ಜೊಹಾನ್ಸ್ಬರ್ಗ್: ಕರೊನಾ ವೈರಸ್ನಿಂದ ಇತ್ತೀಚೆಗೆ ಭಾರತೀಯ ಶೆಫ್ ಫ್ಲಾಯ್ಡ್ ಕಾರ್ಡೋಜ್ ನ್ಯೂಜೆರ್ಸಿಯ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದರು.
ಇದೀಗ ಭಾರತೀಯ ಮೂಲದ ಸೂಕ್ಷ್ಮರೋಗಾಣು ತಜ್ಞ(ವೈರಲಾಜಿಸ್ಟ್) ರಾದ ಗೀತಾ ರಾಮ್ ಜೀ (64) ಅವರು ಕರೋನಾದಿಂದ ಸಾವನ್ನಪ್ಪಿದ್ದಾರೆ. ಗೀತಾ ರಾಮ್ ಜೀ ಭಾರತೀಯರಾದರೂ ದಕ್ಷಿಣ ಆಫ್ರಿಕಾ ನಿವಾಸಿಯಾಗಿದ್ದರು.
ಗೀತಾ ರಾಮ್ ಜೀ ಲಸಿಕಾ ವಿಜ್ಞಾನಿ ಮತ್ತು ದಕ್ಷಿಣ ಆಫ್ರಿಕಾದ ವೈದ್ಯಕೀಯ ಸಂಶೋಧನಾ ಮಂಡಳಿಯ (ಎಸ್‌ಎಎಂಆರ್‌ಸಿ) ಡರ್ಬನ್‌ನಲ್ಲಿರುವ ಕಚೇರಿಗಳ ಎಚ್ಐವಿ ತಡೆಗಟ್ಟುವಿಕೆ ಸಂಶೋಧನಾ ಘಟಕದ ಮುಖ್ಯಸ್ಥೆ. ಇವರು ವಾರದ ಹಿಂದಷ್ಟೇ ಲಂಡನ್ನಿಂದ ದಕ್ಷಿಣ ಆಫ್ರಿಕಾಕ್ಕೆ ವಾಪಸ್ ಆಗಿದ್ದರು. ಆದರೆ ಅವರಲ್ಲಿ ಕೊವಿಡ್-19ರ ಯಾವುದೇ ಲಕ್ಷಣಗಳೂ ಕಂಡುಬಂದಿರಲಿಲ್ಲ.
ಎಸ್‌ಎಎಂಆರ್‌ಸಿಯ ಅಧ್ಯಕ್ಷೆ ಮತ್ತು ಸಿಇಒ ಆಗಿರುವ ಗ್ಲೆಂಡಾ ಗ್ರೇ ಅವರು ಗೀತಾ ರಾಮ್ ಜೀ ಸಾವಿಗೆ ಸಂತಾಪ ವ್ಯಕ್ತಪಡಿಸಿದ್ದಾರೆ. ಹಾಗೇ ಗೀತಾ ಕರೊನಾದಿಂದ ಮೃತಪಟ್ಟಿದ್ದಾಗಿ ದೃಢಪಡಿಸಿದ್ದಾರೆ.
ಎಚ್ಐವಿ ತಡೆಗಟ್ಟುವ ಹೊಸ ವಿಧಾನಗಳ ಬಗ್ಗೆ ನಿರಂತರ ಸಂಶೋಧನೆಯಲ್ಲಿ ತೊಡಗಿಕೊಂಡಿದ್ದ ಗೀತಾ ರಾಮ್ ಜೀ ಅವರ ಜೀವಮಾನ ಸಾಧನೆಗಾಗಿ ಯುರೋಪಿಯನ್ ಡೆವಲಪ್ಮೆಂಟ್ ಕ್ಲಿನಿಕಲ್ ಟ್ರಯಲ್ಸ್ ಪಾರ್ಟ್ನರ್ಶಿಪ್ನಿಂದ 2018ರಲ್ಲಿ ಅತ್ಯುತ್ತಮ ಮಹಿಳಾ ವಿಜ್ಞಾನಿ ಪ್ರಶಸ್ತಿ ಪ್ರದಾನ ಮಾಡಲಾಗಿತ್ತು. ಈ ಕಾರ್ಯಕ್ರಮ ಲಿಸ್ಬನ್ನಲ್ಲಿ ನಡೆದಿತ್ತು.
ಗೀತಾ ರಾಮ್ ಜೀ ಅವರ ಪತಿ ಪ್ರವೀಣ್ ರಾಮ್ ಜೀ ಕೂಡ ಭಾರತೀಯ ಮೂಲದ ದಕ್ಷಿಣ ಆಫ್ರಿಕಾ ಫಾರ್ಮಾಸಿಸ್ಟ್. ದಕ್ಷಿಣ ಆಫ್ರಿಕಾದಲ್ಲಿ ಇದುವರೆಗೆ ಐವರು ಕರೊನಾಕ್ಕೆ ಬಲಿಯಾಗಿದ್ದಾರೆ. ದೇಶದಲ್ಲಿ ಲಾಕ್ಡೌನ್ ಜಾರಿಯಲ್ಲಿದೆ. (ಏಜೆನ್ಸೀಸ್)