ಇಲ್ಲಿಯೇ ಕೃತಕ ಬುದ್ಧಿಮತ್ತೆ ವಿಜ್ಞಾನಿಗಳ ನೆರವಿಗೆ ಬಂದಿದೆ. ಲಕ್ಷಾಂತರ ಜೀನ್‌ಗಳ ಸಂಯೋಜನೆಯನ್ನು ವೇಗವಾಗಿ ಪರಿಶೀಲಿಸುವ ಮೂಲಕ ಯಾವ ಬದಲಾವಣೆಗಳು ಒಟ್ಟಿಗೆ ಕೆಲಸ ಮಾಡಬಹುದು ಎಂಬುದನ್ನು ಅಂದಾಜಿಸಲು ಎಐ ವ್ಯವಸ್ಥೆಗಳನ್ನು ಬಳಸಲಾಗುತ್ತಿದೆ. ಭ್ರೂಣದ ಬೆಳವಣಿಗೆಯಲ್ಲಿ ಅಪಾಯಕಾರಿ ಸಮಸ್ಯೆಗಳು ಎದುರಾಗದಂತೆ ಮುಂಚಿತವಾಗಿಯೇ ಸಾಧ್ಯತೆಗಳನ್ನು ಪರಿಶೀಲಿಸಲು ಇದು ಸಹಾಯ ಮಾಡಬಹುದು.
ಈ ಯೋಜನೆಯಲ್ಲಿ CRISPR (CRISPR-Cas9 ಎಂಬುದು ಜೀವಿಗಳ ಜೀನೋಮ್ ಅಥವಾ ಡಿಎನ್‌ಎ ) ಎಂಬ ಜೀನ್‌ ಎಡಿಟಿಂಗ್ ತಂತ್ರಜ್ಞಾನವನ್ನೂ ಬಳಸಲಾಗುತ್ತಿದೆ. ಈ ಹಿಂದೆ ಮ್ಯಾಮತ್‌ನಂತೆ ದಟ್ಟವಾದ ಕೂದಲು ಹೊಂದಿರುವ ವೂಲಿ ಮೌಸ್‌ಗಳನ್ನು ಅಭಿವೃದ್ಧಿಪಡಿಸುವ ಪ್ರಯೋಗಗಳನ್ನೂ ವಿಜ್ಞಾನಿಗಳು ನಡೆಸಿದ್ದಾರೆ. ಆದರೆ ಇಲ್ಲಿ ಒಂದು ಮುಖ್ಯ ವಿಷಯವಿದೆ. ವಿಜ್ಞಾನಿಗಳು ಸಾವಿರಾರು ವರ್ಷಗಳ ಹಿಂದೆ ಅಳಿದುಹೋದ ಮೂಲ ಮ್ಯಾಮತ್‌ನ ನಿಖರವಾದ ತದ್ರೂಪವನ್ನು ಸೃಷ್ಟಿಸಲು ಹೊರಟಿಲ್ಲ. ಬದಲಿಗೆ, ಚಳಿಯನ್ನು ಸಹಿಸಿಕೊಳ್ಳಬಲ್ಲ ಗುಣಗಳನ್ನು ಹೊಂದಿರುವ ಏಷ್ಯನ್ ಆನೆಯ ಆಧಾರಿತ ಹೊಸ ಜೀವಿಯನ್ನು ಅಭಿವೃದ್ಧಿಪಡಿಸುವುದು ಅವರ ಗುರಿಯಾಗಿದೆ.
ಇದು ಯಶಸ್ವಿಯಾದರೆ ಕೇವಲ ಮ್ಯಾಮತ್‌ನ್ನು ಮರಳಿ ತರುವ ಪ್ರಯೋಗವಾಗುವುದಿಲ್ಲ. ಹಿಮ ಪ್ರದೇಶಗಳ ಪರಿಸರ ವ್ಯವಸ್ಥೆಗೆ ಈ ಜೀವಿಗಳಿಂದ ಆಗಬಹುದಾದ ಬದಲಾವಣೆಗಳನ್ನೂ ಅಧ್ಯಯನ ಮಾಡಲು ಅವಕಾಶ ಸಿಗಬಹುದು. ಜೊತೆಗೆ, ಇದೇ ತಂತ್ರಜ್ಞಾನವನ್ನು ಅಳಿವಿನಂಚಿನಲ್ಲಿರುವ ಆನೆಗಳ ಸಂರಕ್ಷಣೆ ಮತ್ತು ವೈದ್ಯಕೀಯ ಸಂಶೋಧನೆಯಲ್ಲಿಯೂ ಬಳಸುವ ಸಾಧ್ಯತೆ ಇದೆ.
