ಭೋಪಾಲ್: ಲಡಾಖ್ ಪೂರ್ವಭಾಗದಲ್ಲಿನ ಉದ್ವಿಗ್ನ ಸ್ಥಿತಿ ಉಂಟಾಗಿರುವ ಹಿನ್ನೆಲೆಯಲ್ಲಿ ದೇಶಾದ್ಯಂತ ಚೀನಾ ವಿರೋಧಿ ಮನೋಭಾವ ವ್ಯಕ್ತವಾಗುತ್ತಿದೆ. ಚೀನಾ ಮೂಲದ ಆ್ಯಪ್ಗಳ ಬಳಕೆ ಸ್ಥಗಿತಗೊಳಿಸುವಲ್ಲಿಂದ ಆರಂಭವಾದ ಈ ಚೀನಾ ವಿರೋಧಿ ಮನೋಭಾವ ಇದೀಗ ನ್ಯಾಯಾಲಯಗಳಿಗೂ ವಿಸ್ತರಿಸಿದೆ.
ಪ್ರಕರಣ ಒಂದರ ವಿಚಾರಣೆ ನಡೆಸುತ್ತಿದ್ದ ಮಧ್ಯಪ್ರದೇಶ ಹೈಕೋರ್ಟ್ನ ನ್ಯಾಯಮೂರ್ತಿ ಅವರು ಆರೋಪಿಗಳಿಗೆ ಜಾಮೀನು ಮಂಜೂರು ಮಾಡಲು ಶ್ಯೂರಿಟಿಯ ಜತೆಗೆ ಆಸ್ಪತ್ರೆಯೊಂದರಲ್ಲಿ ಚೀನಾ ಮೂಲದ್ದಲ್ಲದ ಬೃಹತ್ ಟಿವಿ ಪರದೆಯೊಂದನ್ನು ಕೊಡಿಸುವಂತೆ ಷರತ್ತು ವಿಧಿಸಿದೆ.
ಇದನ್ನೂ ಓದಿ: ಚೀನಾದ ಟಿಕ್ಟಾಕ್ ಜಾಗವನ್ನು ನಮ್ಮ ಬೆಂಗಳೂರಿನ ಚಿಂಗಾರಿ ತುಂಬಿತು…
ಮಧ್ಯಪ್ರದೇಶದ ದಾಟಿಯಾ ಜಿಲ್ಲೆಯ ಬಡೋನಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ 2020ರ ಫೆಬ್ರವರಿಯಲ್ಲಿ ನಡೆದಿದ್ದ ಕೊಲೆ ಪ್ರಕರಣದಲ್ಲಿ ಜಾಮೀನು ಕೋರಿ ಇಬ್ಬರು ಆರೋಪಿತರು ಅರ್ಜಿ ಸಲ್ಲಿಸಿದ್ದರು. ಜೂ.26ರಂದು ಈ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಶೀಲ್ ನಾಗು ಅವರಿದ್ದ ಏಕ ಸದಸ್ಯ ನ್ಯಾಯಪೀಠ, ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೇ 18ರಂದು ಆರೋಪಪಟ್ಟಿ ಸಲ್ಲಿಕೆಯಾಗಿದೆ. ಈ ಹಿನ್ನೆಲೆಯಲ್ಲಿ ಆರೋಪಿಗಳನ್ನು ಹೆಚ್ಚಿನ ವಿಚಾರಣೆಗೆ ಒಳಪಡಿಸುವ ಅವಶ್ಯಕತೆ ಇಲ್ಲ. ಸದ್ಯ ದೇಶಾದ್ಯಂತ ಕೋವಿಡ್-19 ಪಿಡುಗು ಹಬ್ಬಿದೆ. ಪ್ರಕರಣದ ವಿಚಾರಣೆ ಬೇಗನೆ ಮುಗಿಯುವ ಲಕ್ಷಣಗಳೂ ಕಾಣುತ್ತಿಲ್ಲ. ಹಾಗಾಗಿ ವಿಚಾರಣಾಧೀನ ಬಂಧನ ವಿಸ್ತರಣೆಯ ಅಗತ್ಯವೂ ಇಲ್ಲ. ಆದ್ದರಿಂದ ಇವರಿಬ್ಬರಿಗೂ ಜಾಮೀನು ಮಂಜೂರು ಮಾಡಬಹುದಾಗಿದೆ ಎಂದು ನಿರ್ಧಾರಕ್ಕೆ ಬಂದಿತು.
ಈ ಹಿನ್ನೆಲೆಯಲ್ಲಿ ತಲಾ 25 ಸಾವಿರ ರೂ. ಶ್ಯೂರಿಟಿಯ ಜತೆಗೆ, ರೆನ್ಬಸೇರಾದಲ್ಲಿರುವ ಮೊರಾರ್ನ (ಗ್ವಾಲಿಯರ್) ಜಿಲ್ಲಾ ಆಸ್ಪತ್ರೆಗೆ 25 ಸಾವಿರ ರೂ. ಮೌಲ್ಯದ ಚೀನಾ ಹೊರತುಪಡಿಸಿ ಭಾರತ ಅಥವಾ ಬೇರಾವುದೇ ದೇಶದಲ್ಲಿ ಉತ್ಪಾದಿಸಲಾಗಿರುವ ಕಪ್ಪು ಬಣ್ಣದ ಎಲ್ಇಡಿ ಟಿವಿyನ್ನು ಕೊಡಿಸಬೇಕು ಎಂದು ಷರತ್ತುಗಳನ್ನು ವಿಧಿಸಿತು.
ದೇವರೇ ಕಾಪಾಡಬೇಕು; ಕರೊನಾ ನಿವಾರಣೆ ಮಾನವ ಯತ್ನ ಮೀರಿದ್ದು ಎಂದ ಸಿಎಂ ಉದ್ಧವ್