ನವದೆಹಲಿ: ಅಮೆರಿಕಾದ ವಿರೋಧದ ನಡುವೆಯೂ ರಷ್ಯಾದೊಂದಿಗೆ ಭಾರತ ಹೊಂದಿರುವ ಬಾಂಧವ್ಯವನ್ನು ವಿದೇಶಾಂಗ ಸಚಿವ ಎಸ್. ಜೈಶಂಕರ್ (S Jaishankar) ಬಲವಾಗಿ ಸಮರ್ಥಿಸಿಕೊಂಡಿದ್ದು, ಭಾರತದ ಭದ್ರತೆ ಮತ್ತು ಪ್ರಾದೇಶಿಕ ಸಮಗ್ರತೆಗೆ ಬೆದರಿಕೆ ಎದುರಾದಾಗ ಮಾಸ್ಕೋ ಯಾವಾಗಲೂ ದೇಶದ ಬೆಂಬಲಕ್ಕೆ ನಿಂತಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ನವದೆಹಲಿಯಲ್ಲಿ ನಡೆದ ಮ್ಯೂನಿಚ್ ಭದ್ರತಾ ಸಮ್ಮೇಳನದಲ್ಲಿ ಮಾತನಾಡಿದ ಜೈಶಂಕರ್, ಉಭಯ ದೇಶಗಳು ಐತಿಹಾಸಿಕವಾಗಿ ಉತ್ತಮ ಸಂಬಂಧವನ್ನು ಹೊಂದಿದ್ದು, ಆ ಅನುಭವವೇ ಇಂದಿಗೂ ತಮ್ಮ ಬಾಂಧವ್ಯವನ್ನು ರೂಪಿಸುತ್ತ ಮುಂದುವರಿಯುತ್ತಿದೆ ಎಂದರು.
ಜನರು ಒಳ್ಳೆಯ ಇತಿಹಾಸವನ್ನಾಗಲಿ ಅಥವಾ ಕೆಟ್ಟ ಇತಿಹಾಸವನ್ನಾಗಲಿ ಮರೆಯುವುದಿಲ್ಲ, 1950ರ ದಶಕದಿಂದಲೂ, ವಿಶೇಷವಾಗಿ ವಿಶ್ವದ ಬಹುಪಾಲು ದೇಶಗಳು ಪಾಕಿಸ್ತಾನದ ಸೇನಾ ಆಡಳಿತವನ್ನು ಬೆಂಬಲಿಸಿದಾಗ ರಷ್ಯಾ ಮತ್ತು ಸೋವಿಯತ್ ಒಕ್ಕೂಟ ನೀಡಿದ ಬೆಂಬಲವನ್ನು ಅವರು ಈ ವೇಳೆ ಸ್ಮರಿಸಿಕೊಂಡರು.
ಇದನ್ನೂ ಓದಿ:ಸ್ವಯಂ ಆಯ್ಕೆಯ ಮೂಲಕವೇ ಅಮೆರಿಕಾ ಒಂಟಿ!...ಜಾಗತಿಕ ರಾಜಕಾರಣದ ಬಗ್ಗೆ ಮಹತ್ವದ ಹೇಳಿಕೆ ನೀಡಿದ ವಿದೇಶಾಂಗ ಸಚಿವ ಜೈಶಂಕರ್! | S Jaishankar
ಪಾಕ್ ಬೆಂಬಲಿಸಿದ್ದ ಅಮೆರಿಕಾ!
ಪಾಕಿಸ್ತಾನದೊಂದಿಗೆ 1971ರ ಯುದ್ಧ ನಡೆದಾಗ ಪಾಕಿಸ್ತಾನವನ್ನು ಬೆಂಬಲಿಸಲು ಅಮೆರಿಕಾ ಬಂಗಾಳ ಕೊಲ್ಲಿಗೆ ನೌಕಾಪಡೆಯನ್ನು ಕಳುಹಿಸಿತ್ತು, ಆ ಸಂದರ್ಭದಲ್ಲಿ ಸೋವಿಯತ್ ಒಕ್ಕೂಟ ಭಾರತಕ್ಕೆ ನೀಡಿದ ಬೆಂಬಲವನ್ನು ಈ ಮಾತುಗಳು ಸೂಚಿಸುತ್ತವೆ. ರಷ್ಯಾದೊಂದಿಗಿನ ಭಾರತದ ಸ್ವಂತ ಅನುಭವದ ಕುರಿತು ಮಾತನಾಡುತ್ತಾ, ಮಾಸ್ಕೋದೊಂದಿಗೆ ಭಾರತದ ಸಂಬಂಧವನ್ನು ಪಾಶ್ಚಿಮಾತ್ಯ ದೇಶಗಳು ಪ್ರಶ್ನಿಸುತ್ತಿರುವುದಕ್ಕೆ ಪರೋಕ್ಷವಾಗಿ ತಿರುಗೇಟು ನೀಡಿದ ಜೈಶಂಕರ್, ಪ್ರತಿ ದೇಶವು ತನ್ನದೇ ಆದ ಅನುಭವದ ಮೂಲಕ ಸಂಬಂಧಗಳನ್ನು ಅಳೆಯುತ್ತದೆ ಎಂದರು.
ಯುರೋಪ್ ದೇಶಗಳು ರಷ್ಯಾದ ಕುರಿತು ಭಾರತದ ದೃಷ್ಟಿಕೋನವನ್ನು ಅಳವಡಿಸಿಕೊಳ್ಳುತ್ತದೆ ಎಂದು ನಿರೀಕ್ಷಿಸಲು ಸಾಧ್ಯವಿಲ್ಲದಂತೆಯೇ, ದೇಶದ ನಿರ್ಧಾರಗಳು ಮಾಸ್ಕೋದೊಂದಿಗಿನ ಅದರ ಸ್ವಂತ ಇತಿಹಾಸವನ್ನು ಪ್ರತಿಬಿಂಬಿಸುತ್ತವೆ ಎಂದು ಅವರು ವಾದಿಸಿದರು. ಭಾರತದ ಅನುಭವವು ಸದ್ಯ ಸಕಾರಾತ್ಮಕವಾಗಿದ್ದು, ಅದು ನಿರಂತರವಾಗಿ ಮುಂದುವರೆಯಲಿದೆ. ಮಿಲಿಟರಿ ಮತ್ತು ಪರಮಾಣು ಸಹಕಾರದ ಜೊತೆಗೆ ವ್ಯಾಪಾರ, ಇಂಧನ ಮತ್ತು ಸಂಪನ್ಮೂಲಗಳು ಪ್ರಮುಖ ಪಾತ್ರ ವಹಿಸುವುದರೊಂದಿಗೆ 1970 ಮತ್ತು 1980ರ ದಶಕದಿಂದಲೂ ಈ ಪಾಲುದಾರಿಕೆ ವಿಕಸನಗೊಂಡಿದೆ ಎಂದು ಜೈಶಂಕರ್ ತಿಳಿಸಿದರು.
ಉಕ್ರೇನ್ ಯುದ್ಧದ ಸಮಯದಲ್ಲಿ ರಷ್ಯಾದಿಂದ ತೈಲ ಖರೀದಿಸುತ್ತಿರುವುದನ್ನು ಮುಂದುವರಿಸಿರುವುದಕ್ಕೆ ಅಮೆರಿಕ ಮತ್ತು ಯುರೋಪ್ ದೇಶಗಳ ಟೀಕೆಗಳು ವ್ಯಕ್ತವಾಗುತ್ತಿರುವ ಹಿನ್ನೆಲೆಯಲ್ಲಿ ಅವರ ಈ ಹೇಳಿಕೆಗಳು ಬಂದಿವೆ. ಜಾಗತಿಕ ಮಾರುಕಟ್ಟೆಗಳನ್ನು ಸ್ಥಿರಗೊಳಿಸಲು ರಷ್ಯಾದಿಂದ ತೈಲವನ್ನು ಖರೀದಿಸುವಂತೆ ವಾಷಿಂಗ್ಟನ್ ಆರಂಭದಲ್ಲಿ ಭಾರತವನ್ನು ಉತ್ತೇಜಿಸಿತ್ತು ಎಂದು ತಿಳಿಸಿರುವ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ, ಈ ಟೀಕೆಗಳನ್ನು ಅನ್ಯಾಯ ಮತ್ತು ಅವಿವೇಕದ ನಿರ್ಧಾರ ಎಂದು ಕರೆದಿದೆ.
