ಬೆಂಗಳೂರು: ಆರ್‌ಸಿಬಿ ತಂಡ ಐಪಿಎಲ್‌ನಿಂದ ಹೊರಬಿದ್ದಿರುವ ನಡುವೆಯೂ ವೇಗಿ ಹರ್ಷಲ್ ಪಟೇಲ್ ಈ ಬಾರಿ ಪರ್ಪಲ್ ಕ್ಯಾಪ್ ಸಂಪಾದಿಸುವುದು ಬಹುತೇಕ ಖಚಿತವೆನಿಸಿದೆ. ಹರ್ಷಲ್ ಟೂರ್ನಿಯಲ್ಲಿ ಸರ್ವಾಧಿಕ 32 ವಿಕೆಟ್ ಕಬಳಿಸಿದ್ದರೆ, 2ನೇ ಸ್ಥಾನದಲ್ಲಿರುವ ಡೆಲ್ಲಿ ವೇಗಿ ಆವೇಶ್ ಖಾನ್ 23 ವಿಕೆಟ್ ಗಳಿಸಿದ್ದಾರೆ. 9 ವಿಕೆಟ್ ಹಿನ್ನಡೆಯಲ್ಲಿರುವ ಅವರು, ಹರ್ಷಲ್‌ರನ್ನು ಹಿಂದಿಕ್ಕುವುದು ಅನುಮಾನವೆನಿಸಿದೆ. ಆದರೆ ಟೂರ್ನಿಯ ಸರ್ವಾಧಿಕ ರನ್ ಗಳಿಸಿದ ಬ್ಯಾಟರ್‌ಗೆ ನೀಡಲಾಗುವ ಆರೆಂಜ್ ಕ್ಯಾಪ್ ಈ ಬಾರಿ ಯಾರಿಗೆ ಒಲಿಯಲಿದೆ ಎಂಬುದು ಕುತೂಹಲ ಮೂಡಿಸಿದೆ.
ಪಂಜಾಬ್ ಕಿಂಗ್ಸ್ ನಾಯಕ ಕೆಎಲ್ ರಾಹುಲ್ ಸದ್ಯಕ್ಕೆ 626 ರನ್‌ಗಳೊಂದಿಗೆ ಆರೆಂಜ್ ಕ್ಯಾಪ್ ಒಡೆಯರಾಗಿದ್ದಾರೆ. ಆದರೆ ರಾಹುಲ್ ಈಗಾಗಲೆ ಟೂರ್ನಿಯಿಂದ ಹೊರಬಿದ್ದಿದ್ದರೆ, ಅವರಿಗೆ ಸಿಎಸ್‌ಕೆ ತಂಡದ ಋತುರಾಜ್ ಗಾಯಕ್ವಾಡ್ (603) ಮತ್ತು ಫಾಫ್ ಡು ಪ್ಲೆಸಿಸ್ (547) ನಿಕಟ ಪೈಪೋಟಿ ಒಡ್ಡುತ್ತಿದ್ದಾರೆ. ಡೆಲ್ಲಿ ತಂಡದ ಶಿಖರ್ ಧವನ್ (551) ಕೂಡ ರೇಸ್‌ನಲ್ಲಿದ್ದಾರೆ. ಫೈನಲ್‌ನಲ್ಲಿ ಋತುರಾಜ್ 24 ಮತ್ತು ಪ್ಲೆಸಿಸ್ 80 ರನ್ ಗಳಿಸಿದರೆ ರಾಹುಲ್‌ರನ್ನು ಹಿಂದಿಕ್ಕುವ ಅವಕಾಶ ಹೊಂದಿದ್ದಾರೆ.
ಡೆಲ್ಲಿ ತಂಡ ಫೈನಲ್‌ಗೇರಿದರೆ ಧವನ್‌ಗೆ ಟೂರ್ನಿಯಲ್ಲಿ ಇನ್ನೂ 2 ಪಂದ್ಯ ಆಡುವ ಅವಕಾಶ ಲಭಿಸಲಿದ್ದು, 76 ರನ್ ಗಳಿಸಿದರೆ ಅವರೂ ರಾಹುಲ್‌ರನ್ನು ಹಿಂದಿಕ್ಕಲಿದ್ದಾರೆ. ಹೀಗಾಗಿ ರಾಹುಲ್ ಬಳಿಯೇ ಆರೆಂಜ್ ಕ್ಯಾಪ್ ಉಳಿಯುವುದೇ ಅಥವಾ ಈ ಮೂವರ ಪೈಕಿ ಯಾರಾದರೂ ಒಲಿಸಿಕೊಳ್ಳುವರೇ ಎಂಬುದು ಕುತೂಹಲ ಮೂಡಿಸಿದೆ.