ಬೆಂಗಳೂರು: ರಾಜಸ್ಥಾನದ ಜೈಪುರ ಮತ್ತು ಜೋಧ್ಪುರದಲ್ಲಿ ನಡೆದ ಏಳನೇ ರಾಜಸ್ಥಾನ ಅಂತಾರಾಷ್ಟ್ರೀಯ ಚಿತ್ರೋತ್ಸವದ (ರಿಫ್ಪ್ ) ಅಂತಾರಾಷ್ಟ್ರೀಯ ಸ್ಪರ್ಧಾ ವಿಭಾಗದಲ್ಲಿ ಸುಧೀರ್ ಅತ್ತಾವರ್ ನಿರ್ದೇಶನದ ‘ಮಡಿ’ ಚಿತ್ರ ಎರಡು ಪ್ರಶಸ್ತಿಗಳನ್ನು ತನ್ನದಾಗಿಸಿಕೊಂಡಿದೆ.
ಈ ಚಿತ್ರೋತ್ಸವದಲ್ಲಿ ವಿಶ್ವದ ಹಲವು ದೇಶಗಳಿಂದ ಬಂದ ಐವತ್ತಕ್ಕಿಂತಲೂ ಹೆಚ್ಚು ಸಿನಿಮಾಗಳು ಪ್ರದರ್ಶನಕ್ಕೆ ಆಯ್ಕೆಯಾಗಿದ್ದು, ಈ ಪೈಕಿ ‘ಮಡಿ’ ಚಿತ್ರವು ಅತ್ಯುತ್ತಮ ಸಾಮಾಜಿಕ ಕಳಕಳಿ ಸಾರುವ ಚಿತ್ರ ಮತ್ತು ಸುಧೀರ್ ಅತ್ತಾವರ್ ಅವರಿಗೆ ಅತ್ಯುತ್ತಮ ನಿರ್ದೇಶಕ ಪ್ರಶಸ್ತಿ ಕೂಡ ಸಿಕ್ಕಿದೆ. ಈ ಚಿತ್ರೋತ್ಸವದಲ್ಲಿ ಅಮೆರಿಕದ ‘ಫಲಾಫಲ್’ ಮತ್ತು ಫ್ರೆಂಚ್ ಭಾಷೆಯ ‘ಸೂಲೇ ಮಿಯೋ’ ಚಿತ್ರಗಳು ಸಾಕಷ್ಟು ಸ್ಪರ್ಧೆ ಒಡ್ಡಿದರೂ, ಅಂತಿಮವಾಗಿ ಕನ್ನಡದ ‘ಮಡಿ’ ಚಿತ್ರವು ತೀರ್ಪುಗಾರರ ಪ್ರಶಂಸೆಗೆ ಪಾತ್ರವಾಗಿ, ಎರಡು ಪ್ರಶಸ್ತಿಗಳನ್ನು ಗೆದ್ದುಕೊಂಡಿದೆ.
ಕರಾವಳಿಯ ಜನಪದ ಕಲೆ ಆಟಿ ಕಳಂಜದ ಹಿನ್ನೆಲೆಯ ಕಥೆ ಇರುವ ಈ ಚಿತ್ರದಲ್ಲಿ ನಟಿ ಮತ್ತು ಗಾಯಕಿ ಎಂ.ಡಿ. ಪಲ್ಲವಿ ಪ್ರಮುಖ ಪಾತ್ರ ನಿರ್ವಹಿಸಿದ್ದಾರೆ. ಸಕ್ಸಸ್ ಫಿಲಮ್ಸ್ ಬ್ಯಾನರ್ನಡಿ ವಿದ್ಯಾಧರ್ ಶೆಟ್ಟಿ ಮತ್ತು ಸೂರಜ್ ನ್ಯೂನ್ಸ್ ಅವರು ನಿರ್ಮಾಪಕರಾಗಿದ್ದಾರೆ.