ಶನಿವಾರ ಮಂದಿರ್ ಮಾರ್ಗ್‌ನ ವಿಶೇಷ ಕಾರ್ಯನಿರ್ವಾಹಕ ಮ್ಯಾಜಿಸ್ಟ್ರೇಟ್ ಮುಂದೆ ಹಾಜರುಪಡಿಸಿದ ನಂತರ, ಅಭಿಜಿತ್ ದಿಪ್ಕೆ ಅವರಿಗೆ 50,000 ರೂಪಾಯಿಗಳ ಬಾಂಡ್ ಹಾಗೂ ಶಾಂತಿ ಕದಡುವುದಿಲ್ಲ ಎಂಬ ಮುಚ್ಚಳಿಕೆಯ ಮೇಲೆ ಬಿಡುಗಡೆ ಭಾಗ್ಯ ಸಿಕ್ಕಿತು. ವಿಚಾರಣೆ ಮುಗಿದ ಕೂಡಲೇ ದೀಪ್ಕೆ ಅವರು ಮಂದಿರ್ ಮಾರ್ಗ್ ಪೊಲೀಸ್ ಠಾಣೆಯಿಂದ ಹೊರಬಂದರು. ತಮ್ಮ ಬಿಡುಗಡೆ ಬೆನ್ನಲ್ಲೇ ಎಕ್ಸ್ ಖಾತೆಯಲ್ಲಿ ಪೋಸ್ಟ್ ಮಾಡಿರುವ ದೀಪ್ಕೆ, ನನ್ನ ಸಹೋದರರು ಬಂಧನಮುಕ್ತರಾಗುವುದನ್ನು ಕಾಯುತ್ತಿದ್ದೇನೆ ಎಂದು ಫೋಟೋ ಹಂಚಿಕೊಂಡು ಭಾವನಾತ್ಮಕ ಸಂದೇಶ ಬರೆದುಕೊಂಡಿದ್ದಾರೆ.
ಅಂದಹಾಗೆ, ಅಭಿಜಿತ್ ದಿಪ್ಕೆ ಬಂಧನದಿಂದ ಬಿಡುಗಡೆಯಾಗಲು ಪ್ರಮುಖ ಕಾರಣವೇನೆಂದರೆ, ಅವರು ನಿಗದಿತ ಪ್ರತಿಭಟನಾ ಸ್ಥಳ ತಲುಪಲೇ ಇಲ್ಲ ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ. ಆದರೆ, ಇದಕ್ಕೆ ವಿರುದ್ಧವಾಗಿ ಸೌರಭ್ ದಾಸ್ ಮತ್ತು ಅಶುತೋಷ್ ರಂಕಾ ಅವರು ಪೊಲೀಸರ ಕಣ್ಣುತಪ್ಪಿಸಿ ರಹಸ್ಯವಾಗಿ ಜಂತರ್ ಮಂತರ್ ತಲುಪಿ, ಸಾರ್ವಜನಿಕ ಶಾಂತಿಭಂಗ ಮಾಡಲು ಯತ್ನಿಸಿದ್ದರು ಎಂದು ಅಧಿಕಾರಿಗಳು ಆರೋಪಿಸಿದ್ದಾರೆ. ಇದೇ ಕಾರಣಕ್ಕಾಗಿ ಅವರನ್ನು ಐದು ದಿನಗಳ ನ್ಯಾಯಾಂಗ ಬಂಧನಕ್ಕೆ ಒಳಪಡಿಸಲಾಗಿದ್ದು, ಅವರ ಮುಂದಿನ ಭವಿಷ್ಯದ ಬಗ್ಗೆ ಭಾನುವಾರ ನಿರ್ಧಾರ ಹೊರಬರುವ ಸಾಧ್ಯತೆಯಿದೆ.
ಈ ಎಲ್ಲಾ ಪ್ರಕರಣಗಳೂ ಭಾರತೀಯ ನಾಗರಿಕ ಸುರಕ್ಷಾ ಸಂಹಿತೆ (BNSS) ಯ ಒಂದೇ ರೀತಿಯ ಕಾನೂನು ಸೆಷನ್‌ಗಳ ಅಡಿಯಲ್ಲಿ ದಾಖಲಾಗಿವೆ. ಸೆಕ್ಷನ್ 170 ರ ಪ್ರಕಾರ ಸಂಭವನೀಯ ಅಪರಾಧ ತಡೆಯಲು ವ್ಯಕ್ತಿಯನ್ನು ವಶಕ್ಕೆ ಪಡೆಯಬಹುದು ಮತ್ತು ಸೆಕ್ಷನ್ 126 ರ ಅಡಿಯಲ್ಲಿ ಶಾಂತಿ ಕಾಪಾಡುವಂತೆ ಮುಚ್ಚಳಿಕೆ ಬರೆಸಿಕೊಳ್ಳಬಹುದು. ಇದು ಯಾವುದೇ ಗಂಭೀರ ಅಪರಾಧದಡಿ ಶಿಕ್ಷೆಗೆ ಗುರಿಪಡಿಸುವ ಪ್ರಕ್ರಿಯೆಯಲ್ಲ, ಬದಲಿಗೆ ಮುನ್ನೆಚ್ಚರಿಕೆ ಕ್ರಮವಾಗಿದೆ. ಆದರೆ ನಿಯಮ ಉಲ್ಲಂಘನೆ ಮತ್ತು ಪುನರಾವರ್ತಿತ ಪ್ರತಿಭಟನೆಗಳ ಹಿನ್ನೆಲೆಯಲ್ಲಿ ದಾಸ್ ಮತ್ತು ರಂಕಾ ಅವರಿಗೆ ಕಠಿಣ ನಿಲುವು ಎದುರಾಗಿದೆ.
ಪೊಲೀಸರ ಪ್ರಕಾರ, ಅಕ್ಟೋಬರ್ 13 ರಂದು ದಾಸ್, ರಂಕಾ ಮತ್ತು ಇತರೆ ಸಿಜೆಪಿ ಸದಸ್ಯರು ಖಾಸಗಿ ಆಸ್ತಿಯ ಮೂಲಕ ಜಂತರ್ ಮಂತರ್‌ಗೆ ನುಗ್ಗಿದ್ದರು. ದೆಹಲಿ ಪೊಲೀಸ್ ಕಮಿಷನರ್ ಜಂತರ್ ಮಂತರ್ ಅನ್ನು ಅಧಿಕೃತ ಪ್ರತಿಭಟನಾ ಸ್ಥಳಗಳ ಪಟ್ಟಿಯಿಂದ ತೆಗೆದುಹಾಕಿದ್ದರೂ, ಅದನ್ನು ಧಿಕ್ಕರಿಸಿ ಪ್ರತಿಭಟನೆ ನಡೆಸಲಾಗಿದೆ. ಅಲ್ಲದೆ, ಕರ್ತವ್ಯದಲ್ಲಿದ್ದ ಪೊಲೀಸ್ ಅಧಿಕಾರಿಗಳಿಗೆ ಅಡ್ಡಿಪಡಿಸಿದ ಆರೋಪವೂ ಇವರ ಮೇಲಿದೆ. ಈ ಹಿಂದೆ ಅಕ್ಟೋಬರ್ 10 ರಂದೇ ಇವರು ಶಾಂತಿ ಬಾಂಡ್‌ಗೆ ಸಹಿ ಹಾಕಿದ್ದರೂ, ಪುನಃ ನಿಯಮ ಉಲ್ಲಂಘಿಸಿರುವುದು ಜೈಲುಪಾಲಾಗುವುದಕ್ಕೆ ಪ್ರಮುಖ ಕಾರಣವಾಗಿದೆ.
