ಮುಂಬೈ: ‘ಕಾಶ್ಮೀರ್ ಫೈಲ್ಸ್’ ವಿರುದ್ಧ ಟೀಕೆ ಮಾಡಿದ್ದ ಇಸ್ರೇಲ್ ನಿರ್ಮಾಪಕ ನಡಾವ್ ಲ್ಯಾಪಿಡ್ ಇತ್ತೀಚೆಗಷ್ಟೇ ತಮ್ಮ ಹೇಳಿಕೆಗೆ ಕ್ಷಮೆ ಕೇಳಿದ್ದರು. ಅಲ್ಲಿಗೆ ಸಮಸ್ಯೆ ಬಗೆಹರಿಯಿತು ಎಂದುಕೊಳ್ಳುವಷ್ಟರಲ್ಲೇ, ಲ್ಯಾಪಿಡ್ ಹೇಳಿದ್ದು ಸರಿ ಎಂದು ಆಯ್ಕೆ ಸಮತಿಯ ಮೂವರು ಸದಸ್ಯರು ಹೇಳಿದ್ದಾರೆ. ‘ದಿ ಕಾಶ್ಮೀರ್ ಫೈಲ್ಸ್’ ನಿಜಕ್ಕೂ ಕೆಟ್ಟ ಮತ್ತು ಅಸಭ್ಯ ಚಿತ್ರವಾಗಿತ್ತು ಎಂದು ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ಡಿ.9ಕ್ಕೆ ‘ವಿಜಯಾನಂದ’ ಸೇರಿದಂತೆ 11 ಕನ್ನಡ ಚಿತ್ರಗಳ ಬಿಡುಗಡೆ …
ಇತ್ತೀಚೆಗಷ್ಟೇ ಮುಕ್ತಾಯವಾದ ಇಂಟರ್ನ್ಯಾಷನಲ್ ಫಿಲ್ಮ್ ಫೆಸ್ಟಿವಲ್ ಆಫ್ ಇಂಡಿಯಾದ (IFFI) ಸ್ಪರ್ಧಾತ್ಮಕ ಚಿತ್ರ ವಿಭಾಗದಲ್ಲಿ ‘ದಿ ಕಾಶ್ಮೀರ್ ಫೈಲ್ಸ್’ ಚಿತ್ರವು ಪ್ರದರ್ಶನಗೊಂಡಿತ್ತು. ಈ ಸ್ಪರ್ಧಾತ್ಮಕ ವಿಭಾಗದ ಮುಖ್ಯಸ್ಥರಾಗಿದ್ದ ನಾಡವ್ ಲ್ಯಾಪಿಡ್, ಚಿತ್ರದ ಬಗ್ಗೆ ಕೆಟ್ಟದಾಗಿ ಮಾತನಾಡಿದ್ದರು. ಲ್ಯಾಪಿಡ್ ಅವರ ಹೇಳಿಕೆಗೆ ವ್ಯಾಪಕ ಟೀಕೆಗಳು ವ್ಯಕ್ತವಾಗಿದ್ದವು. ನಟ ಅನುಪಂ ಖೇರ್, ದರ್ಶನ್ ಕುಮಾರ್ ಮುಂತಾದವರು ಲ್ಯಾಪಿಡ್ ಅವರ ಮಾತುಗಳನ್ನು ಖಂಡಿಸಿದ್ದರು. ಇನ್ನು, ಭಾರತದಲ್ಲಿ ಇಸ್ರೇಲ್ ರಾಯಭಾರಿಯಾಗಿರುವ ನವೋರ್ ಗಿಲಾನ್, ಲ್ಯಾಪಿಡ್ಗೆ ಮೊದಲು ಕ್ಷಮೆ ಕೇಳುವಂತೆ ಆಗ್ರಹಿಸಿದ್ದರು.
ಒತ್ತಡ ಹೆಚ್ಚಾದಂತೆ, ನಡಾವ್ ಕ್ಷಮೆ ಕೇಳಿದ್ದರು. ‘ಕಾಶ್ಮೀರಿ ಪಂಡಿತಾಗಾಗಲಿ ಅಥವಾ ನೊಂದವರ ಜನರ ಭಾವನೆಗಳನ್ನು ಅವಮಾನಿಸುವ ಉದ್ದೇಶವೂ ನನ್ನದಾಗಿರಲಿಲ್ಲ. ಆದರೂ ನನ್ನ ಹೇಳಿಕೆಯಿಂದ ಯಾರಿಗೆಲ್ಲ ನೋವಾಗಿದೆಯೋ ನಾನು ಸಂಪೂರ್ಣವಾಗಿ ಕ್ಷಮೆ ಯಾಚಿಸುತ್ತೇನೆ’ ಎಂದಿದ್ದರು. ಆದರೆ, ಇದೀಗ ಈ ಸಮಿತಿಯ ಮೂವರು ಸದಸ್ಯರು ಲ್ಯಾಪಿಡ್ ಹೇಳಿದ್ದೇ ಸರಿ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: ‘ವಿರಾಟಪುರ ವಿರಾಗಿ’ ಚಿತ್ರದ ಫಸ್ಟ್ಲುಕ್ ಬಿಡುಗಡೆ; ಹಾನಗಲ್ ಕುಮಾರ ಶಿವಯೋಗಿಗಳ ಜೀವನಾಧಾರಿತ ಚಿತ್ರ ಜ.12ಕ್ಕೆ ತೆರೆಗೆ …
ಈ ಸಮತಿಯಲ್ಲಿದ್ದ ಜಿಂಕೋ ಗೋಟೋ, ಪಾಸ್ಕಲ್ ಚಾವನ್ಸ್ ಮತ್ತು ಜೇವಿಯರ್ ಆಂಗುಲೋ ಬರುತ್ರೇನ್, ಲ್ಯಾಪಿಡ್ ಪರವಾಗಿ ಒಂದು ಜಂಟಿ ಪತ್ರಿಕಾ ಪ್ರಕಟಣೆಯನ್ನು ಹೊರಡಿಸಿದ್ದಾರೆ. ಈ ಕುರಿತು ಟ್ವೀಟ್ ಮಾಡಿರುವ ಅವರು, ‘ಚಿತ್ರೋತ್ಸವದ ಮುಕ್ತಾಯ ಸಮಾರಂಭದಲ್ಲಿ ಲ್ಯಾಪಿಡ್, ‘ದಿ ಕಾಶ್ಮೀರ್ ಫೈಲ್ಸ್’ ಚಿತ್ರದ ಬಗ್ಗೆ ಮಾತನಾಡಿದ್ದರು. ನಿಜ ಹೇಳಬೇಕೆಂದರೆ, ಆ ಚಿತ್ರ ನೋಡಿ ನಾವೆಲ್ಲ ಶಾಕ್ ಆಗಿದ್ದೆವು. ಆ ಚಿತ್ರವು ಅಸಭ್ಯವಷ್ಟೇ ಅಲ್ಲ, ಇಂಥದ್ದೊಂದು ದೊಡ್ಡ ಚಿತ್ರೋತ್ಸವದ ಸ್ಪರ್ಧಾತ್ಮಕ ವಿಭಾಗದಲ್ಲಿ ಪ್ರದರ್ಶನವಾಗುವ ಚಿತ್ರವೇ ಅಲ್ಲ. ಸಮಿತಿ ಸದಸ್ಯರಾದ ನಾವು ಅವರ ಮಾತಿಗೆ ಬದ್ಧರಾಗಿದ್ದೇವೆ. ಈ ಚಿತ್ರದ ರಾಜಕೀಯ ನಿಲುವಿನ ಬಗ್ಗೆ ನಾವು ಮಾತನಾಡುತ್ತಿಲ್ಲ. ನಾವು ಕಲಾತ್ಮಕವಾಗಿ ಮಾತನಾಡುತ್ತಿದ್ದು, ಇಂಥದ್ದೊಂದು ದೊಡ್ಡ ವೇದಿಕೆಯನ್ನು ರಾಜಕೀಯ ಮಾಡುವುದಕ್ಕೆ ಬಳಸಿಕೊಳ್ಳುತ್ತಿರುವುದನ್ನು ನೋಡಿ ಬೇಸರವಾಗುತ್ತದೆ’ ಎಂದು ಹೇಳಿದ್ದಾರೆ.
#IFFI #IFFI53Goa #IFFI2022 #KashmirFiles @IndiaToday @TimesNow @TOIIndiaNews @ndtv @News18India @IndianExpress @htTweets pic.twitter.com/TIAjTyEgdb
— Jinko Gotoh (@JinkoGotoh) December 2, 2022