ನವದೆಹಲಿ: ಹೊಸ ಗೌಪ್ಯತಾ ನೀತಿಯನ್ನು ಹೊರತಂದ ಬಳಿಕ ವಾಟ್ಸ್ಆ್ಯಪ್ ವಿರುದ್ಧ ಭಾರತದಲ್ಲಿ ಭಾರಿ ಆಕ್ರೋಶ ವ್ಯಕ್ತವಾಗಿದೆ. ಅಷ್ಟೇ ಅಲ್ಲದೆ, ಅನೇಕರು ವಾಟ್ಸ್ಆ್ಯಪ್ಗೆ ಕೈಮುಗಿದು ಸಿಗ್ನಲ್, ಟೆಲಿಗ್ರಾಮ್ ಕಡೆಗೆ ಮುಖಮಾಡಿದ್ದಾರೆ.
ತಮ್ಮ ಗೌಪ್ಯ ಮಾಹಿತಿ ಅಪಾಯದಲ್ಲಿದೆ ಎಂಬ ಆತಂಕದಿಂದ ಬಳಕೆದಾರರು ಬೇರೆ ಕಡೆ ಗಮನಹರಿಸಿದ್ದು, ಅದನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಇತ್ತೀಚಿಗೆ ವಾಟ್ಸ್ಆ್ಯಪ್ ಸ್ವತಃ ಸ್ಟೇಟಸ್ ಹಾಕಿ ನಿಮ್ಮ ಗೌಪ್ಯತೆಗೆ ನಾವು ಬದ್ಧ ಎಂದು ಹೇಳಿತ್ತು. ಆದರೂ ಅನೇಕರು ಈಗಾಗಲೇ ಬೇರೆ ಆಯ್ಕೆ ಮಾಡಿದ್ದಾರೆ. ಹೀಗಾಗಿ ಭಾರತದಲ್ಲಿ ಎಷ್ಟು ಮಂದಿ ವಾಟ್ಸ್ಆ್ಯಪ್ ಡಿಲೀಟ್ ಮಾಡಿದ್ದಾರೆ ಎಂಬುದರ ಸಮೀಕ್ಷೆಯು ಸಹ ನಡೆದಿದೆ.
ಆನ್ಲೈನ್ ಮೂಲಕ ನಡೆದ ಈ ಸರ್ವೆಯಲ್ಲಿ ದೇಶಾದ್ಯಂತ ಸುಮಾರು 17 ಸಾವಿರ ಮಂದಿ ಪಾಲ್ಗೊಂಡಿದ್ದರು. ಈವರೆಗೂ ಕೇವಲ ಶೇ. 5 ರಷ್ಟು ಭಾರತೀಯರು ಆ್ಯಪ್ ಡಿಲೀಟ್ ಮಾಡಿರುವುದು ಬೆಳಕಿಗೆ ಬಂದಿದೆ. ಭಾರತದಲ್ಲಿ ಒಟ್ಟು 40 ಕೋಟಿ ವಾಟ್ಸ್ಆ್ಯಪ್ ಬಳಕೆದಾರರಿದ್ದಾರೆ. ಸುಮಾರು 2 ಕೋಟಿ ಮಂದಿ ವಾಟ್ಸ್ಆ್ಯಪ್ ಖಾತೆಯನ್ನು ಡಿಲೀಟ್ ಮಾಡಿರಬಹುದು ಎಂದು ಅಂದಾಜಿಸಲಾಗಿದೆ.
ಇಷ್ಟೇ ಅಲ್ಲದೆ, ಶೇ. 21 ಮಂದಿ ವಾಟ್ಸ್ಆ್ಯಪ್ ಬಳಕೆಯನ್ನು ತಗ್ಗಿಸಿ, ಸಿಗ್ನಲ್ ಮತ್ತು ಟೆಲಿಗ್ರಾಮ್ನಂತಹ ಆ್ಯಪ್ಗಳನ್ನು ಬಳಸುತ್ತಿದ್ದಾರೆ. ಶೇ. 22 ರಷ್ಟು ಮಂದಿ ವಾಟ್ಸ್ಆ್ಯಪ್ ಬಳಕೆಯನ್ನು ಸಂಪೂರ್ಣವಾಗಿ ನಿಲ್ಲಿಸಿದ್ದಾರೆ. ಆದರೆ, ತಮ್ಮ ಖಾತೆಯನ್ನು ಡಿಲೀಟ್ ಮಾಡಿಲ್ಲ.
ಹೊಸ ಗೌಪ್ಯತಾ ನೀತಿಯಿಂದ ವಾಟ್ಸ್ಆ್ಯಪ್ಗೆ ತೀವ್ರ ಹೊಡೆತ ಬಿದ್ದಂತಾಗಿದೆ. ವಾಟ್ಸ್ಆ್ಯಪ್ ಡೇಟಾವನ್ನು ಫೇಸ್ಬುಕ್ ಅಥವಾ ಮೂರನೇ ಪಾರ್ಟಿಗಾಗಲಿ ಶೇರ್ ಮಾಡಿದರೆ, ವಾಟ್ಸ್ಆ್ಯಪ್ ಅನ್ನು ಬಳಸುವುದೇ ಇಲ್ಲ ಎಂದು ಅನೇಕರು ತಮ್ಮ ಅಭಿಪ್ರಾಯಗಳನ್ನು ಸಮೀಕ್ಷೆ ವೇಳೆ ಮಂಡಿಸಿದ್ದಾರೆ. ಶೇ. 92 ರಷ್ಟು ಮಂದಿ ಇದನ್ನೇ ಹೇಳಿದ್ದಾರೆ. 79 ರಷ್ಟು ವಾಟ್ಸ್ಆ್ಯಪ್ ಬಿಸಿನೆಸ್ ನಿಲ್ಲಿಸುವುದಾಗಿ ಎಚ್ಚರಿಸಿದ್ದಾರೆ. ವಾಟ್ಸ್ಆ್ಯಪ್ ಅನ್ನು ಪರ್ಯಾಯ ಆ್ಯಪ್ ಆಗಿ ಡೌನ್ಲೋಡ್ ಮಾಡಿಕೊಂಡಿರುವುದಾಗಿ ಶೇ. 55ರಷ್ಟು ಮಂದಿ ತಿಳಿಸಿದ್ದಾರೆ. (ಏಜೆನ್ಸೀಸ್)