ಬೆಂಗಳೂರು: ನಗರದ ಕೆಎಸ್ಆರ್ ಮತ್ತು ಯಶವಂತಪುರ ರೈಲು ನಿಲ್ದಾಣಗಳಿಂದ ಹುಬ್ಬಳ್ಳಿ, ಶಿವಮೊಗ್ಗ, ಚಿಕ್ಕಮಗಳೂರು ಸೇರಿ ಹಲವು ಸ್ಥಳಗಳಿಗೆ ತೆರಳುವ ಪ್ಯಾಸೆಂಜರ್ ರೈಲುಗಳನ್ನು ಎಕ್ಸ್ಪ್ರೆಸ್ ರೈಲುಗಳನ್ನಾಗಿ ಪರಿವರ್ತಿಸಲು ನೈಋತ್ಯ ರೈಲ್ವೆ ನಿರ್ಧರಿಸಿದೆ. ಇದರಿಂದಾಗಿ ಈ ಎಲ್ಲ ರೈಲುಗಳ ಪ್ರಯಾಣದರಗಳು ಭಾರಿ ಏರಿಕೆಯಾಗುವುದು ನಿಶ್ಚಿತವಾಗಿದೆ.
200 ಕಿ.ಮೀ.ಗಿಂತ ಹೆಚ್ಚಿನ ಅಂತರ ಕ್ರಮಿಸುವ ಪ್ಯಾಸೆಂಜರ್ ರೈಲುಗಳಿಗೆ ಈ ನಿರ್ಧಾರ ಅನ್ವಯವಾಗಲಿದೆ. ರೈಲುಗಳ ವೇಗವನ್ನು ಹೆಚ್ಚಿಸುವ ಜತೆಗೆ ಆರ್ಥಿಕವಾಗಿ ಹೆಚ್ಚು ಲಾಭ ತರದ ನಿಲ್ದಾಣಗಳಲ್ಲಿನ ನಿಲುಗಡೆಗಳನ್ನು ರದ್ದುಗೊಳಿಸುವಂತೆ ರೈಲ್ವೆ ನಿಗಮ ನೀಡಿದ ಸೂಚನೆಯ ಅನ್ವಯ ಈ ನಿರ್ಧಾರ ಕೈಗೊಂಡಿರುವುದಾಗಿ ನೈಋತ್ಯ ರೈಲ್ವೆ ತಿಳಿಸಿದೆ.
ಬೆಂಗಳೂರಿನಿಂದ ಶಿವಮೊಗ್ಗ, ಚಿಕ್ಕಮಗಳೂರು, ಚಿತ್ರದುರ್ಗ ಮತ್ತು ಹಬ್ಬಳ್ಳಿಗೆ ಮೆಮು ಮತ್ತು ಡೆಮು ರೈಲುಗಳ ಸೇರಿ ಒಟ್ಟು 38 ಪ್ಯಾಸೆಂಜರ್ ರೈಲುಗಳು ಸಂಚರಿಸುತ್ತವೆ. ಈ ಎಲ್ಲ ರೈಲುಗಳು ಈಗ ಪ್ರಮುಖ ನಿಲ್ದಾಣಗಳಲ್ಲಿ ಮಾತ್ರವೇ ನಿಲುಗಡೆ ನೀಡಲಿವೆ.
ಇದನ್ನೂ ಓದಿ: ಹೆಬ್ಬೆಟ್ ಮಂಜನಿಂದ ಹೆಣವಾಗಬೇಕಿದ್ದ ಕೊರಂಗು ಪಾರಾಗಿದ್ದೇ ರೋಚಕ!
ಪ್ಯಾಸೆಂಜರ್ ರೈಲುಗಳ ಪ್ರಯಾಣಕ್ಕೆ ಕನಿಷ್ಠ 10 ರೂ. ಶುಲ್ಕವಿದೆ. ಆದರೆ, ಈ ರೈಲುಗಳು ಎಕ್ಸ್ಪ್ರೆಸ್ ರೈಲುಗಳಾಗಿ ಪರಿವರ್ತನೆಗೊಂಡ ಬಳಿಕ ಕನಿಷ್ಠ ಪ್ರಯಾಣ ದರ 30 ರೂ.ಗೆ ಹೆಚ್ಚಳವಾಗಲಿದೆ. ಇದರಿಂದ ದೂರಪ್ರಯಾಣಕ್ಕೆ ಪ್ಯಾಸೆಂಜರ್ ರೈಲುಗಳನ್ನು ಅವಲಂಬಿಸಿದ್ದ ದಿನಗೂಲಿ ನೌಕರರು, ಕೆಳಮಧ್ಯಮವರ್ಗದ ಜನರು ಒಂದಕ್ಕೆ ಮೂರುಪಟ್ಟು ಹೆಚ್ಚು ಪ್ರಯಾಣ ಶುಲ್ಕ ಪಾವತಿಸಬೇಕಾದ ಅನಿವಾರ್ಯತೆಗೆ ಸಿಲುಕಿಕೊಂಡಿದ್ದಾರೆ. ಆದ್ದರಿಂದ, ಅಂಥವರಿಗಾಗಿ ಪರ್ಯಾಯ ಸೇವೆಗಳನ್ನು ಒದಗಿಸುವಂತೆ ಒತ್ತಾಯಗಳು ಕೇಳಿಬರಲಾರಂಭಿಸಿವೆ.
ಟಿಕೆಟ್ಗಳು ಮಾರಾಟವಾಗುವ ಪ್ರಮಾಣವನ್ನು ಆಧರಿಸಿ ರೈಲ್ವೆ ಇಲಾಖೆ ಆಯಾ ನಿಲ್ದಾಣಗಳು ಲಾಭಕಾರಕವೋ, ನಷ್ಟಕಾರಕವೋ ಎಂದು ನಿರ್ಧರಿಸುತ್ತದೆ. ಆದರೆ, ಇಂಥ ನಿಲ್ದಾಣಗಳಿಗೆ ದೈನಂದಿನ ಪಾಸ್ಗಳನ್ನು ಪಡೆದುಕೊಂಡವರು ಪ್ರಯಾಣಿಸುತ್ತಾರೆ. ನಿಲ್ದಾಣದ ಲಾಭ-ನಷ್ಟಗಳ ಲೆಕ್ಕಾಚಾರದಲ್ಲಿ ಪಾಸ್ಗಳನ್ನು ಲೆಕ್ಕಕ್ಕೆ ತೆಗೆದುಕೊಳ್ಳುವುದಿಲ್ಲ. ಆದ್ದರಿಂದ, 200 ಕಿ.ಮೀ. ಬದಲು 400 ಕಿ.ಮೀ.ವರೆಗಿನ ಅಂತರ ಕ್ರಮಿಸುವ ಪ್ಯಾಸೆಂಜರ್ ರೈಲುಗಳನ್ನು ಎಕ್ಸ್ಪ್ರೆಸ್ ರೈಲುಗಳನ್ನಾಗಿ ಪರಿವರ್ತಿಸಬೇಕು. ಇದರಿಂದ ಸಹಸ್ರಾರು ಜನರಿಗೆ ಅನುಕೂಲವಾಗುತ್ತದೆ ಎಂಬ ಒತ್ತಾಯವೂ ಕೇಳಿಬಂದಿದೆ.
ಎಕ್ಸ್ಪ್ರೆಸ್ ರೈಲುಗಳಾಗಿ ಪರಿವರ್ತನೆಗೊಳ್ಳಲಿರುವ ಪ್ಯಾಸೆಂಜರ್ ರೈಲುಗಳು
ಯಶವಂತಪುರ-ಚಿಕ್ಕಮಗಳೂರು-ಯಶವಂತರಪುರ (56278/56277 ), ಸೇಲಂ-ಯಶವಂತಪುರ-ಸೇಲಂ (56241/56242), ಕೆಎಸ್ಆರ್ ಬೆಂಗಳೂರು-ಶಿವಮೊಗ್ಗ-ಕೆಎಸ್ಆರ್ ಬೆಂಗಳೂರು (56227/56228), ಕೆಎಸ್ಆರ್ ಬೆಂಗಳೂರು-ಶಿವಮೊಗ್ಗ-ಕೆಎಸ್ಆರ್ ಬೆಂಗಳೂರು (56917/56918), ಮೈಸೂರು-ಯಶವಂತಪುರ_ಮೈಸೂರು (56216/56215), ಯಶವಂತಪುರ-ಚಿತ್ರದುರ್ಗ-ಯಶವಂತಪುರ (56519/56520), ಕೆಎಸ್ಆರ್ ಬೆಂಗಳೂರು-ಹುಬ್ಬಳ್ಳಿ-ಕೆಎಸ್ಆರ್ ಬೆಂಗಳೂರು (56516/56515), ಕೆಎಸ್ಆರ್ ಬೆಂಗಳೂರು-ಹುಬ್ಬಳ್ಳಿ-ಕೆಎಸ್ಆರ್ ಬೆಂಗಳೂರು (56911/56912), ಹುಬ್ಬಳ್ಳಿ-ಕೆಎಸ್ಆರ್ ಬೆಂಗಳೂರು-ಹುಬ್ಬಳ್ಳಿ (56914/56913), ಕೆಎಸ್ಆರ್ ಬೆಂಗಳೂರು-ಹುಬ್ಬಳ್ಳಿ-ಕೆಎಸ್ಆರ್ ಬೆಂಗಳೂರು (56515/56516), ಕೆಎಸ್ಆರ್ ಬೆಂಗಳೂರು-ಹೊಸಪೇಟೆ-ಕೆಎಸ್ಆರ್ ಬೆಂಗಳೂರು (56909/56910), ಕೆಎಸ್ಆರ್ ಬೆಂಗಳೂರು-ಕರೈಕಲ್-ಕೆಎಸ್ಆರ್ ಬೆಂಗಳೂರು (56514/56513) ಮತ್ತು ಯಶವಂತಪುರ-ವಿಜಯವಾಡ-ಯಶವಂತಪುರ (56503/56504)