ನವದೆಹಲಿ: ಕಳೆದ ವರ್ಷದ ಅಕ್ಟೋಬರ್ ತಿಂಗಳಿಗೆ ಹೋಲಿಸಿದರೆ ಈ ವರ್ಷದ ಅಕ್ಟೋಬರ್ನಲ್ಲಿ ಮನೆಯಲ್ಲಿ ತಯಾರಿಸಿದ ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಊಟದ ಬೆಲೆಯಲ್ಲಿ ಇಳಿಕೆಯಾಗಿದೆ. ಸಸ್ಯಾಹಾರಿ ಊಟ ಶೇ. 5, ಮಾಂಸಾಹಾರಿ ಊಟದ ಬೆಲೆ 7ರಷ್ಟು ಕುಸಿದಿದೆ ಎಂದು ದೇಶೀಯ ರೇಟಿಂಗ್ ಏಜೆನ್ಸಿ ಕ್ರಿಸಿಲ್ ತಿಳಿಸಿದೆ.
ವರ್ಷದಿಂದ ವರ್ಷಕ್ಕೆ ಆಲೂಗೆಡ್ಡೆ ಮತ್ತು ಟೊಮ್ಯಾಟೊ ಬೆಲೆಗಳು ಕುಸಿದಿರುವುದರಿಂದ ಸಸ್ಯಾಹಾರಿ ಊಟದ ಬೆಲೆಯಲ್ಲಿ ಇಳಿಕೆಯಾಗಿದೆ. ಕಳೆದ ವರ್ಷ 29 ರೂಪಾಯಿ ಇದ್ದ ಸಸ್ಯಾಹಾರಿ ಊಟದ ಬೆಲೆ ಈ ವರ್ಷ 27.50 ಆಗಿದ್ದು, ಒಟ್ಟಾರೆ ಪರಿಸ್ಥಿತಿ ಸುಧಾರಿಸಿದೆ ಎಂದು ವರದಿ ಹೇಳಿದೆ.
ವರದಿಯ ಪ್ರಕಾರ, ಬ್ರಾಯ್ಲರ್ ಕೋಳಿ ಬೆಲೆ ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಶೇ.5 ರಿಂದ 7ರಷ್ಟು ಕುಸಿದಿದ್ದು, ಮಾಂಸಾಹಾರಿ ಊಟದ ಬೆಲೆಯಲ್ಲಿಯೂ ಇಳಿಕೆಯಾಗಿದೆ. ಕಳೆದ ವರ್ಷ 62.70 ರೂಪಾಯಿ ಇದ್ದ ಮಾಂಸಾಹಾರಿ ಊಟದ ಬೆಲೆ ಈ ವರ್ಷ 58.40 ರೂಪಾಯಿ ಆಗಿದೆ ಎಂದು ತಿಳಿಸಿದೆ.
ಈರುಳ್ಳಿ ಬೆಲೆ ನಿರಂತರವಾಗಿ ಏರಿಕೆಯಾಗುತ್ತಿದ್ದು, ನವೆಂಬರ್ನಲ್ಲಿ ಊಟದ ಬೆಲೆ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ದೇಶೀಯ ರೇಟಿಂಗ್ ಏಜೆನ್ಸಿ ಎಚ್ಚರಿಸಿದೆ. ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಊಟದ ವೆಚ್ಚದಲ್ಲಿ ಅನುಕ್ರಮವಾಗಿ ಶೇ.14 ಮತ್ತು 8ರಷ್ಟಿರುವ ಇಂಧನ ವೆಚ್ಚವು ಶೇ.14ರಷ್ಟು ಇಳಿಕೆಯಾಗಿದೆ ಎಂದು ಕ್ರಿಸಿಲ್ ಹೇಳಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ 14.2 ಕೆಜಿ ಎಲ್ಪಿಜಿ ಸಿಲಿಂಡರ್ ಬೆಲೆ 1,053 ರಿಂದ 903 ರೂ.ಗೆ ಇಳಿದಿದೆ.