ಹಾನಗಲ್ಲ: ನ್ಯೂನತೆಯುಳ್ಳ ಮತದಾರರ ಪಟ್ಟಿಯನ್ನು ಪರಿಷ್ಕರಿಸುವವರೆಗೆ ಗ್ರಾಮ ಪಂಚಾಯಿತಿ ಚುನಾವಣೆ ನಡೆಸಬಾರದು ಎಂದು ತಾಲೂಕಿನ ಬೈಚವಳ್ಳಿ ಗ್ರಾಮದ 1 ಹಾಗೂ 2ನೇ ವಾರ್ಡ್ನ ಅಭ್ಯರ್ಥಿಗಳು ತಹಸೀಲ್ದಾರ್ಗೆ ಮನವಿ ಸಲ್ಲಿಸಿದರು.
ಬೈಚವಳ್ಳಿ ಗ್ರಾಮದ ಮತದಾರರ ಪಟ್ಟಿಯನ್ನು 2015ರಂತೆ ಮುಂದುವರಿಸಬೇಕು. 1ನೇ ವಾರ್ಡ್ನಲ್ಲಿ 774, 2ನೇ ವಾರ್ಡ್ನಲ್ಲಿ 650 ಮತದಾರರ ಹೆಸರುಗಳಿದ್ದವು. ಈಗ 2020ರಲ್ಲಿ ಪರಿಷ್ಕರಿಸಿರುವ ಮತದಾರರ ಯಾದಿಯಲ್ಲಿ 1ನೇ ವಾರ್ಡ್ಗೆ 1050 ಹಾಗೂ 2ನೇ ವಾರ್ಡ್ಗೆ 348 ಮತದಾರರ ಹೆಸರುಗಳಿವೆ. ಪ್ರತಿ ವಾರ್ಡ್ನಲ್ಲಿ ಒಂದು ಸದಸ್ಯ ಸ್ಥಾನಕ್ಕೆ ಕನಿಷ್ಠ 250 ಮತದಾರರಿರಬೇಕೆಂಬ ನಿಯಮವಿದೆ. 2ನೇ ವಾರ್ಡ್ಗೆ 2 ಸದಸ್ಯ ಸ್ಥಾನಗಳಿದ್ದರೂ, ಮತದಾರರ ಸಂಖ್ಯೆ ಕಡಿಮೆಯಾಗಿರುವುದು ಆಶ್ಚರ್ಯ ತರಿಸಿದೆ. ಇದಕ್ಕೆ ಕಂದಾಯ ಇಲಾಖೆ ಅಧಿಕಾರಿಗಳು ಹೊಣೆಗಾರರಾಗಿದ್ದಾರೆ. ಈ ಸಮಸ್ಯೆ ಪರಿಹರಿಸುವಂತೆ ಗ್ರಾಮಲೆಕ್ಕಾಧಿಕಾರಿಗಳ ಗಮನಕ್ಕೆ ತಂದಾಗ ಸರಿಪಡಿಸುವ ಭರವಸೆ ನೀಡಿದ್ದರು. ಆದರೂ ಸಮಸ್ಯೆಯಾಗಿದೆ ಎಂದು ಮನವಿಯಲ್ಲಿ ತಿಳಿಸಿದ್ದಾರೆ.
ಬೈಚವಳ್ಳಿ ಗ್ರಾಮದ 2 ವಾರ್ಡ್ಗಳ ಮತದಾರರ ಪಟ್ಟಿಯನ್ನು 2015 ರಲ್ಲಿರುವಂತೆ ಪರಿಷ್ಕರಿಸಿ ನಂತರ ಚುನಾವಣೆ ನಡೆಸಬೇಕು. ಇಲ್ಲವಾದಲ್ಲಿ ಮತದಾನ ಬಹಿಷ್ಕರಿಸುವುದಾಗಿ 1 ಹಾಗೂ 2ನೇ ವಾರ್ಡ್ನ ಅಭ್ಯರ್ಥಿಗಳಾದ ಉಮೇಶ ದಾನಪ್ಪನವರ, ನೀಲವ್ವ ಸಾವಿಕೇರಿ, ರೇಖಾ ಹಳೇಬಂಕಾಪುರ, ಶಶಿಧರ ಕೋಟಿ, ಕವನಾ ಕಲ್ಲನಗೌಡ್ರ, ಸರಸ್ವತಿ ಡುಮ್ಮಣ್ಣನವರ, ಸುಭಾಸ ನಾಗನೂರ, ರೇಖಾ ನಾಗನೂರ, ಸೋಮಪ್ಪ ಕೋಡನವರ, ಗಂಗಮಾಳವ್ವ ಕಿವುಡೇರ, ಶಂಭಣ್ಣ ಹಳೇಬಂಕಾಪುರ ಮನವಿಯಲ್ಲಿ ತಿಳಿಸಿದ್ದಾರೆ.