ಬೆಂಗಳೂರು: ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅಭಿನಯದ ಬಹುನಿರೀಕ್ಷಿತ ಕೋಟಿಗೊಬ್ಬ-3 ಚಿತ್ರ ತಂಡ ಅಭಿಮಾನಿಗಳಿಗೆ ಶಿವರಾತ್ರಿ ಉಡುಗೊರೆ ಎಂದು ಟ್ರೇಲರ್ ಬಿಡುಗಡೆ ಮಾಡಿದೆ.
ಕಿಚ್ಚ ಸುದೀಪ್ ಒಂದೇ ಒಂದು ಮಾತಾಡದೇ ಅಬ್ಬರಿಸಿದ್ದಾರೆ. ಹಿನ್ನೆಲೆಯಲ್ಲಿ ರವಿ ಶಂಕರ್ ಕೋಟಿಗೊಬ್ಬನ ಮಾತುಗಳು ಕೇಳುತ್ತವೆ.
ಕೈಯಲ್ಲಿ ಬೇಡಿ ಹಾಕಿಕೊಂಡು ಪೊಲೀಸರಿಗೆ ಹೇಳಿಕೆ ನೀಡುತ್ತಿರುವ ರವಿ ಶಂಕರ್, “ಆತ ಇಂಟರ್ನ್ಯಾಷನಲ್ ಲೆವೆಲ್ ಸಾರ್, ಬಿಡಬೇಡಿ. ಬಿಟ್ರೆ ಮತ್ತೆ ಸಿಗೋಲ್ಲ” ಎನ್ನುತ್ತಿದ್ದಂತೆ ಕಿಚ್ಚ ಖದರ್ ಕಂಡು ಬರುತ್ತದೆ. ಎಂದಿನಂತೆ ತಮ್ಮ ಸ್ಟೈಲಿಷ್ ಲುಕ್ನಲ್ಲಿ ಕೈಯಲ್ಲಿ ಸಿಗರೇಟ್ ಹಿಡಿದ ಕಿಚ್ಚ ರಂಜಿಸಿದ್ದಾರೆ. ಅರ್ಜುನ್ ಜನ್ಯ ನೀಡಿರುವ ಬಿಜಿಎಂ ಅಭಿಮಾನಿಗಳನ್ನು ಎದ್ದೆದ್ದು ಕುಣಿಯುವಂತೆ ಮಾಡುತ್ತದೆ.
ಯೂಟ್ಯೂಬ್ನಲ್ಲಿ ಟ್ರೇಲರ್ ಬಿಡುಗಡೆಯಾದ 44 ನಿಮಿಷದಲ್ಲಿ 2ವರೆ ಲಕ್ಷಕ್ಕೂ ಹೆಚ್ಚು ವೀಕ್ಷಣೆ ಪಡೆದುಕೊಂಡು ಮುನ್ನುಗುತ್ತಿದೆ. ‘ಕೋಟಿಗೊಬ್ಬ 3’ ಚಿತ್ರವನ್ನು ಶಿವಕಾರ್ತಿಕ್ ನಿರ್ದೇಶನ ಮಾಡಿದ್ದು, ‘ರಾಮ್ಬಾಬು ಪ್ರೊಡಕ್ಷನ್ಸ್’ ಬ್ಯಾನರ್ನಲ್ಲಿ ಸೂರಪ್ಪ ಬಾಬು ನಿರ್ಮಾಣ ಮಾಡಿದ್ದಾರೆ. ಚಿತ್ರದಲ್ಲಿ ಸುದೀಪ್ ಜತೆ ಮಡೊನ್ನ ಸೆಬಾಸ್ಟಿಯನ್, ಶ್ರದ್ಧಾ ದಾಸ್, ಪಿ. ರವಿಶಂಕರ್, ಅಫ್ತಾಬ್ ಶಿವದಾಸಾನಿ ಹಾಗೂ ನವಾಬ್ ಷಾ ಮುಂತಾದವರು ಅಭಿನಯಿಸಿದ್ದಾರೆ.