ನವದೆಹಲಿ: ಮುಂಬರುವ ಪ್ಯಾರಿಸ್ ಒಲಿಂಪಿಕ್ಸ್ಗೆ ಮುನ್ನವೇ 90 ಮೀಟರ್ ಗಡಿಯನ್ನು ದಾಟುವ ವಿಶ್ವಾಸವನ್ನು ಭಾರತದ ಜಾವೆಲಿನ್ ಎಸೆತದ ತಾರೆ ನೀರಜ್ ಚೋಪ್ರಾ ವ್ಯಕ್ತಪಡಿಸಿದ್ದಾರೆ. ಹಾಲಿ ವಿಶ್ವ ಮತ್ತು ಒಲಿಂಪಿಕ್ಸ್ ಚಾಂಪಿಯನ್ ನೀರಜ್, 90 ಮೀಟರ್ ಗಡಿ ದಾಟುವ ನಿಟ್ಟಿನಲ್ಲಿ ಭರದ ಸಿದ್ಧತೆ ನಡೆಸಿರುವುದಾಗಿ ತಿಳಿಸಿದ್ದಾರೆ. 2022ರ ಸ್ಟಾಕ್ಹೋಮ್ ಡೈಮಂಡ್ ಲೀಗ್ನಲ್ಲಿ 89.94 ಮೀ. ದೂರ ಎಸೆದಿರುವುದು ನೀರಜ್ರ ಇದುವರೆಗಿನ ಶ್ರೇಷ್ಠ ನಿರ್ವಹಣೆಯಾಗಿದೆ.
ಅಭ್ಯಾಸದ ವೇಳೆ ಈಗಾಗಲೆ ಹಲವು ಬಾರಿ 90 ಮೀ. ಗಡಿ ದಾಟಿರುವ ಅವರು, ಸ್ಪರ್ಧೆಗಳಲ್ಲಿ ಇನ್ನಷ್ಟೇ ಇದನ್ನು ಸಾಧಿಸಬೇಕಾಗಿದೆ. “ಪ್ಯಾರಿಸ್ಗೆ ಹೋಗುವ ಮುನ್ನವೇ 90ರ ಗಡಿ ದಾಟುವ ಪ್ರಯತ್ನದಲ್ಲಿರುವೆ. ಇದನ್ನು ಸಾಧಿಸಲು ಒಲಿಂಪಿಕ್ಸ್ವರೆಗೆ ಕಾಯಬಾರದು ಎಂದು ಅಂದುಕೊಂಡಿದ್ದೇನೆ. ಈ ನಿಟ್ಟಿನಲ್ಲಿ ಉತ್ತಮ ಸಿದ್ಧತೆ ನಡೆಸುತ್ತಿರುವೆ’ ಎಂದು 26 ವರ್ಷದ ನೀರಜ್ ಹೇಳಿದ್ದಾರೆ.
ಕಳೆದ ವರ್ಷದ ಏಷ್ಯಾನ್ ಗೇಮ್ಸ್ ಬಳಿಕ ಸ್ಪರ್ಧಾಕಣದಿಂದ ಸಂಪೂರ್ಣ ಹೊರಗುಳಿದಿರುವ ನೀರಜ್, ಮೇ 10ರಂದು ದೋಹಾ ಡೈಮಂಡ್ ಲೀಗ್ನಲ್ಲಿ ಮರಳಿ ಕಣಕ್ಕಿಳಿಯಲಿದ್ದಾರೆ. ಬಳಿಕ ಜೂನ್ 18ರಂದು ಫಿನ್ಲ್ಯಾಂಡ್ನ ಪಾವೊ ನುರ್ಮಿ ಗೇಮ್ಸ್ನಲ್ಲೂ ಸ್ಪರ್ಧಿಸಲಿದ್ದಾರೆ. ಅಲ್ಲಿ ಅವರಿಗೆ ಮೊದಲ ಬಾರಿ, 19ನೇ ವಯಸ್ಸಿನಲ್ಲೇ 90 ಮೀಟರ್ ಗಡಿ ದಾಟಿರುವ ಜರ್ಮನಿಯ ಹೊಸ ಜಾವೆಲಿನ್ ಥ್ರೋ ಸೆನ್ಸೇಶನ್ ಮ್ಯಾಕ್ಸ್ ಡೆಹ್ನಿಂಗ್ ಸವಾಲು ಎದುರಾಗಲಿದೆ.
ಆರ್ಸಿಬಿ ಬೌಲರ್ಗಳ ಬೆಂಡೆತ್ತಿದ್ದ ಇಶಾನ್-ಸೂರ್ಯಕುಮಾರ್; ಮುಂಬೈಗೆ 7 ವಿಕೆಟ್ಗಳ ಜಯ