ಇತ್ತೀಚಿನ ಆಧುನಿಕ ಮತ್ತು ಡಿಜಿಟಲ್ ಯುಗದಿಂದಾಗಿ ಯುವಜನತೆ ವಾಟ್ಸ್ಯಾಪ್, ಫೇಸ್ಬುಕ್, ಒಟಿಟಿ ಪ್ಲ್ಯಾಟ್ಫಾರ್ಟ್, ಇನ್ಸ್ಟಾ ಸೇರಿದಂತೆ ಹಲವು ಆನ್ಲೈನ್ ಅಪ್ಲಿಕೇಶನ್ಗಳಿಗೆ ಒಗ್ಗಿಕೊಂಡಿದ್ದಾರೆ. ಆದರೆ, ಅಘಾತಕಾರಿ ವಿಚಾರ ಎಂದರೆ ಎಷ್ಟೇ ತಮ್ಮನ್ನು ತಾವು ಚಟುವಟಿಕೆಯಲ್ಲಿ ಇರಿಸಿಕೊಂಡರೂ ಸಹ ಭಾರತದ ಯುವಜನತೆ ಆಪ್ತ ಸಂಬಂಧಗಳ ತೀವ್ರ ಕೊರತೆಯನ್ನು ಎದುರಿಸುತ್ತಿದ್ದಾರೆ ಎನ್ನುವುದು ಸಮೀಕ್ಷೆಯೊಂದರಲ್ಲಿ ತಿಳಿದು ಬಂದಿದೆ.
ಹೌದು, ಮೆಟ್ರೋ ಮತ್ತು ಮೊದಲ ಸ್ಥರದ ನಗರಗಳಲ್ಲಿರುವ 18 ರಿಂದ 45 ವರ್ಷ ವಯಸ್ಸಿನ 1,000 ಸಿಂಗಲ್ಸ್‌ಗಳನ್ನು ಈ ಸಮೀಕ್ಷೆಗೆ ಒಳಪಡಿಸಲಾಗಿತ್ತು. ಡೇಟಿಂಗ್ ಆ್ಯಪ್‌ಗಳ ಪ್ರಸಿದ್ಧ ಸಂಸ್ಥೆ ಮ್ಯಾಚ್ ಗ್ರೂಪ್ ಮತ್ತು ಇಪ್ಸೋಸ್ ಜಂಟಿಯಾಗಿ ಈ ಸಮೀಕ್ಷೆ ನಡೆಸಿದ್ದವು. ಸಮೀಕ್ಷೆಯಲ್ಲಿ ಭಾಗವಹಿಸಿದ್ದ ಶೇ. 35ರಷ್ಟು ಸಿಂಗಲ್ಸ್‌ಗಳು ತಾವು 'ಒಂಟಿ' ಎಂಬ ಭಾವನೆ ಸದಾ ಕಾಡುತ್ತಿದೆ ಎಂದು ಹೇಳಿದ್ದಾರೆ.
ಒಂಟಿತನ ಭಾವನೆ ಮೂಡುತ್ತಿರುವುದೇಕೆ?
ಭಾರತೀಯ ಯುವಜನತೆಗೆ ಸಂಬಂಧಗಳನ್ನು ಬೆಳೆಸಲು ಅವಕಾಶಗಳ ಕೊರತೆಯೇನೂ ಇಲ್ಲ. ಶೇ. 75ರಷ್ಟು ಯುವಕ-ಯುವತಿಯರು ವಾರಕ್ಕೊಮ್ಮೆಯಾದರೂ ಹೊರಗಡೆ ಹೋಗಿ ಜನರನ್ನು ಭೇಟಿಯಾಗುತ್ತಿರುತ್ತಾರೆ. ಡೇಟಿಂಗ್ ಮಾಡುತ್ತಾರೆ. ಆದರೂ, ಕೆಲಸದ ಒತ್ತಡ ಮತ್ತು ಆಯಾಸ ಅವರ ಈ ಮಾನಸಿಕ ಸಮಸ್ಯೆಗೆ ಕಾರಣವಾಗುತ್ತಿದೆ.
ಶೇ. 64ರಷ್ಟು ಮಂದಿ ತಮ್ಮ ಸಾಮಾಜಿಕ ಜೀವನಕ್ಕಿಂತ ಓದು ಮತ್ತು ಕೆಲಸಕ್ಕೆ ಹೆಚ್ಚು ಪ್ರಾಶಸ್ತ್ಯ ನೀಡುತ್ತಿರುವುದಾಗಿ ಹೇಳಿದ್ದಾರೆ. ಈ ಕೆಲಸವೇ ಮೊದಲು ಎಂಬ ಮಂತ್ರ, ಅವರನ್ನು ಒಂಟಿತನಕ್ಕೆ ತಳ್ಳಿದೆ.
ಎರಡನೇ ಕಾರಣ ಸುಸ್ತು, ಆಯಾಸ. ಶೇ. 55ರಷ್ಟು ಸಿಂಗಲ್ಸ್, ದಿನದ ಕೆಲಸ ಮುಗಿದ ಮೇಲೆ ಯಾರನ್ನಾದರೂ ಭೇಟಿಯಾಗಲು ಅಥವಾ ಮಾತನಾಡಲು ಸಾಧ್ಯವಾಗದಷ್ಟು ಸುಸ್ತಾಗಿರುತ್ತಾರೆ. ಮತ್ತೊಂದೆಡೆ ಶೇ. 58ರಷ್ಟು ಮಂದಿ, "ಆನ್‌ಲೈನ್‌ನಲ್ಲಿ ನಾವು ಎಲ್ಲರೊಂದಿಗೂ ಬೆರೆತಿರುತ್ತೇವೆ, ಆದರೆ ನಿಜಜೀವನದಲ್ಲಿ ನಮಗೆ ಒಂಟಿತನ ಕಾಡುತ್ತದೆ," ಎಂದು ಸತ್ಯ ಒಪ್ಪಿಕೊಂಡಿದ್ದಾರೆ.
