ದೆಹಲಿ: ಯಾವುದೇ ತಾಯಿಗೆ ತಾನು ಹೆತ್ತ ಮಗುವನ್ನು ನೋಡುವ ಕಾತುರ ಇರುವುದು ಸಹಜ. ಆದರೆ ಇಲ್ಲೊಂದು ಕಡೆ ತಾಯಿಯೊಬ್ಬಳ ಆ ಕಾತುರ ಮೂರು ವರ್ಷಗಳ ಬಳಿಕ ತಣಿದಿದೆ. ಅರ್ಥಾತ್, ಈ ತಾಯಿ ತಾನು ಜನ್ಮ ನೀಡಿದ ಮಗುವನ್ನು ಕಂಡಿದ್ದು ಮೂರು ವರ್ಷಗಳ ನಂತರ!
ಅಸ್ಸಾಮ್ನ ಬರ್ಪೆಟ್ಟಾ ಜಿಲ್ಲೆಯ ಸರ್ಕಾರಿ ಆಸ್ಪತ್ರೆಯೊಂದರಲ್ಲಿ ಮೂರು ವರ್ಷಗಳ ಹಿಂದೆ ಈ ಹೆರಿಗೆ ಆಗಿತ್ತು. ಅಂದು ಅಲ್ಲಿನ ಆಸ್ಪತ್ರೆಯಲ್ಲಿ ಇಬ್ಬರು ಮಹಿಳೆಯರಿಗೆ ಹೆರಿಗೆ ಆಗಿತ್ತು. ಆದರೆ ಆ ಪೈಕಿ ಒಬ್ಬಾಕೆಯ ಮಗು ಹುಟ್ಟುವಾಗಲೇ ಸತ್ತಿತ್ತು.
2019ರ ಮೇ 3ರಂದು ಬರ್ಪೆಟಾ ಜಿಲ್ಲೆಯ ನಜ್ಮಾ ಖನಂ ಎಂಬಾಕೆ ಸರ್ಕಾರಿ ಆಸ್ಪತ್ರೆಯಲ್ಲಿ ಗಂಡು ಮಗುವಿಗೆ ಜನ್ಮನೀಡಿದ್ದರು. ಹೆರಿಗೆ ಬಳಿಕ ಆಕೆಯನ್ನು ಐಸಿಯುಗೆ ದಾಖಲಿಸಲಾಗಿತ್ತು ಹಾಗೂ ಮಗುವನ್ನು ಚೈಲ್ಡ್ ಕೇರ್ ರೂಮ್ಗೆ ಕೊಂಡೊಯ್ಯಲಾಗಿತ್ತು. ಕೆಲವು ಗಂಟೆಗಳ ಬಳಿಕ ಆಸ್ಪತ್ರೆ ಸಿಬ್ಬಂದಿ ಇನ್ನೊಬ್ಬ ಮಹಿಳೆ ಹೆತ್ತಿದ್ದ ಸತ್ತಮಗುವನ್ನು ಈಕೆಯ ಕುಟುಂಬಸ್ಥರಿಗೆ ನೀಡಿದ್ದರು.
ಚೇತರಿಸಿಕೊಂಡ ಬಳಿಕ ವಿಷಯ ತಿಳಿದ ನಜ್ಮಾ ತಾನು ಜೀವಂತ ಮಗುವಿಗೆ ಜನ್ಮಕೊಟ್ಟಿದ್ದು, ಮಗು ಚೆನ್ನಾಗಿಯೇ ಇತ್ತು ಎಂದು ಈ ಮಗು ತನ್ನದಲ್ಲ ಎಂದು ವಾದಿಸಿದ್ದರು. ಮೂರು ದಿನಗಳ ಬಳಿಕ ಆಸ್ಪತ್ರೆಯಲ್ಲಿ ಆ ದಿನ ಹೆರಿಗೆ ಆದವರ ಹೆಸರಿನ ಪಟ್ಟಿಯನ್ನು ಪರಿಶೀಲಿಸಿದಾಗ ಅಂದು ನಜ್ಮಾ ಖನಂ ಮತ್ತು ನಜ್ಮಾ ಖತುನ್ ಎಂಬಿಬ್ಬರ ಹೆರಿಗೆ ಆಗಿದ್ದು ಗಮನಕ್ಕೆ ಬಂದಿತ್ತು.
ಬಳಿಕ ನಜ್ಮಾ ಖನಂ ಮನೆಯವರು ಬರ್ಪೆಟ್ಟಾ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಪ್ರಕರಣ ನ್ಯಾಯಾಲಯದ ಮೆಟ್ಟಿಲೇರಿತ್ತು. ಈ ಸಂಬಂಧ ಡಿಎನ್ಎ ಪರೀಕ್ಷೆ ನಡೆದಿದ್ದು, ಮೂರು ವರ್ಷಗಳ ಬಳಿಕ ಕೋರ್ಟ್ ನಿರ್ದೇಶನದ ಮೇರೆಗೆ ಮಗು ತನ್ನ ನಿಜವಾದ ತಾಯಿ ನಜ್ಮಾ ಖನಂ ಮಡಿಲಿಗೆ ಸೇರಿದೆ.
ಯುವತಿಯನ್ನು ಬೆಂಗಳೂರಿಗೆ ಕರೆದೊಯ್ಯಲು 3 ಆ್ಯಂಬುಲೆನ್ಸ್, ಶಿವಮೊಗ್ಗದಿಂದಲೇ ಜೀರೋ ಟ್ರಾಫಿಕ್!