ನವದೆಹಲಿ: ದಯಾ ಅರ್ಜಿ ಜತೆ 170 ಪುಟಗಳ ವೈಯಕ್ತಿಕ ಡೈರಿಯನ್ನು ಲಗ್ಗತ್ತಿಸಿ ಶೀಘ್ರವೇ ರಾಷ್ಟ್ರಪತಿಗೆ ಹಸ್ತಾಂತರಿಸುವಂತೆ ತಿಹಾರ್ ಜೈಲು ಅಧಿಕಾರಿಗಳಿಗೆ ಸೂಚನೆ ನೀಡಬೇಕು ಎಂದು ಕೋರಿ ನಿರ್ಭಯಾ ಅತ್ಯಾಚಾರ ಪ್ರಕರಣದ ಅಪರಾಧಿ ವಿನಯ್ ಶರ್ಮಾ ದೆಹಲಿ ಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದಾನೆ.
ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಅವರಿಗೆ ಸಲ್ಲಿಸಿರುವ ದಯಾ ಅರ್ಜಿಯನ್ನು ಇನ್ನೂ ಅಧಿಕಾರಿಗಳು ಹಸ್ತಾಂತರಿಸಿಲ್ಲ. ಅಲ್ಲದೆ ಆ ಅರ್ಜಿಯೊಂದಿಗೆ ನಾನು ಬರೆದಿರುವ ಡೈರಿಯನ್ನು ಲಗ್ಗತ್ತಿಸುವಂತೆ ಅಧಿಕಾರಿಗಳಿಗೆ ಆದೇಶ ನೀಡಬೇಕು ಎಂದು ಆತ ಅರ್ಜಿಯಲ್ಲಿ ಕೋರಿದ್ದಾನೆ.
ನಿರ್ಭಯಾ ಅತ್ಯಾಚಾರಿಗಳಿಗೆ ಫೆಬ್ರವರಿ 1ರಂದು ನೇಣಿಗೇರಿಸಲು ಸಿದ್ಧತೆ ನಡೆಯುತ್ತಿರುವಾಗಲೇ ಅಪರಾಧಿ ವಿನಯ್ ಶರ್ಮಾ ರಾಷ್ಟ್ರಪತಿಗೆ ದಯಾ ಅರ್ಜಿ ಸಲ್ಲಿಸಿದ್ದಾನೆ.
ಮತ್ತೊಬ್ಬ ಅಪರಾಧಿ ಮುಖೇಶ್ ಸಿಂಗ್ ರಾಷ್ಟ್ರಪತಿಗಳಿಗೆ ದಯಾ ಅರ್ಜಿ ಸಲ್ಲಿಸಿದ್ದ. ಕೇವಲ 4 ದಿನಗಳಲ್ಲೇ ರಾಷ್ಟ್ರಪತಿಗಳು ಅರ್ಜಿಯನ್ನು ತಿರಸ್ಕರಿಸಿದ್ದರು. ಆತನ ನಂತರ ಈಗ ವಿನಯ್ ಶರ್ಮಾ ದಯಾ ಅರ್ಜಿ ಸಲ್ಲಿಸುತ್ತಿದ್ದಾನೆ.
ವಿನಯ್ ಶರ್ಮಾ ಪರವಾಗಿ ವಕೀಲ ಎಪಿ ಸಿಂಗ್ ಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದಾರೆ. ಜ.22ರಂದು ವಿನಯ್ ಶರ್ಮಾ ದಯಾ ಅರ್ಜಿ ಜತೆ 170 ಪುಟಗಳ ವೈಯಕ್ತಿ ಡೈರಿಯನ್ನು ಲಗ್ಗತ್ತಿಸಬೇಕು ಎಂದು ಕೋರಿದ್ದ. ಆತನ ಮನವಿಯನ್ನು ನಾನು ಜೈಲು ಅಧಿಕಾರಿಗಳಿಗೆ ತಿಳಿಸಿದ್ದೆ. ಆದರೆ ಜೈಲು ಅಧಿಕಾರಿಗಳು ಇನ್ನು ಡೈರಿಯೊಂದಿಗೆ ದಯಾ ಅರ್ಜಿ ಹಸ್ತಾಂತರಿಸಿಲ್ಲ ಎಂದು ಅವರು ಕೋರ್ಟ್ ಗಮನಕ್ಕೆ ತಂದರು.
ವಿನಯ್ ಶರ್ಮಾನ ವೈದ್ಯಕೀಯ ದಾಖಲೆಗಳು, ಸೆರೆಯಲ್ಲಿರುವ ದಾಖಲೆ, ಜೈಲಿನಲ್ಲಿದ್ದ ವೇಳೆ ಕೆಲಸ ಮಾಡಿ ಗಳಿಸಿದ ಹಣ, ತಿಹಾರ್ ಒಲಂಪಿಕ್ಸ್ ಹಾಗೂ ಚಿತ್ರಕಲೆ ಸ್ಪರ್ಧೆಯಲ್ಲಿ ಆತ ಪಾಲ್ಗೊಂಡಿದ್ದ ದಾಖಲೆಗಳು ಕೂಡ ಇವೆ.
ಸಾಮೂಹಿಕ ಅತ್ಯಾಚಾರ ಸಾಬೀತಾಗಿ ಪವನ್ (25) ವಿನಯ್ ಶರ್ಮಾ (26), ಮುಖೇಶ್ ಕುಮಾರ್ (32) ಮತ್ತು ಅಕ್ಷಯ್ ಕುಮಾರ್ ಸಿಂಗ್ (31) ಎಂಬ ನಾಲ್ವರು ಅಪರಾಧಿಗಳಿಗೆ ಕೋರ್ಟ್ ಮರಣ ದಂಡನೆ ಶಿಕ್ಷೆ ವಿಧಿಸಿದೆ. (ಏಜೆನ್ಸೀಸ್)