ಹುಬ್ಬಳ್ಳಿ: ಎರಡು ದಿನ ರಜೆಗೆ 500 ರೂಪಾಯಿ, ನಾಲ್ಕು ದಿನಕ್ಕೆ 1,000 ಲಂಚ, ವಾರಕ್ಕೆ 2,000 ರೂಪಾಯಿ ಲಂಚ, ವಿಐಪಿ, ಮೇಲಧಿಕಾರಿ ಗನ್ ಮ್ಯಾನ್ ನಿಯೋಜನೆಗೆ 20ರಿಂದ 30 ಸಾವಿರ ರೂಪಾಯಿ ವರೆಗೆ ಲಂಚ ಕೊಡಬೇಕು…
ಇದು ಹುಬ್ಬಳ್ಳಿ- ಧಾರವಾಡ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಯ ನಗರ ಸಶಸ್ತ್ರ ಮೀಸಲು ಪಡೆ (ಸಿಎಆರ್) ವಿಭಾಗದ ಅಧಿಕಾರಿಗಳ ಲಂಚಾವತಾರದ ಜಲಕ್. ಸಿಎಆರ್ನ ಕೆಲ ರಿಸರ್ವ್ ಪೊಲೀಸ್ ಇನ್ಸ್ಪೆಕ್ಟರ್ (ಆರ್ಪಿಐ)ಗಳ ಈ ಲಂಚಗುಳಿತನದಿಂದ ಸಿಬ್ಬಂದಿ ಬೇಸತ್ತು ಹೋಗಿದ್ದಾರೆ. ಈ ವಿಷಯ ಪೊಲೀಸ್ ಆಯುಕ್ತ ಲಾಭೂರಾಮ ಅವರಿಗೂ ತಲುಪಿದೆ.
ಐದಾರು ದಿನಗಳ ಹಿಂದೆ ಈ ಕುರಿತು ಸಿಎಆರ್ ಸಿಬ್ಬಂದಿ ಪೊಲೀಸ್ ಆಯುಕ್ತರಿಗೆ ದೂರು ನೀಡಿದ್ದಾರೆ. ವಿಷಯ ತಿಳಿದ ಕೂಡಲೆ ಪೊಲೀಸ್ ಆಯುಕ್ತರು ಸಿಎಆರ್ ಕಚೇರಿಗೆ ಧಾವಿಸಿ ಅಧಿಕಾರಿ- ಸಿಬ್ಬಂದಿಯ ತುರ್ತು ಸಭೆ ನಡೆಸಿದ್ದರು. ಆ ವೇಳೆ ‘ನಮ್ಮ ರಜೆ ನಮಗೆ ಕೊಡಲು ಆರ್ಪಿಐ ಅಧಿಕಾರಿ ಲಂಚ ಕೇಳುತ್ತಾರೆ’ ಎಂದು ಕೆಲ ಸಿಬ್ಬಂದಿ ನೇರಾನೇರ ಆರೋಪಿಸಿದ್ದಾರೆ. ಹೌದೇನಪ್ಪ ಎಂದು ಪೊಲೀಸ್ ಆಯುಕ್ತರು ಅಧಿಕಾರಿಯನ್ನು ಪ್ರಶ್ನಿಸಿದಾಗ, ‘ಇಲ್ಲ ಸರ್, ಇಲ್ಲ ಸರ್’ ಎಂದು ತಡಬಡಾಯಿಸಿದ್ದಾರೆ ಎಂದು ಬಲ್ಲ ಮೂಲಗಳು ‘ವಿಜಯವಾಣಿ’ಗೆ ತಿಳಿಸಿವೆ.
ಸಿಬ್ಬಂದಿಯ ಈ ಆರೋಪವನ್ನು ಪೊಲೀಸ್ ಆಯುಕ್ತರು ಗಂಭೀರವಾಗಿ ಪರಿಗಣಿಸಿ ಸೂಕ್ತ ಕ್ರಮ ಕೈಗೊಳ್ಳಬೇಕು. ಸಿಎಆರ್ ಸಂಪೂರ್ಣ ಭ್ರಷ್ಟಮುಕ್ತವಾಗಬೇಕು ಎಂಬುದು ಸಿಬ್ಬಂದಿಯ ಕೋರಿಕೆ.
ಕ್ವಾರ್ಟರ್ಸ್ ಹಂಚಿಕೆಯಲ್ಲೂ ಲಂಚ: ಪೊಲೀಸ್ ಕ್ವಾರ್ಟರ್ಸ್ ಹಂಚಿಕೆಯಲ್ಲೂ ಲಂಚದ ವಾಸನೆ ಇದೆ. ಅವಳಿ ನಗರದಲ್ಲಿ 800ಕ್ಕೂ ಅಧಿಕ ಕ್ವಾರ್ಟರ್ಸ್ಗಳಿವೆ. ಒಂದು ಮನೆ ಆಯ್ಕೆ ಮಾಡಲು ಸಿಬ್ಬಂದಿಯಿಂದ 5ರಿಂದ 8 ಸಾವಿರ ರೂ. ಲಂಚ ಪಡೆಯುತ್ತಾರೆ. ಕಾರವಾರ ರಸ್ತೆಯ ಹೊಸ ಕ್ವಾರ್ಟರ್ಸ್ನ ಡಬಲ್ ಬೆಡ್ ರೂಮ್ ಮನೆಗೆ 10ರಿಂದ 20 ಸಾವಿರ ರೂ.ವರೆಗೆ ಲಂಚ ಪಡೆಯಲಾಗುತ್ತಿದೆ ಎಂಬ ಗಂಭೀರ ಆರೋಪ ಕೇಳಿ ಬಂದಿದೆ.
50 ಸಾವಿರ ರೂ.ಗೆ ಗನ್ವ್ಯಾನ್ ನಿಯುಕ್ತಿ
ನಗರದ ಗಣ್ಯರೊಬ್ಬರ ಬಳಿ ಇದ್ದ ಗನ್ವ್ಯಾನ್ ಒಬ್ಬರು ಇತ್ತೀಚೆಗೆ ನಿವೃತ್ತಿ ಹೊಂದಿದ್ದರು. ಆ ಜಾಗಕ್ಕೆ ಗನ್ವ್ಯಾನ್ ಆಗಿ ನಿಯುಕ್ತಿಗೊಳಿಸಲು ಮೇಲಧಿಕಾರಿಯೊಬ್ಬರು ಬರೊಬ್ಬರಿ 50 ಸಾವಿರ ರೂಪಾಯಿ ಪಡೆದಿದ್ದಾರೆ. ಅಧಿಕಾರಿಗಳ ಗನ್ವ್ಯಾನ್ ಆಗಲು 10ರಿಂದ 20 ಸಾವಿರ ರೂ. ಪಡೆದಿದ್ದಾರೆ ಎಂಬ ಆರೋಪ ಕೇಳಿ ಬಂದಿದೆ.
ಬ್ಯಾಂಕ್ ಎಸ್ಕಾರ್ಟ್ ಭತ್ಯೆ ಗುಳುಂ
ಎಸ್ಕಾರ್ಟ್ ಕರ್ತವ್ಯಕ್ಕೆ ಬರುವ ಸಿಬ್ಬಂದಿಗೆ ಬ್ಯಾಂಕ್ನವರು ಭತ್ಯೆ ನೀಡುತ್ತಾರೆ. ಆರ್ಎಸ್ಐಗೆ 1,500 ರೂ., ಎಎಸ್ಐಗೆ 1,000 ರೂ., ಕಾನ್ಸ್ಟೇಬಲ್ಗೆ 500 ರೂ. ಊಟದ ಭತ್ಯೆ ಕೊಡುತ್ತಾರೆ. ಈ ಹಣವನ್ನೂ ಬಿಡದ ಆರ್ಪಿಐ ಒಬ್ಬರು ನೇರವಾಗಿ ಬ್ಯಾಂಕ್ ಅಧಿಕಾರಿ ಬಳಿ ಹೋಗಿ ಹಣ ವಸೂಲಿ ಮಾಡುತ್ತಿದ್ದರು. ಈ ಬಗ್ಗೆಯೂ ಸಿಬ್ಬಂದಿ ಪೊಲೀಸ್ ಆಯುಕ್ತರ ಬಳಿ ದೂರಿದ್ದಾರೆ.
ಸಿಎಆರ್ ಸಿಬ್ಬಂದಿ ಬಳಿ ರಜೆಗಾಗಿ ಲಂಚ ಪಡೆಯುವ ಆರೋಪ ಕುರಿತು ಪರಿಶೀಲಿಸುವಂತೆ ಸಿಎಆರ್ ಡಿಸಿಪಿ ಎಸ್.ಸಿ. ಯಾದವ ಅವರಿಗೆ ಸೂಚಿಸಿದ್ದೇನೆ. ಬ್ಯಾಂಕ್ ಎಸ್ಕಾರ್ಟ್ಗೆ ನಿಯೋಜನೆಗೊಂಡ ಸಿಬ್ಬಂದಿಗೆ ಬ್ಯಾಂಕ್ನವರು ನೀಡುವ ಭತ್ಯೆಯನ್ನೂ ಅಧಿಕಾರಿಗಳು ವಸೂಲಿ ಮಾಡಿದ ಕುರಿತು ವಿಚಾರಣೆ ನಡೆಸುತ್ತಿದ್ದೇನೆ. ಆರೋಪ ಸಾಬೀತಾದರೆ ಕ್ರಮ ಕೈಗೊಳ್ಳಲಾಗುವುದು.
| ಲಾಭೂರಾಮ, ಪೊಲೀಸ್ ಆಯುಕ್ತ