ಸುಮಾರು ಒಂದು ವರ್ಷದ ಹಿಂದೆ ರೀನಾ ಮತ್ತು ರಾಮ್ ಸಾಗರ್ ಅವರ ಮೊದಲ ಭೇಟಿಯಾಯಿತು. ಮೊದಲ ಭೇಟಿಯಲ್ಲೇ ರಾಮ್ ಸಾಗರ್ ಅವರ ವ್ಯಕ್ತಿತ್ವಕ್ಕೆ ಮಾರುಹೋದ ರೀನಾ, ಅವರೊಂದಿಗೆ ಸ್ನೇಹ ಬೆಳೆಸಿದರು. ಕಾಲಕ್ರಮೇಣ ಇವರ ಈ ಸ್ನೇಹ ಪ್ರೇಮವಾಗಿ ಬದಲಾಗಿ, ಕೇವಲ ಆರು ದಿನಗಳ ಹಿಂದೆ ಇಬ್ಬರೂ ಅಧಿಕೃತವಾಗಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರೆ. ಇದರ ಫೋಟೋಗಳು ಮತ್ತು ವಿಡಿಯೋಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.
ಸಮಾಜದಲ್ಲಿ ತಮ್ಮ ಈ ಸಂಬಂಧದ ಬಗ್ಗೆ ಕೇಳಿಬರುತ್ತಿರುವ ಟೀಕೆಗಳಿಗೆ ತಲೆಕೆಡಿಸಿಕೊಳ್ಳದ ರೀನಾ, ತಮ್ಮ ನಿರ್ಧಾರದ ಬಗ್ಗೆ ಸ್ಪಷ್ಟನೆ ಕೂಡ ನೀಡಿದ್ದಾರೆ. ತಮಗೂ ರಾಮ್ ಸಾಗರ್ ನಡುವೆ ಇರುವ 45 ವರ್ಷಗಳ ವಯಸ್ಸಿನ ಅಂತರವು ತಮ್ಮ ಪ್ರೀತಿಗೆ ಅಥವಾ ಸಂಬಂಧಕ್ಕೆ ಎಂದಿಗೂ ಅಡ್ಡಿಯಾಗುವುದಿಲ್ಲ ಎಂದು ಹೇಳಿದ್ದಾರೆ. ತಮ್ಮ ಈ ಸ್ವಯಂಪ್ರೇರಿತ ನಿರ್ಧಾರದಿಂದ ತಮಗೆ ಸಂಪೂರ್ಣ ಖುಷಿಯಿದೆ ಎಂದು ರೀನಾ ಬಹಿರಂಗವಾಗಿ ಘೋಷಿಸಿದ್ದಾರೆ.
