ಮುಂಬೈ : ಗಂಡಹೆಂಡತಿ ಜಗಳದಲ್ಲಿ ಕೂಸು ಬಡವಾಯ್ತು ಎಂಬ ಮಾತಿದೆ. ಅದನ್ನು ಪೂರ್ಣ ರೀತಿಯಲ್ಲಿ ನಿರೂಪಿಸುವಂಥ ಪ್ರಸಂಗವೊಂದು ಮುಂಬೈನಲ್ಲಿ ನಡೆದಿದೆ. ಹೆಂಡತಿಯೊಂದಿಗೆ ನಡೆದ ಜಗಳದ ಹಿನ್ನೆಲೆಯಲ್ಲಿ ಪುರುಷನೊಬ್ಬ ತನ್ನ ಮಕ್ಕಳಿಗೆ ಐಸ್ಕ್ರೀಮಿನಲ್ಲಿ ಇಲಿ ಪಾಷಾಣ ಬೆರೆಸಿ ನೀಡಿರುವ ಘಟನೆ ವರದಿಯಾಗಿದೆ.
ಮುಂಬೈನ ಮನ್ಖುರ್ದ್ ಪ್ರಾಂತ್ಯದ ನಿವಾಸಿ ಮೊಹಮ್ಮದ್ ಅಲಿ ನೌಶಾದ್ ಎಂಬುವ ಜೂನ್ 25 ರ ಶುಕ್ರವಾರ ಜಗಳದ ನಂತರ ತನ್ನ ಇಬ್ಬರು ಗಂಡು ಮಕ್ಕಳಿಗೆ ಮತ್ತು ಒಬ್ಬ ಹೆಣ್ಣುಮಗುವಿಗೆ ಐಸ್ಕ್ರೀಂನಲ್ಲಿ ಇಲಿ ಪಾಷಾಣ ಸೇರಿಸಿ ನೀಡಿದ್ದಾನೆ. ಇದನ್ನು ತಿಂದ 5 ವರ್ಷದ ಆಲಿಶಾನ್ ಅಲಿ ಮೊಹಮ್ಮದ್ ಅಸುನೀಗಿದ್ದರೆ, 7 ವರ್ಷದ ಅಲೀನಾ ಮತ್ತು 2 ವರ್ಷದ ಅರ್ಮಾನ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಈ ಆಘಾತಕಾರಿ ಕೃತ್ಯದ ಬಗ್ಗೆ ಆರೋಪಿಯ ಹೆಂಡತಿಯು ದೂರು ನೀಡಿದ್ದು, ಮೊಹಮ್ಮದ್ ಅಲಿ ನೌಶಾದ್ನನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ. ಪ್ರಕರಣದ ತನಿಖೆ ನಡೆದಿದೆ. (ಏಜೆನ್ಸೀಸ್)