‘ಬಿಗ್ ಬಟರ್ಫ್ಲೈ ಮಂತ್..’
– ಹೀಗೊಂದು ಚಿಟ್ಟೆ ಮಾಸವನ್ನು ಸೆ. 5ರಿಂದ ಆಚರಿಸಲಾಗುತ್ತಿದೆ. ಈ ಸಂದರ್ಭದಲ್ಲೇ ಭಾರತದ 1,328ನೇ ಚಿಟ್ಟೆಯ ಪ್ರಭೇದ ಪತ್ತೆಯಾಗಿದೆ. ಇದರ ವೈಜ್ಞಾನಿಕ ಹೆಸರು ಸ್ಪಿಯಾಲಿಯಾ ಜೀಬ್ರಾ. ಬರೀ ಎರಡೂವರೆ ಸೆಂಟಿಮೀಟರ್ ಅಗಲ ಇರುವ ಈ ಚಿಟ್ಟೆ ಭಾರೀ ವೇಗದಲ್ಲಿ ಹಾರಬಲ್ಲದು ಎನ್ನಲಾಗಿದೆ.
ಚಿಟ್ಟೆತಜ್ಞ ಮುಖೇಶ್ ಪನ್ವರ್ ಇದನ್ನು ಪತ್ತೆ ಹಚ್ಚಿದ್ದಾರೆ. ರಾಜಸ್ಥಾನದ ಡುಂಗರ್ಪುರ್ ಜಿಲ್ಲೆಯ ಸಾಗ್ವರ ನಿವಾಸಿ ಆಗಿರುವ ಇವರು, 15 ವರ್ಷಗಳಿಂದ ಚಿಟ್ಟೆಗಳ ಕುರಿತು ಅಧ್ಯಯನ ನಡೆಸುತ್ತಿರುವ ವಗಡ್ ನೇಚರ್ ಕ್ಲಬ್ನ ಸದಸ್ಯ.
ಇವರು 2014ರ ನ. 8ರಂದು ಸಾಗ್ವರದ ಧನ್ರಾಜ್ ಫಾರ್ಮ್ ಹೌಸ್ನಲ್ಲಿ ಈ ಚಿಟ್ಟೆಯನ್ನು ಕಂಡಿದ್ದರು. ಇದರ ಫೋಟೋ ತೆಗೆದುಕೊಂಡಿದ್ದ ಮುಖೇಶ್ ಉತ್ತರಾಖಂಡದ ಭಿಮ್ಟಲ್ನ ಬಟರ್ ಫ್ಲೈ ರಿಸರ್ಚ್ ಇನ್ಸ್ಟಿಟ್ಯೂಟ್ಗೆ ಕಳುಹಿಸಿದ್ದರು. ಆರು ವರ್ಷಗಳ ಅಧ್ಯಯನದ ಬಳಿಕ ಈ ಸಂಸ್ಥೆಯ ನಿರ್ದೇಶಕ, ಈ ಚಿಟ್ಟೆಯನ್ನು ಭಾರತದ 1,328ನೇ ಪ್ರಭೇದ ಎಂಬುದಾಗಿ ಘೋಷಿಸಿದ್ದಾರೆ. (ಏಜೆನ್ಸೀಸ್)