ಎಂಥಾ ಅದೃಷ್ಟ? ಒಂದೇ ದಿನದಲ್ಲಿ ಮಿಲಿಯನೇರ್​ ಆದ ಸೂಪರ್‌ಮಾರ್ಕೆಟ್ ಓನರ್​, ಬೆಳಗ್ಗೆ ಎದ್ದ ಕೂಡಲೇ ಕಂಡಿದ್ದು 3,500 ಕೋಟಿ ರೂ.! Millionaire

ತಿರುವನಂತಪುರಂ : ಒಂದೇ ದಿನದಲ್ಲಿ ಕೋಟ್ಯಧಿಪತಿಯಾಗುವ ( Millionaire ) ಕನಸು ಯಾರಿಗೆ ತಾನೇ ಇರುವುದಿಲ್ಲ? ಆದರೆ ಅಂತಹ ಅದೃಷ್ಟ ಅನಿರೀಕ್ಷಿತವಾಗಿ ಒಲಿದುಬಂದಾಗ ಖುಷಿಯಾಗುವುದಕ್ಕಿಂತ ಆತಂಕವೇ ಹೆಚ್ಚಾಗುತ್ತದೆ ಎಂಬುದಕ್ಕೆ ಕೇರಳದ ಕೊಚ್ಚಿಯ ಈ ಘಟನೆಯೇ ಸಾಕ್ಷಿ. ತ್ರಿಪುಣಿತೂರಾದ ಸೂಪರ್‌ಮಾರ್ಕೆಟ್ ಮಾಲೀಕರೊಬ್ಬರ ಬ್ಯಾಂಕ್ ಖಾತೆಗೆ ಏಕಾಏಕಿ 3,500 ಕೋಟಿ ರೂ.ಗಳಿಗೂ ಅಧಿಕ ಹಣ ಜಮೆಯಾಗಿರುವ ಅಚ್ಚರಿಯ ಘಟನೆ ನಡೆದಿದ್ದು, ಕೇರಳ ರಾಜ್ಯದಲ್ಲಿ ಈ ಸುದ್ದಿ ಭಾರಿ ಸಂಚಲನ ಮೂಡಿಸಿದೆ.

ಕೇರಳದ ಕೊಚ್ಚಿ ಸಮೀಪದ ತ್ರಿಪುಣಿತೂರಾದಲ್ಲಿ 'ದರ್ಶನ್ ಸೂಪರ್‌ಮಾರ್ಕೆಟ್' ನಡೆಸುತ್ತಿರುವ ಸುಕೇಶ್ ಕುಮಾರ್ ಎಂದಿನಂತೆ ನಿನ್ನೆ ಬೆಳಗ್ಗೆ ತಮ್ಮ ಅಂಗಡಿಯ ಬ್ಯಾಂಕ್ ಖಾತೆಯ ಬ್ಯಾಲೆನ್ಸ್ ಪರಿಶೀಲಿಸಿದ್ದಾರೆ. ಈ ವೇಳೆ ಖಾತೆಯಲ್ಲಿದ್ದ ಹಣದ ಮೊತ್ತವನ್ನು ನೋಡಿ ಒಂದು ಕ್ಷಣ ದಂಗಾಗಿದ್ದಾರೆ. ಯಾವುದೇ ಮುನ್ಸೂಚನೆ ಇಲ್ಲದೆ ಒಟ್ಟು 3,500 ಕೋಟಿ ರೂಪಾಯಿಗಳಿಗೂ ಅಧಿಕ ಹಣ ಅವರ ಖಾತೆಗೆ ಜಮೆಯಾಗಿತ್ತು. ಕ್ಷಣಮಾತ್ರದಲ್ಲಿ ಕೋಟ್ಯಧಿಪತಿಯಾದೆ ಎಂಬ ಖುಷಿಗಿಂತಲೂ, ಇಷ್ಟು ದೊಡ್ಡ ಮೊತ್ತ ಎಲ್ಲಿಂದ ಬಂತು ಎಂಬ ಆತಂಕವೇ ಅವರನ್ನು ಹೆಚ್ಚು ಕಾಡಿತು.

ಖಾತೆಗೆ ಬಂದಿದ್ದ ಈ ಬೃಹತ್ ಮೊತ್ತವು ಖಾಸಗಿ ಬ್ಯಾಂಕ್‌ ಒಂದರ ಖಾತೆಯಾಗಿದೆ. ಅಂಗಡಿಯಲ್ಲಿ ನಡೆದ ಕಾರ್ಡ್ ಸ್ವೈಪಿಂಗ್ ಮೂಲಕ ತಲಾ 3.5 ಕೋಟಿಯಂತೆ ಎರಡು ಕಂತುಗಳಲ್ಲಿ ಒಟ್ಟು 7 ಕೋಟಿ ರೂ. ಜಮೆಯಾಗಿದೆ ಎಂದು ಮೊದಲು ಸಂದೇಶ ಬಂದಿತ್ತು. ಆದರೆ ಖಾತೆಯ ಒಟ್ಟು ಬಾಕಿ ಮೊತ್ತವನ್ನು ನೋಡಿದಾಗ ಕೋಟ್ಯಂತರ ರೂಪಾಯಿಗಳ ಬದಲು ನೇರವಾಗಿ 3,500 ಕೋಟಿ ರೂ. ತೋರಿಸುತ್ತಿರುವುದು ಕಂಡುಬಂದಿತು. ತಕ್ಷಣವೇ ಎಚ್ಚೆತ್ತುಕೊಂಡ ಸುಕೇಶ್ ಕುಮಾರ್, ಯಾವುದೇ ವಿಳಂಬವಿಲ್ಲದೆ ಕೂಡಲೇ ಬ್ಯಾಂಕ್ ಅಧಿಕಾರಿಗಳಿಗೆ ಈ ಕುರಿತು ಮಾಹಿತಿ ನೀಡಿದರು.

ಸುಕೇಶ್ ಕುಮಾರ್ ನೀಡಿದ ದೂರಿನ ಮೇರೆಗೆ ಎಚ್ಚೆತ್ತ ಬ್ಯಾಂಕ್ ಅಧಿಕಾರಿಗಳು ತಕ್ಷಣವೇ ಖಾತೆಯ ವಿವರಗಳನ್ನು ಪರಿಶೀಲಿಸಿ ತನಿಖೆ ನಡೆಸಿದರು. ಅಂತಿಮವಾಗಿ ಇದು ಯಾವುದೇ ಅಕ್ರಮ ಹಣ ವರ್ಗಾವಣೆ ಅಲ್ಲ, ಬದಲಿಗೆ ಬ್ಯಾಂಕಿಂಗ್ ವ್ಯವಸ್ಥೆಯಲ್ಲಿ ಉಂಟಾದ ತಾಂತ್ರಿಕ ದೋಷದಿಂದ ಸಂಭವಿಸಿದೆ ಎಂಬುದನ್ನು ಬ್ಯಾಂಕ್ ಅಧಿಕಾರಿಗಳು ಸ್ಪಷ್ಟಪಡಿಸಿದರು. ತಕ್ಷಣವೇ ಎಚ್ಚೆತ್ತುಕೊಂಡ ತಜ್ಞರು ಸಂಜೆಯೊಳಗೆ ತಾಂತ್ರಿಕ ದೋಷವನ್ನು ಸರಿಪಡಿಸಿ, ಖಾತೆಯಲ್ಲಿದ್ದ ಹೆಚ್ಚುವರಿ ಮೊತ್ತವನ್ನು ಸರಿಪಡಿಸುವ ಮೂಲಕ ಖಾತೆಯನ್ನು ಹಿಂದಿನ ಸಾಮಾನ್ಯ ಸ್ಥಿತಿಗೆ ತಂದರು.

ಕೇವಲ ಕೆಲವೇ ಗಂಟೆಗಳ ಕಾಲವಷ್ಟೇ ಕೋಟ್ಯಧಿಪತಿಯಾಗಿ ಅನುಭವ ಪಡೆದ ಸುಕೇಶ್ ಕುಮಾರ್, ತಮ್ಮ ಜೀವನದಲ್ಲಿ ಈ ರೀತಿಯ ರೋಚಕ ಹಾಗೂ ಅನಿರೀಕ್ಷಿತ ಅನುಭವವನ್ನು ಇದುವರೆಗೆ ಎದುರಿಸಿರಲಿಲ್ಲ ಎಂದು ಪ್ರತಿಕ್ರಿಯಿಸಿದ್ದಾರೆ. ಬೆಳಗ್ಗೆ ಎದ್ದು ಖಾತೆ ನೋಡಿದ ತಕ್ಷಣ ಕಣ್ಣುಗಳನ್ನೇ ನಂಬಲಾಗಲಿಲ್ಲ. ಇಷ್ಟು ದೊಡ್ಡ ಮೊತ್ತ ಖಾತೆಗೆ ಬಂದಾಗ ಸಂತೋಷಕ್ಕಿಂತ ಹೆಚ್ಚಾಗಿ ಕಾನೂನು ತೊಡಕುಗಳೇನು ಎಂಬ ಭಯವೇ ಆವರಿಸಿತ್ತು ಎಂದು ಅವರು ತಮ್ಮ ಅಚ್ಚರಿಯನ್ನು ಹಂಚಿಕೊಂಡಿದ್ದಾರೆ, (ಏಜೆನ್ಸೀಸ್​).