ಚೆನ್ನೈ: ಧನುಶ್ ಅಭಿನಯದ ತಮಿಳು ಚಿತ್ರ ಕರ್ಣನ್ ಸರಿಯಾಗಿ ಒಂದು ತಿಂಗಳ ಹಿಂದೆ, ಅಂದರೆ ಏಪ್ರಿಲ್ 09ರಂದು ಬಿಡುಗಡೆಯಾಯಿತು. ಚಿತ್ರಕ್ಕೆ ಪ್ರೇಕ್ಷಕರಿಂದ ಮೆಚ್ಚುಗೆಯೂ ವ್ಯಕ್ತವಾಯಿತು. ಈ ಮಧ್ಯೆ, ಕೆಲವು ಕಡೆ ಕರೊನಾ ಎರಡನೇ ಅಲೆಯಿಂದಾಗಿ ಕೆಲವು ಕಡೆ ಚಿತ್ರಪ್ರದರ್ಶನ ನಿಂತಿತು. ಈ ಸಂದರ್ಭದಲ್ಲಿ ಚಿತ್ರವನ್ನು ಓಟಿಟಿಯಲ್ಲಿ ಬಿಡುಗಡೆ ಮಾಡಲಾಗುತ್ತದೆ ಎಂದು ಹೇಳಲಾಗಿತ್ತು. ಆದರೆ, ಯಾವಾಗ ಮತ್ತು ಎಲ್ಲಿ ಎಂಬ ಪ್ರಶ್ನೆಗೆ ಉತ್ತರ ಸಿಕ್ಕಿರಲಿಲ್ಲ.
ಇದನ್ನೂ ಓದಿ: ಕ್ಯಾನ್ಸರ್ ಚಿಕಿತ್ಸೆಯ ನಂತರ ಮೊದಲ ಬಾರಿಗೆ ಕಾಣಿಸಿಕೊಂಡ ಕಿರಣ್ ಖೇರ್
ಇದೀಗ ಈ ಪ್ರಶ್ನೆಗಳಿಗೆ ಉತ್ತರ ಸಿಕ್ಕಿದ್ದು, ಮೇ 14ರಂದು ಕರ್ಣನ್ ಚಿತ್ರವು ಅಮೇಜಾನ್ ಪ್ರೈಮ್ನಲ್ಲಿ ಬಿಡಗುಡೆಯಾಗಲಿದೆ ಎಂಬ ಸುದ್ದಿಯೊಂದು ಬಂದಿದೆ. ಮಾರಿ ಸೆಲ್ವರಾಜ್ ನಿರ್ದೇಶನದ ಈ ಚಿತ್ರದಲ್ಲಿ ಧನುಶ್ ಜತೆಗೆ ಮಲಯಾಳಂ ನಟಿ ರಜಿಶ್ಯಾ ವಿಜಯನ್, ಯೋಗಿ ಬಾಬು, ಲಾಲ್ ಮುಂತಾದವರು ನಟಿಸಿದ್ದಾರೆ.
ಕಳೆದ ಒಂದು ತಿಂಗಳಲ್ಲಿ ಅಮೇಜಾನ್ ಪ್ರೈಮ್ನಲ್ಲಿ ಹಲವು ಹೊಸ ಚಿತ್ರಗಳು ಬಿಡುಗಡೆಯಾಗಿವೆ. ಪುನೀತ್ ರಾಜಕುಮಾರ್ ಅಭಿನಯದ ಯುವರತ್ನ, ದರ್ಶನ್ ಅಭಿನಯದ ರಾಬರ್ಟ್, ಪರಿಣಿತಿ ಚೋಪ್ರಾ ಅಭಿನಯದ ಸೈನಾ, ಜಾನ್ ಅಬ್ರಹಾಂ ಅಭಿನಯದ ಮುಂಬೈ ಸಾಗಾ, ಕಾರ್ತಿ ಅಭಿನಯದ ಸುಲ್ತಾನ್ ಮುಂತಾದ ಹಲವು ಚಿತ್ರಗಳು ಬಿಡುಗಡೆಯಾಗಿವೆ.
ಇದನ್ನೂ ಓದಿ: ನಮ್ಮಪ್ಪನನ್ನು ಮೀರಿಸೋಕೆ ಸಾಧ್ಯವಿಲ್ಲ ಎಂದು ಅಭಿಷೇಕ್ ಹೇಳಿದ್ದೇಕೆ?
ಈ ಸಾಲಿಗೆ ಇದೀಗ ಕರ್ಣನ್ ಸಹ ಸೇರಿಕೊಂಡಿದೆ. ವಿಶೇಷವೆಂದರೆ, ಮೇ 13ರಂದು ಸಲ್ಮಾನ್ ಖಾನ್ ಅಭಿನಯದ ರಾಧೇ ಚಿತ್ರವು ಬಿಡುಗಡೆಯಾಗುತ್ತಿದ್ದು, ಅದರ ಮರುದಿನವವೇ ಕರ್ಣನ್ ಸಹ ಬಿಡುಗಡೆಯಾಗುತ್ತಿದೆ.