ಆಭರಣ ಮಾಡಿಕೊಡುವೆ ಎಂದಾತನಿಗೆ 10 ಕಿಲೋ ಚಿನ್ನ ಕೊಟ್ಟ ಜ್ಯುವೆಲರಿ ಶಾಪ್ ಮಾಲೀಕ!

ಬೆಂಗಳೂರು: ಆಭರಣ ತಯಾರಿಸಿ ಕೊಡುವುದಾಗಿ ಜ್ಯುವೆಲರಿ ಮಳಿಗೆ ಮಾಲೀಕನಿಂದ 10 ಕೆ.ಜಿ. ಚಿನ್ನದ ಬಿಸ್ಕತ್ ಪಡೆದಿದ್ದ ಆಭರಣ ತಯಾರಕ, 4.5 ಕೆ.ಜಿ. ಚಿನ್ನದೊಂದಿಗೆ ಪರಾರಿಯಾಗಿದ್ದಾನೆ. ಆರ್​ಎಂವಿ ಲೇಔಟ್ ನಿವಾಸಿ ಸುನೀಲ್​ಕುಮಾರ್ ವಂಚನೆ ಗೊಳಗಾದವರು. ಅವರು ಕೊಟ್ಟ ದೂರಿನ ಮೇರೆಗೆ ಸುರೇಶ್ ಆಚಾರಿ (37) ಎಂಬಾತನ ವಿರುದ್ಧ ಉಪ್ಪಾರ ಪೇಟೆ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.

ಸುನೀಲ್​ಕುಮಾರ್ ಕಳೆದ 5 ವರ್ಷದಿಂದ ಗಾಂಧಿನಗರದ 5ನೇ ಕ್ರಾಸ್​ನಲ್ಲಿ ಜ್ಯುವೆಲರಿ ಮಳಿಗೆ ಇಟ್ಟುಕೊಂಡಿದ್ದಾರೆ. ಅದೇ ಕಟ್ಟಡ ಕೊಠಡಿಯೊಂದರಲ್ಲಿ ಸುರೇಶ್ ಆಚಾರಿ ಆಭರಣ ತಯಾರಿಸುವ ಕೆಲಸ ಮಾಡಿಕೊಂಡಿದ್ದ. ಸುನೀಲ್​ಗೆ ಸಂಬಂಧಿಸಿದ ಆಭರಣಗಳನ್ನು ಸುರೇಶ್ ತಯಾರಿಸಿಕೊಡುತ್ತಿದ್ದ. 2018ರಲ್ಲಿ ಏಕಾಏಕಿ ಅಂಗಡಿ ಮುಚ್ಚಿಕೊಂಡು ಹೋಗಿದ್ದ. ಇದೇ ಜನವರಿಯಲ್ಲಿ ಮರಳಿ ಬಂದಿದ್ದು, ಅನಾರೋಗ್ಯದ ಹಿನ್ನೆಲೆಯಲ್ಲಿ ಅಂಗಡಿ ತೆರೆದಿರಲಿಲ್ಲ. ಇನ್ನು ಮುಂದೆ ಕೆಲಸ ಮಾಡುತ್ತೇನೆ ಎಂದಿದ್ದ.

ಇದನ್ನೂ ಓದಿ: ನ್ಯಾಯಾಲಯಗಳ ವಿರುದ್ಧ ವೃಥಾ ಟೀಕೆ ಅಕ್ಷಮ್ಯ

ಆತನ ಮಾತನ್ನು ನಂಬಿದ ಸುನೀಲ್, ಆಭರಣ ತಯಾರಿಸಿಕೊಡುವಂತೆ ಸೂಚಿಸಿ ಹಂತಹಂತವಾಗಿ 10 ಕೆ.ಜಿ. ಚಿನ್ನದ ಬಿಸ್ಕತ್ ಕೊಟ್ಟಿದ್ದರು. ಇದರಲ್ಲಿ 5.5 ಕೆಜಿ ಚಿನ್ನಾಭರಣ ತಯಾರಿಸಿಕೊಟ್ಟಿದ್ದ. ಉಳಿದ 4.5 ಕೆಜಿ ಚಿನ್ನದ ಬಿಸ್ಕತ್​ನಲ್ಲಿ ಆಭರಣ ತಯಾರಿಸಿಕೊಟ್ಟಿರಲಿಲ್ಲ. ಇತ್ತೀಚೆಗೆ ಕರೆ ಮಾಡಿದಾಗ ಸುರೇಶ್ ಸಂಪರ್ಕಕ್ಕೆ ಸಿಕ್ಕಿಲ್ಲ. ವಂಚಿಸಿರುವುದು ಗೊತ್ತಾಗಿ ದೂರು ಕೊಟ್ಟಿದ್ದಾರೆ.

https://www.vijayavani.net/nandondu-kathe-june-11-2020/