ಜಿನೇವಾ: ಸ್ವಿಜರ್ಲ್ಯಾಂಡ್ನ ಜಿನೇವಾದಲ್ಲಿ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಸಮಿತಿಯ 43ನೇ ಸಭೆ ನಡೆಯುತ್ತಿದ್ದು, ಅಲ್ಲೇ ಹೊರಗೆ ಕಪ್ಪುಬಣ್ಣದ ಬ್ಯಾನರ್ ಒಂದು ರಾರಾಜಿಸುತ್ತಿದೆ. ಅದರಲ್ಲಿ, ” ಪಾಕ್ ಆರ್ಮಿ ಎಪಿಸೆಂಟರ್ ಆಫ್ ಇಂಟರ್ನ್ಯಾಷನಲ್ ಟೆರರಿಸಂ” ಎಂಬ ಸಂದೇಶವೂ ಇದೆ.
ಬ್ರೋಕನ್ ಚೇರ್ ಸ್ಮಾರಕದ ಸಮೀಪವೇ ಇರುವ ಈ ಬ್ಯಾನರ್ ಈಗ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನಸೆಳೆದಿದ್ದು, ಪಾಕ್ಗೆ ತಲೆನೋವಾಗಿ ಪರಿಣಮಿಸಿದೆ. ಜಮ್ಮು-ಕಾಶ್ಮೀರದಲ್ಲಿ ನಡೆಯುತ್ತಿರುವ ಧನಾತ್ಮಕ ಬೆಳವಣಿಗೆ ತಡೆಯುವುದಕ್ಕಾಗಿ ಪಾಕ್ ನಡೆಸುತ್ತಿರುವ ಎಲ್ಲ ಪ್ರಯತ್ನಗಳೂ ವಿಫಲವಾಗತೊಡಗಿವೆ. ಭಯೋತ್ಪಾದಕ ಸಂಘಟನೆಗಳನ್ನು ಸಾಕಿ, ಸಲಹಿ ಛೂಬಿಡುವ ಪ್ರಯತ್ನವನ್ನು ಕೈಬಿಡಬೇಕು ಎಂದು ಪಾಕಿಸ್ತಾನಕ್ಕೆ ಭಾರತ ಸಲಹೆ ನೀಡಿದ ಮಾರನೇ ದಿನ ಜಿನೇವಾದಲ್ಲಿ ಈ ಬ್ಯಾನರ್ ಕಂಡುಬಂದಿದೆ.
ಅಷ್ಟೇ ಅಲ್ಲ, ಫೈನಾನ್ಶಿಯಲ್ ಆ್ಯಕ್ಷನ್ ಟಾಸ್ಕ್ ಫೋರ್ಸ್(ಎಫ್ಎಟಿಎಫ್) ಕಳೆದ ವಾರವಷ್ಟೇ ಪಾಕಿಸ್ತಾನವನ್ನು ಬೂದು ಪಟ್ಟಿಯಲ್ಲಿ ಉಳಿಸಿ, ಉಗ್ರರು, ಉಗ್ರ ಸಂಘಟನೆಗಳ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳುವಂತೆ ಎಚ್ಚರಿಸಿದ್ದನ್ನೂ ಇಲ್ಲಿ ಸ್ಮರಿಸಬಹುದು.
ಮುಂಬೈ ಮತ್ತು ಪಠಾಣ್ ಕೋಟ್ ದಾಳಿಯ ಸಂಚುಕೋರರ ವಿರುದ್ಧ ಕ್ರಮ ತೆಗೆದುಕೊಳ್ಳುವಂತೆ ಅಮೆರಿಕವೂ ಪಾಕಿಸ್ತಾನಕ್ಕೆ ಒತ್ತಡ ಹೇರಿತ್ತು. ಅಲ್ಲದೆ, ಅಲ್ಕೈದಾ, ಐಎಸ್ಐಎಸ್, ಲಷ್ಕರ್-ಏ-ತೊಯ್ಬಾ, ಜೈಷ್-ಏ-ಮೊಹಮ್ಮದ್, ಹಕ್ಕಾನಿ ನೆಟ್ವರ್ಕ್, ಹಿಜ್ಬುಲ್ ಮುಜಾಹಿದ್ದೀನ್, ತಾರೀಕ್ ಏ ತಾಲೀಬಾನ್ ಮತ್ತು ಇತರೆ ಉಗ್ರ ಸಂಘಟನೆಗಳ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳುವಂತೆಯೂ ಸೂಚಿಸಿತ್ತು. ಈಗ ಈ ಎಲ್ಲ ಬೆಳವಣಿಗೆಗಳಿಗೆ ಪೂರಕವಾಗಿ ಈ ಬ್ಯಾನರ್ ಕಾಣಿಸಿದ್ದು, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪಾಕ್ ತಲೆಬಾಗುವಂತೆ ಮಾಡಿದೆ. (ಏಜೆನ್ಸೀಸ್)