ಬೆಂಗಳೂರು: ಮನೆಯಲ್ಲಿ ಚಿಕ್ಕ ಮಕ್ಕಳಿದ್ದರೆ ಅಮ್ಮ ಅದು ಹೇಗೋ ನಿಭಾಯಿಸಿ ಬಿಡುತ್ತಾಳೆ. ಆದರೆ ಕೆಲವೊಮ್ಮೆ ಅನಿವಾರ್ಯವಾಗಿ ಅಪ್ಪ ಅದೇ ಕೆಲಸ ಮಾಡಬೇಕಾಗಿ ಬಂದಾಗ ಮಕ್ಕಳು ಮಾತು ಕೇಳುವುದೇ ಅಪರೂಪ. ಅಂಥ ಸಂದರ್ಭದಲ್ಲಿ ಮಕ್ಕಳನ್ನು ನಿಭಾಯಿಸಬೇಕೆಂದರೆ ಅಪ್ಪ ಏನೇನೋ ಸರ್ಕಸ್ ಮಾಡಬೇಕಾಗಿ ಬರುತ್ತದೆ. ಅಂಥದ್ದೇ ಒಂದು ಪರಿಸ್ಥಿತಿಯನ್ನು ಈ ಅಪ್ಪ ಎದುರಿಸಿದ್ದು, ಇತರ ಅಪ್ಪಂದಿರಿಗೂ ಉಪಯುಕ್ತ ಎಂಬಂಥ ಐಡಿಯಾ ಕೊಟ್ಟಿದ್ದಾನೆ.
ಸಂಕಷ್ಟದ ಸಮಯದಲ್ಲಿ ಆ ಕ್ಷಣಕ್ಕೆ ಪಾರಾಗಬೇಕೆಂದರೆ ಏನಾದರೂ ತಂತ್ರ ಮಾಡಲೇಬೇಕು. ಅಂಥದ್ದೊಂದು ತಂತ್ರಕ್ಕೆ ಈ ಅಪ್ಪ ತಂತ್ರಜ್ಞಾನವನ್ನೇ ಯಶಸ್ವಿಯಾಗಿ ಬಳಸಿಕೊಂಡಿದ್ದೇನೆ. ಆ ಮೂಲಕ ಹೆಂಡತಿಯ ಅನುಪಸ್ಥಿತಿಯಲ್ಲಿ ಮಗುವಿಗೆ ಹಾಲು ಕುಡಿಸುವ ಮೂಲಕ ಹೆಂಡತಿಯೂ ಭೇಷ್ ಎಂದು ಹೇಳುವಂಥ ಕೆಲಸ ಮಾಡಿದ್ದಾನೆ.
ಇದನ್ನೂ ಓದಿ: 7 ವರ್ಷದ ಮಗನಿಗೆ ನಿದ್ರೆ ಮಾತ್ರೆ ತಿನ್ನಿಸಿ ಸಾಯಿಸಿದ್ಲು; ಗಂಡ-ಅಪ್ಪ-ಅವಳೂ ಡಾಕ್ಟರ್; ಆದ್ರೂ ಮಾಡಿದ್ದು ಜೀವ ತೆಗೆಯೋ ಕೆಲಸ!
ಅಷ್ಟಕ್ಕೂ ಆತ ಇದಕ್ಕೆ ಬಳಸಿದ್ದು ಒಂದು ಟ್ಯಾಬ್ಲೆಟ್. ಅದ್ಯಾವುದದು ಅಂಥ ಮಾತ್ರೆ ಎಂದು ಅಚ್ಚರಿಯಾಗಬೇಡಿ. ಇದು ಆ ಟ್ಯಾಬ್ಲೆಟ್ ಅಲ್ಲ, ಬದಲಿಗೆ ಗ್ಯಾಜೆಟ್. ಅಳುತ್ತಿದ್ದ ಮಗುವನ್ನು ಸುಮ್ಮನಿರಿಸಲು, ಅದಕ್ಕೆ ಹಾಲು ಕುಡಿಸಲು ಈತ ಮಾಡಿರುವ ಐಡಿಯಾ ಇತರ ಅಪ್ಪಂದಿರಿಗೂ ಸಹಾಯಕ್ಕೆ ಬರಬಹುದು. ಆತ ಮಾಡಿದ್ದಿಷ್ಟೇ.. ಮನೆಯಲ್ಲಿರುವ ಟ್ಯಾಬ್ನಲ್ಲಿ ತನ್ನ ಹೆಂಡತಿಯ ಚಿತ್ರ ಓಪನ್ ಮಾಡಿ, ಆ ಟ್ಯಾಬ್ಅನ್ನು ಮುಖಕ್ಕೆ ಅಡ್ಡಲಾಗಿ ಟೇಪ್ ಮಾಡಿ ಇಟ್ಟುಕೊಂಡಿದ್ದಾನೆ. ಬಳಿಕ ಫೀಡಿಂಗ್ ಬಾಟಲ್ನಲ್ಲಿದ್ದ ಹಾಲನ್ನು ಮಗುವಿನ ಬಾಯಿಗೆ ಇಟ್ಟಿದ್ದಾನೆ. ಈ ಐಡಿಯಾ ವರ್ಕೌಟ್ ಆಗಿದ್ದು, ಮಗು ಅಮ್ಮನ ಚಿತ್ರ ನೋಡುತ್ತ ಸುಮ್ಮನೆ ಹಾಲು ಕುಡಿದಿದೆ. ವುಹಾನ್ನ ಜಿಯಾಂಗ್ಕ್ಸಿ ಪ್ರಾವಿನ್ಸ್ನಲ್ಲಿರುವ ತಂದೆಯೊಬ್ಬ ಇಂಥ ಐಡಿಯಾ ಮಾಡಿದ್ದು, ಈಗ ಸೋಷಿಯಲ್ ಮೀಡಿಯಾಗಳಲ್ಲಿ ವೈರಲ್ ಆಗಿ ಮೆಚ್ಚುಗೆಗೂ ಪಾತ್ರವಾಗಿದೆ. (ಏಜೆನ್ಸೀಸ್)
