ಬೆಂಗಳೂರು: ರಾಜ್ಯ ರಾಜಕಾರಣದಲ್ಲಿ ಸ್ಟಿಂಗ್ ಆಪರೇಷನ್ ಮೂಲಕ ಭಾರಿ ಸಂಚಲನ ಮೂಡಿಸಿರುವ ಕೇಂದ್ರ ಸಚಿವ ಎಚ್.ಡಿ. ಕುಮಾರಸ್ವಾಮಿ ಅವರ ನಡೆಗೆ ಇದೀಗ ಜಲಸಂಪನ್ಮೂಲ ಸಚಿವ ಚಲುವರಾಯಸ್ವಾಮಿ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಕುಮಾರಸ್ವಾಮಿ ಅವರನ್ನು ಒಮ್ಮೆ ವೈದ್ಯರ ಬಳಿ ಚೆಕ್ಅಪ್ ಮಾಡಿಸಬೇಕು. ಯಾಕಂದ್ರೆ ಅವರು ಎಷ್ಟು ನಿದ್ದೆ ಮಾಡುತ್ತಾರೆ ಮಾಡ್ತಿದ್ದಾರೆ ಅಂತ ಗೊತ್ತಾಗುತ್ತದೆ. ಈ ರಾಜ್ಯದಲ್ಲಿರುವ ಸಮಸ್ಯೆಗಳ ಬಗ್ಗೆ ಏನು ಮಾತಾಡದ ಕುಮಾರಸ್ವಾಮಿ, ಸ್ಟಿಂಗ್, ಅದು ಇದು, ಇದು ಅದು ಅಂತಿದ್ದಾರೆ. ಇವೆಲ್ಲ ನಮ್ಮ ಜನಕ್ಕೆ ಬೇಕಾ? ಇದರ ಬಗ್ಗೆ ಏನಾದರೂ ಇದ್ದರೆ ತನಿಖೆ ನಡೆಯುತ್ತದೆ ಮತ್ತು ತಪ್ಪಿತಸ್ತರು ಕ್ರಮ ಆಗುತ್ತೆ. ಅಕಸ್ಮಾತ್ ಏನಾದ್ರೂ ಸಚಿವರ ಮೇಲಿದ್ದರೆ ಮಾಧ್ಯದಲ್ಲಿ ಬಂದೇ ಬರುತ್ತೆ ಅಲ್ವಾ ಎಂದರು.
ನಮ್ಮ ಪವರ್ ಎಷ್ಟಿದೆ, ಅಷ್ಟನ್ನು ನಮ್ಮ ಸರ್ಕಾರ ಮಾಡುತ್ತಿದೆ. ಈ ವರ್ಷ ಎಂಥ ಬರಗಾಲದ ಪರಿಸ್ಥಿತಿ ಇದೆ. ಕುಡಿಯೋಕೆ ನೀರಿನ ಸಮಸ್ಯೆ, ಜನರ ಬದುಕಿನ ಸಮಸ್ಯೆ ಇದೆ. ಇದರ ಬಗ್ಗೆ ಮಾತನಾಡುತ್ತಿಲ್ಲ ಇವರು. ಅಭಿವೃದ್ಧಿ ಆಗುತ್ತಿಲ್ಲವೇ?ಯಾವುದಾದರೂ ಕುಂಠಿತ ಆದ್ರೆ, ಯಾವ ಯಾವ ಇಲಾಖೆಯಲ್ಲಿ ಏನು ಸಮಸ್ಯೆಯಿದೆ ಎಂಬುದರ ಬಗ್ಗೆಯೂ ವಿಚಾರಣೆ ಮಾಡಬೇಕು. ಹಿಂದೆ ಅಸೆಂಬ್ಲಿ ಕರೆದರೂ ಅದೂ ನಡೆಯಲಿಲ್ಲ. ಎರಡನೇ ಬಾರಿ ನಡೆದಾಗ ಎರಡು ದಿನ ಏನೋ ಕಷ್ಟಪಟ್ಟು ಜನ ಬೈತಾರಲ್ಲ ಅಂತ ಹೇಳಿ ವಿಜಯೇಂದ್ರ, ಅಶೋಕ ಅಸೆಂಬ್ಲಿಯಲ್ಲಿ ಕುಳಿತಿದ್ದರು ಎಂದರು.
ಪಾಪ ಅಲ್ಲೂ ಇಲ್ಲ, ಇಲ್ಲೂ ಇಲ್ಲ
ಜನತಾ ದಳದಿಂದ ಇಲ್ಲಿಂದ ಅಲ್ಲಿಗೆ ಅಲ್ಲಿಂದ ಇಲ್ಲಿಗೆ ಹಾರುತ್ತಾರೆ. ಅವರಿಗೆ ಎಲ್ಲರೂ ಒಂದು ಕಡೆ ಪವರ್ ಬೇಕು. ಹೋದರೆ, ಅಲ್ಲೂನು ಇಲ್ಲ, ಇಲ್ಲೂನು ಇಲ್ಲ ಅನ್ನೋ ಹಂಗಾಗಿದೆ. ಸ್ಟಿಂಗ್ ಆಪರೇಷನ್ ಬಗ್ಗೆ ಬಂದ್ರೆ ಸರ್ಕಾರ ಕಣ್ಣು ಮುಚ್ಕೊಂಡು ಕೂತ್ಕೊಳ್ಳೋಕೆ ಆಗಲ್ಲ. ಯಾರದಾದರೂ ಇದ್ರೆ ಎನ್‌ಕ್ವೈರಿ ಮಾಡಿಸುತ್ತೇವೆ. ಆದರೆ, ಕುಮಾರಸ್ವಾಮಿಯವರ ತರ ಅನಾವಶ್ಯಕವಾಗಿ ಮಾತನಾಡಲ್ಲ. ಪ್ರಜ್ವಲ್ ರೇವಣ್ಣ ಬಗ್ಗೆ ಮೊನ್ನೆ ಮಾತಾಡಿದರು. ಅವನು ಪಾಪ ಅಂತ ಹೇಳಿದರು. ಆದರೆ, ಆ ಹೆಣ್ಣು ಮಕ್ಕಳು ಏನು ಹಾಗಾದ್ರೆ, ಹೆಣ್ಣುಮಕ್ಕಳಿಗೆ ಅನ್ಯಾಯ ಆಗಿದೆಯಲ್ಲ. ಅದು ಪಾಪ ಅಂತೆ. ಪಾಪದ ಹುಡುಗ ಅಂತೆ ಅವನು ಎಂದು ಕಿಡಿಕಾರಿದರು.
ಇವರಿಗೆ ಅವನ ಬಗ್ಗೆ ಸಹಾನುಭೂತಿ ಇದೆ. ಆದರೆ, ಆ ಹೆಣ್ಣುಮಕ್ಕಳ ಬಗ್ಗೆ ಸಹಾನುಭೂತಿ ಇಲ್ಲ. ಇದರ ಬಗ್ಗೆ ಕಂಪ್ಲೇಂಟ್ ಕೊಡಲಿ, ಕಂಪ್ಲೇಂಟ್ ಮಾಡಲಿ. ಅದು ಬಿಟ್ಟುಬಿಟ್ಟು ಏನು ಮಾತಾಡ್ತಾರೆ ರೀ? ಹಾಸನದಲ್ಲಿ ನಡೆದಿರುವ ವಿಚಾರವನ್ನು ನಾವು ಎತ್ತಬಾರದು. ಇವರು ಯಾಕೆ ಮತ್ತೆ ಮತ್ತೆ ಅದನ್ನೇ ಎತ್ತುತ್ತಾರೆ. ನಾವು ಅದು ಅಸಭ್ಯ ಅಂತ ಹೇಳಿ ಬಿಟ್ಟುಬಿಟ್ಟಿದ್ದೀವಿ. ಆದರೆ, ಇವರೇ ಅದನ್ನು ಎತ್ತುಕೊಂಡು ಅದು ಪಾಪದ ಹುಡುಗ, ಅವನಿಗೆ ಪೆನ್ ಡ್ರೈವ್ ಹಂಚಿ ಅನ್ಯಾಯ ಮಾಡಿಬಿಟ್ರು ಅಂತಾರೆ ಎಂದರು.
ಸಿಬಿಐಗೆ ಹಸ್ತಾಂತರಿಸುವ ವಿಚಾರ
ಕೊಡಲಿ ಬಿಡಿ ತನಿಖೆ ಮಾಡಿಸಲಿ. ಈಗ ನಮಗಿಂತ ದೊಡ್ಡ ಸರ್ಕಾರ ಅವರದ್ದೇ ಇರೋದು ಅಲ್ವಾ? ಎಂದರು. ಇನ್ನು ಕ್ಯಾಬಿನೆಟ್ ವಿಚಾರಕ್ಕೆ ಪ್ರತಿಕ್ರಿಯಿಸಿದ ಅವರು, ನಾಳೆ ಕ್ಯಾಬಿನೆಟ್ ಇದೆ. ಚರ್ಚೆ ಏನಾಗುತ್ತೆ ನೋಡೋಣ. ಸಿಎಂ ಅವರು ಅಥವಾ ಎಲ್ಲಾ ಮಂತ್ರಿಗಳು ಸೇರಿ ಏನು ತೀರ್ಮಾನ ತಗೋತಾರೆ ನೋಡೋಣ. ನಾನು ಇವತ್ತು ಕ್ಯಾಬಿನೆಟ್ ವಿಚಾರವನ್ನು ಅಡ್ವಾನ್ಸ್ ಆಗಿ ಮಾತನಾಡಲು ಸಾಧ್ಯವಿಲ್ಲ. ತನಿಖೆ ಅವಶ್ಯಕತೆ ಇಲ್ಲ ಅಂತ ಅನಿಸುತ್ತೆ. ಅವಶ್ಯಕತೆ ಇಲ್ಲದಿದ್ದರೆ ಮುಖ್ಯಮಂತ್ರಿಗಳು ನಿರ್ಧಾರ ಕೈಗೊಳ್ಳುತ್ತಾರೆ ಎಂದು ಹೇಳಿದರು.
ಸಂಸದ ಶ್ರೇಯಸ್ ಪಟೇಲ್ ತಿರುಗೇಟು
ನನ್ನ ವಿರುದ್ಧ ವೈಯಕ್ತಿಕ ತೇಜೋವಧೆ ಮಾಡುತ್ತಿದ್ದಾರೆ. ಎರಡು ವರ್ಷದಿಂದ ಆರೋಪ ಮಾಡುತ್ತಿದ್ದಾರೆ. ಅವರ ಕುಟುಂಬದಲ್ಲೇ ಸಮಸ್ಯೆ ಇಟ್ಟುಕೊಂಡು ನಮ್ಮ ಮೇಲೆ ಆರೋಪಿಸುತ್ತಿದ್ದಾರೆ. ನಾನು ಪ್ರಮಾಣ ಮಾಡಲು ಸಿದ್ಧ. ಅವರು ನಂಬುವ ಲಕ್ಷ್ಮೀ ರಂಗನಾಥ ಸ್ವಾಮಿ ದೇವಸ್ಥಾನಕ್ಕೆ ಬರುತ್ತೇನೆ. ಅವರು ಕೊಡುವ ದಿನಾಂಕ ಸಮಯಕ್ಕೆ ನಾನು ಬಂದು ಪ್ರಮಾಣ ಮಾಡುತ್ತೇನೆ. ಅವರೂ ಪ್ರಮಾಣ ಮಾಡಲಿ, ಒಕ್ಕಲಿಗರು ಅಂದರೆ ಅವರು ಮಾತ್ರ ಅಧಿಕಾರದಲ್ಲಿ ಇರಬೇಕಾ? ನಾನು ಒಕ್ಕಲಿಗ ಅಲ್ವ, ಸಿಎಂ ಒಕ್ಕಲಿಗ ಅಲ್ವ?ಅನ್ಯಾಯ ಆದ ಮಹಿಳೆಯರಿಗೆ ಯಾರು ನ್ಯಾಯ ಕೊಡ್ತಾರಾ ಎಂದು ಪ್ರಶ್ನಿಸಿದ್ದಾರೆ.
