚಾರಣೆ ಮಾಡಿಲ್ಲ. ಆದರೆ, ಪಾಯಲ್ ಅವರನ್ನು ಪ್ರತಿದಿನ ಕರೆದು ವಿಚಾರಣೆ ನಡೆಸುತ್ತಿದ್ದಾರೆ. ಈಗಾಗಲೇ ಪಾಯಲ್, ಅನುರಾಗ್ ತಮ್ಮ ಮೇಲೆ ದಾಳಿ ನಡೆಸಿದ ಜಾಗವನ್ನು ತೋರಿಸಿದ್ದಾರೆ. ವೈದ್ಯಕೀಯ ಪರೀಕ್ಷೆಗಳಲ್ಲಿ ಪಾಲ್ಗೊಂಡಿದ್ದಾರೆ. ಆದರೆ, ಪೊಲೀಸರು ಅನುರಾಗ್ ಅವರನ್ನು ಒಂದೇ ಒಂದು ದಿನಕ್ಕೂ ಠಾಣೆಗೆ ಕರೆಸಿ ಏನಾಗಿದೆ ಎಂದು ಕೇಳಿಲ್ಲ’ ಎಂದು ಆರೋಪಿಸಿದ್ದಾರೆ.