ಶಾಹೀನ್ಬಾಗ್: ಸಿಎಎ ವಿರುದ್ಧದ ಹೋರಾಟಕ್ಕೆ ಕರೆದುಕೊಂಡು ಬರುತ್ತಿದ್ದ ನಾಲ್ಕು ತಿಂಗಳ ಮಗು ಸತ್ತು ಹೋಗಿದ್ದರೂ ತಾನು ಹೋರಾಟ ಮುಂದುವರೆಸುವುದಾಗಿ ಸಿಎಎ ವಿರುದ್ಧದ ಹೋರಾಟಗಾರ್ತಿ ತಿಳಿಸಿದ್ದಾಳೆ. ತನ್ನ ಮಕ್ಕಳ ಭವಿಷ್ಯಕ್ಕಾಗಿ ತಾನು ಹೋರಾಟ ಮುಂದುವರೆಸುತ್ತಿರುವುದಾಗಿ ಆಕೆ ಹೇಳಿದ್ದಾಳೆ.
ಮೊಹಮ್ಮದ್ ಆರಿಫ್ ಮತ್ತು ನಜಿಯಾಗೆ ಮೂರು ಜನ ಮಕ್ಕಳು. ಆಟೋ ರಿಕ್ಷಾ ಚಾಲಕನಾಗಿರುವ ಆರಿಫ್ ಬಿಡುವಿನ ಸಮಯದಲ್ಲಿ ಎಂಬ್ರಾಯಿಡರಿ ಕೆಲಸ ಮಾಡಿ ಹೆಂಡತಿ ಮತ್ತು ಮಕ್ಕಳನ್ನು ಸಾಕುತ್ತಿದ್ದಾನೆ. ಕೇಂದ್ರ ಸರ್ಕಾರ ಸಿಎಎ ಜಾರಿ ಮಾಡಿದಾಗಿನಿಂದ ನಜಿಯಾ ಶಾಹೀನ್ಬಾಗ್ನಲ್ಲಿ ಸಿಎಎ ವಿರುದ್ಧದ ಹೋರಾಟದಲ್ಲಿ ಭಾಗವಹಿಸಿಕೊಂಡು ಬಂದಿದ್ದಾಳೆ. ತನ್ನ ಗಂಡ ಆಟೊ ರಿಕ್ಷಾ ಓಡಿಸಲು ಹೋಗುವುದರಿಂದಾಗಿ ಆಕೆ ತನ್ನ ಮೂರೂ ಮಕ್ಕಳನ್ನು ಹೋರಾಟಕ್ಕೆ ಕರೆದುಕೊಂಡು ಹೋಗುತ್ತಿದ್ದಳಂತೆ. ಇತ್ತೀಚೆಗೆ ನಾಲ್ಕು ತಿಂಗಳು ತುಂಬಿದ್ದ ಕೊನೆಯ ಮಗು ಮೊಹಮ್ಮದ್ ಜಹಾನ್ಗೆ ಹೋರಾಟದ ಸಮಯದಲ್ಲಿ ಹೊರಗಿನ ಗಾಳಿ ಮತ್ತು ಚಳಿಯಿಂದಾಗಿ ಶೀತವಾಗಿದೆ. ಜನವರಿ 30ರಂದು ರಾತ್ರಿ 1 ಗಂಟೆಗೆ ಮನೆಗೆ ಬಂದ ನಜಿಯಾ ತನ್ನ ಮೂರು ಮಕ್ಕಳನ್ನು ಮಲಗಿಸಿ ತಾನೂ ಮಲಗಿಕೊಂಡಿದ್ದಾಳೆ. ಆದರೆ ಬೆಳಗ್ಗೆ ಎದ್ದ ದಂಪತಿಗೆ ತಮ್ಮ ಮೂರನೇ ಮಗು ಜಹಾನ್ ದೇಹ ತಣ್ಣಗಾಗಿರುವುದು ತಿಳಿದುಬಂದಿದೆ. ತಕ್ಷಣವೇ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಆದರೆ ಮಗು ಸಾವನ್ನಪ್ಪಿದೆ ಎಂದು ಆಸ್ಪತ್ರೆಯವರು ಮಗುವನ್ನು ದಾಖಲು ಮಾಡಿಕೊಳ್ಳದೆ ವಾಪಸ್ ಕಳಿಸಿದ್ದಾರೆ.
ಹೋರಾಟಕ್ಕೆ ಹೋಗಿ ಅಲ್ಲಿನ ಚಳಿಯಿಂದ ತನ್ನ ಮಗು ಮರಣ ಹೊಂದಿದ್ದರೂ ನಜಿಯಾ ಹೋರಾಟದಿಂದ ಹಿಂದೆ ಸರಿದಿಲ್ಲ. ಸಿಎಎ ಮತ್ತು ಎನ್ಆರ್ಸಿ ದೇಶದ ಜನರನ್ನು ಧರ್ಮೀಯವಾಗಿ ನೋಡುತ್ತಿದೆ. ನಾನೀಗ ಮಾಡುತ್ತಿರುವ ಹೋರಾಟ ನನ್ನೆರೆಡು ಮಕ್ಕಳಿಗಾಗಿ. ನಮ್ಮ ಬಳಿ ದಾಖಲೆಗಳಿಲ್ಲ, ನಾವೇನು ಮಾಡಬೇಕು? ಮೋದಿ ಜೀ ಮತ್ತು ಅಮಿತ್ ಷಾ ಜೀ ತಮ್ಮ ನಿರ್ಧಾರವನ್ನು ಕೈ ಬಿಡಬೇಕು ಎಂದು ನಜಿಯಾ ಹೇಳಿದ್ದಾರೆ.
ಒಂದು ವೇಳೆ ಸರ್ಕಾರ ಸಿಎಎ ಮತ್ತು ಎನ್ಆರ್ಸಿ ಜಾರಿಗೆ ತರದೇ ಇದ್ದಿದ್ದರೆ ಹೋರಾಟವೇ ಆಗುತ್ತಿರಲಿಲ್ಲ. ಆಗ ನನ್ನ ಹೆಂಡತಿ ಮಕ್ಕಳನ್ನು ಕರೆದುಕೊಂಡು ಹೋರಾಟಗಾರರೊಂದಿಗೆ ಸೇರಿಕೊಳ್ಳುವ ಪ್ರಮೇಯವೂ ಬರುತ್ತಿರಲಿಲ್ಲ. ನನ್ನ ಮಗ ಈಗ ಜೀವಂತವಾಗಿರುತ್ತಿದ್ದ ಎಂದು ಆರಿಫ್ ತಮ್ಮ ಅಳಲು ತೋಡಿಕೊಂಡಿದ್ದಾರೆ. (ಏಜೆನ್ಸೀಸ್)