ವಿದ್ಯಾರ್ಥಿಗಳ ಮನಸ್ಸಿನಲ್ಲಿ ಉಳಿಯುವ ಗುರುಗಳು
ಶಾಲೆ ಅಥವಾ ಕಾಲೇಜು ಮುಗಿದ ನಂತರ ಹಲವು ವರ್ಷಗಳು ಕಳೆದರೂ ಕೆಲವು ಶಿಕ್ಷಕರ ಮಾತುಗಳು ಮಾತ್ರ ಮನಸ್ಸಿನಲ್ಲಿ ಉಳಿದುಬಿಡುತ್ತವೆ. ಕಠಿಣ ಸಮಯದಲ್ಲಿ ಅವರು ನೀಡಿದ ಸಲಹೆ, ಪರೀಕ್ಷೆಯ ಮುನ್ನ ನೀಡಿದ ಧೈರ್ಯ, ತಪ್ಪು ಮಾಡಿದಾಗ ಹೇಳಿದ ಮಾತು ಅಥವಾ ಗೆಲುವಿನ ಸಂದರ್ಭದಲ್ಲಿ ನೀಡಿದ ಅಭಿನಂದನೆಗಳು ಜೀವನಪೂರ್ತಿ ನೆನಪಾಗುತ್ತವೆ. ಅದಕ್ಕಾಗಿಯೇ ಶಿಕ್ಷಕ-ವಿದ್ಯಾರ್ಥಿ ಸಂಬಂಧ ಕೇವಲ ತರಗತಿ ಕೊಠಡಿಗೆ ಸೀಮಿತವಾಗಿರುವುದಿಲ್ಲ. ಅದು ಜ್ಞಾನ, ನಂಬಿಕೆ ಮತ್ತು ಮಾರ್ಗದರ್ಶನದ ಸಂಬಂಧವಾಗಿದೆ.
ಈ ದಿನವನ್ನು ಹೇಗೆ ಆಚರಿಸಲಾಗುತ್ತದೆ?
ವಿಶ್ವ ಶಿಕ್ಷಕರ ದಿನದ ಅಂಗವಾಗಿ ಶಾಲಾ-ಕಾಲೇಜುಗಳಲ್ಲಿ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತದೆ. ವಿದ್ಯಾರ್ಥಿಗಳು ಶಿಕ್ಷಕರಿಗೆ ಶುಭಾಶಯ ಕೋರುತ್ತಾರೆ. ಸಾಂಸ್ಕೃತಿಕ ಕಾರ್ಯಕ್ರಮಗಳು, ಭಾಷಣ, ಚರ್ಚೆ, ಗೌರವ ಸಮಾರಂಭ ಸೇರಿದಂತೆ ಹಲವು ಕಾರ್ಯಕ್ರಮಗಳ ಮೂಲಕ ಶಿಕ್ಷಕರ ಸೇವೆಯನ್ನು ಸ್ಮರಿಸಲಾಗುತ್ತದೆ. ಆದರೆ ಶಿಕ್ಷಕರಿಗೆ ಗೌರವ ಸಲ್ಲಿಸಲು ದೊಡ್ಡ ಕಾರ್ಯಕ್ರಮವೇ ಬೇಕೆಂದಿಲ್ಲ. ನಿಮ್ಮ ಜೀವನದಲ್ಲಿ ಪ್ರಭಾವ ಬೀರಿದ ಶಿಕ್ಷಕರಿಗೆ ಒಂದು ಫೋನ್ ಕರೆ ಮಾಡಿ, ಒಂದು ಸಂದೇಶ ಕಳುಹಿಸಿ ‘ನನ್ನ ಜೀವನ ರೂಪಿಸಿದಕ್ಕಾಗಿ ಧನ್ಯವಾದಗಳು’ ಎಂದು ಹೇಳುವುದೇ ಅವರ ಪಾಲಿಗೆ ಅತ್ಯಂತ ವಿಶೇಷ ಉಡುಗೊರೆಯಾಗಬಹುದು.
ಶಿಕ್ಷಕರಿಗೆ ಒಂದು ಸಲಾಂ
ನಮ್ಮ ಕೈಯಲ್ಲಿ ಮೊದಲ ಬಾರಿಗೆ ಪೆನ್ನು ಹಿಡಿಸಿದವರು, ಅಕ್ಷರಗಳನ್ನು ಪರಿಚಯಿಸಿದವರು, ತಪ್ಪುಗಳಿಂದ ಕಲಿಯಲು ಹೇಳಿದವರು, ಕನಸು ಕಾಣಲು ಪ್ರೇರೇಪಿಸಿದವರು ಮತ್ತು ಆ ಕನಸುಗಳತ್ತ ಹೆಜ್ಜೆ ಇಡಲು ಧೈರ್ಯ ತುಂಬಿದವರು ಶಿಕ್ಷಕರು. ಹೀಗಾಗಿ ವಿಶ್ವ ಶಿಕ್ಷಕರ ದಿನ ಕೇವಲ ಒಂದು ದಿನದ ಆಚರಣೆಯಾಗದೆ, ನಮ್ಮ ಬದುಕಿನಲ್ಲಿ ಬೆಳಕು ತುಂಬಿದ ಪ್ರತಿಯೊಬ್ಬ ಗುರುವನ್ನು ನೆನಪಿಸಿಕೊಳ್ಳುವ ದಿನವಾಗಲಿ. ನಮಗೆ ಜ್ಞಾನ ನೀಡಿದ, ದಾರಿ ತೋರಿದ ಹಾಗೂ ನಮ್ಮ ಭವಿಷ್ಯ ರೂಪಿಸಿದ ಪ್ರತಿಯೊಬ್ಬ ಶಿಕ್ಷಕರಿಗೂ ವಿಶ್ವ ಶಿಕ್ಷಕರ ದಿನದ ಹೃತ್ಪೂರ್ವಕ ಶುಭಾಶಯಗಳು.
