'ಐತಿಹಾಸಿಕ! ಆತ್ಮವಿಶ್ವಾಸದಿಂದ ಕೂಡಿದ ಭಾರತವಿದು!' - ಹಾಕಿ ವಿಜಯಕ್ಕೆ ಪ್ರಧಾನಿ ಮೋದಿ ಹರ್ಷೋದ್ಗಾರ

ನವದೆಹಲಿ : "ಐತಿಹಾಸಿಕ! ಪ್ರತಿಯೊಬ್ಬ ಭಾರತೀಯನ ನೆನಪಿನಲ್ಲಿ ಕೆತ್ತಲಾಗುವ ದಿನವಿದು" - ಇದು ಒಲಿಂಪಿಕ್ಸ್​ ಹಾಕಿ ಪಂದ್ಯದಲ್ಲಿ ಕಂಚು ಗೆದ್ದ ಭಾರತ ತಂಡದ ರೋಮಾಂಚಕ ಸಾಧನೆಯ ಬಗೆಗೆ ಪ್ರಧಾನಿ ನರೇಂದ್ರ ಮೋದಿ ವ್ಯಕ್ತಪಡಿಸಿದ ಮೊದಲ ಪ್ರತಿಕ್ರಿಯೆ.

ಇಂದು ಬೆಳ್ಳಂಬೆಳಗ್ಗೆ ಟೋಕಿಯೋ ಒಲಿಂಪಿಕ್ಸ್​ನಲ್ಲಿ ಜರ್ಮನಿಯ ವಿರುದ್ಧ ಭಾರೀ ಹಣಾಹಣಿಯ ಪಂದ್ಯವನ್ನು 5-4 ಸ್ಕೋರ್​ನೊಂದಿಗೆ ಗೆದ್ದ ಭಾರತ ಪುರುಷರ ಹಾಕಿ ತಂಡಕ್ಕೆ ಪ್ರಧಾನಿ ಮೋದಿ ಇಂಗ್ಲೀಷ್ ಮತ್ತು ಹಿಂದಿ ಭಾಷೆಗಳೆರಡರಲ್ಲೂ ಟ್ವೀಟ್ ಮಾಡಿ, ಭಾವನಾತ್ಮಕ ಅಭಿನಂದನೆ ಸಲ್ಲಿಸಿದ್ದಾರೆ. ಪ್ರಧಾನಿ ನಿವಾಸದ ಅಧಿಕಾರಿಗಳ ಪ್ರಕಾರ, ಇಂದಿನ ಒಲಿಂಪಿಕ್ಸ್​ ಹಾಕಿ ಪಂದ್ಯವನ್ನು ನೋಡುವುದಕ್ಕಾಗಿ ಮೋದಿ ಅವರು ತಮ್ಮ ಬೆಳಗಿನ ಯೋಗ ಅಭ್ಯಾಸವನ್ನು ಬಿಟ್ಟು ಕೂತಿದ್ದರಂತೆ!

ಇದನ್ನೂ ಓದಿ: 41 ವರ್ಷಗಳ ಬಳಿಕ ಐತಿಹಾಸಿಕ ಸಾಧನೆ: ಹಾಕಿಯಲ್ಲಿ ಕಂಚು ಗೆದ್ದ ಪುರುಷರ ತಂಡ

"ದೇಶಕ್ಕೆ ಕಂಚಿನ ಪದಕ ತಂದ ಪುರುಷರ ಹಾಕಿ ತಂಡದ ಈ ಸಾಧನೆಯಿಂದ ಅವರು ಇಡೀ ದೇಶದ, ವಿಶೇಷವಾಗಿ ಯುವಜನರ, ಗಮನ ಸೆಳೆದಿದ್ದಾರೆ. ಭಾರತ ನಮ್ಮ ಹಾಕಿ ತಂಡದ ಬಗ್ಗೆ ಹೆಮ್ಮೆ ಹೊಂದಿದೆ" ಎಂದು ಇಂಗ್ಲೀಷಿನಲ್ಲಿ ಟ್ವೀಟ್ ಮಾಡಿರುವ ಮೋದಿ, "ಪ್ರಫುಲ್ಲಿತ್​ ಭಾರತ್! ಪ್ರೇರಿತ್ ಭಾರತ್! ಗರ್ವಿತ ಭಾರತ್​​!" ಎಂದು ಹಿಂದಿಯಲ್ಲಿ ಹರ್ಷೋದ್ಗಾರ ಮಾಡಿದ್ದಾರೆ.

ಮುಂದುವರೆದು, "ಟೋಕಿಯೋದಲ್ಲಿ ಹಾಕಿ ತಂಡದ ವೈಭವಯುತ ಗೆಲುವು ಇಡೀ ದೇಶಕ್ಕೆ ಹೆಮ್ಮೆಯ ಕ್ಷಣವಾಗಿದೆ. ಇದು ಹೊಸ ಭಾರತ, ಆತ್ಮವಿಶ್ವಾಸದಿಂದ ಕೂಡಿದ ಭಾರತವಾಗಿದೆ" ಎಂದು ಭಾರತದ ಆಟಗಾರರಿಗೆ ಅಭಿನಂದನೆ ಸಲ್ಲಿಸಿದ್ದಾರೆ.

ಜೊತೆಗೆ, ಭಾರತ ತಂಡದ ಕ್ಯಾಪ್ಟನ್​ ಮನ್​ಪ್ರೀತ್​ ಸಿಂಗ್, ಕೋಚ್ ಗ್ರಾಹಂ ರೈಡ್ ಮತ್ತು ಸಹಾಯಕ ಕೋಚ್ ಪಿಯೂಶ್ ದುಬೆ ಅವರಿಗೆ ದೂರವಾಣಿ ಕರೆ ಮಾಡಿ,  "ನಿಮ್ಮ ಶ್ರಮ ಫಲ ತಂದಿದೆ" ಎಂದು ಮೋದಿ ಅಭಿನಂದಿಸಿದ್ದಾರೆ. ಮೋದಿ ಅವರೊಂದಿಗಿನ ದೂರವಾಣಿ ಸಂಭಾಷಣೆಯ ಕ್ಷಣಗಳ ವಿಡಿಯೋವನ್ನು ಎಎನ್​ಐ ಸುದ್ದಿ ಸಂಸ್ಥೆ ಟ್ವಿಟರ್​ನಲ್ಲಿ ಶೇರ್ ಮಾಡಿದೆ.

ಕ್ರೀಡಾ ಸಚಿವ ಅನುರಾಗ್ ಠಾಕುರ್​ ಅವರು, "ಎ ಬಿಲಿಯನ್​ ಚೀರ್ಸ್​ ಫಾರ್​ ಇಂಡಿಯಾ! ಬಾಯ್ಸ್ ಯು ಹಾವ್ ಡನ್​​ ಇಟ್​!" ಎಂದು ಟ್ವೀಟ್ ಮಾಡಿದ್ದಾರೆ. ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಕೂಡ ಟೀಮ್ ಇಂಡಿಯಾಗೆ ಅಭಿನಂದನೆ ಸಲ್ಲಿಸಿದ್ದು, "ಇದು ಮಹತ್ವದ ಕ್ಷಣ. ಇಡೀ ದೇಶ ನಿಮ್ಮ ಬಗ್ಗೆ ಹೆಮ್ಮೆ ಹೊಂದಿದೆ" ಎಂದು ಟ್ವೀಟ್ ಮಾಡಿದ್ದಾರೆ. (ಏಜೆನ್ಸೀಸ್)

https://www.vijayavani.net/indias-ravi-kumar-reaches-finals-silver-assured/

https://www.vijayavani.net/improve-spine-strength-with-katichakraasana/