ನವದೆಹಲಿ: ಪ್ರತಿಷ್ಠಿತ ಸೇನಾ ತರಬೇತಿ ಸಂಸ್ಥೆ ನ್ಯಾಷನಲ್ ಡಿಫೆನ್ಸ್ ಅಕಾಡೆಮಿ(ಎನ್ಡಿಎ) ಸೇರಲು ಹೆಣ್ಣುಮಕ್ಕಳಿಗೆ ಈ ವರ್ಷದಿಂದಲೇ ಅವಕಾಶ ಒದಗಿಸಬೇಕೆಂಬ ಸುಪ್ರೀಂ ಕೋರ್ಟ್ ನಿರ್ದೇಶನದ ನಂತರ ಎನ್ಡಿಎ ಮತ್ತು ನೇವಲ್ ಅಕಾಡೆಮಿ ಎಕ್ಸಾಮಿನೇಷನ್, 2021 ಬರೆಯಲು ಯುವತಿಯರಿಂದ ಅರ್ಜಿ ಆಹ್ವಾನಿಸಲಾಗಿದೆ. ಈ ಬಗ್ಗೆ ಹೆಚ್ಚುವರಿ ಸುತ್ತೋಲೆ ಹೊರಡಿಸಿರುವ ಯೂನಿಯನ್ ಪಬ್ಲಿಕ್ ಸರ್ವೀಸ್ ಕಮಿಷನ್(ಯುಪಿಎಸ್ಸಿ), ನವೆಂಬರ್ 14ರ ಪ್ರವೇಶ ಪರೀಕ್ಷೆಗೆ ಅವಿವಾಹಿತ ಮಹಿಳಾ ಅಭ್ಯರ್ಥಿಗಳು ಅರ್ಜಿ ಸಲ್ಲಿಸಲು ಆನ್ಲೈನ್ ಪೋರ್ಟಲ್ಅನ್ನು ತೆರೆದಿರುವುದಾಗಿ ತಿಳಿಸಿದೆ.
ಈವರೆಗೆ 12ನೇ ತರಗತಿ ಅಥವಾ ಸಮಾನಾಂತರ ಪರೀಕ್ಷೆ ಪಾಸಾದ 16 ರಿಂದ 19 ವರ್ಷ ವಯಸ್ಸಿನ ಯುವಕರಿಗೆ ಮಾತ್ರ ಎನ್ಡಿಎ ಪ್ರವೇಶ ಪರೀಕ್ಷೆ ಬರೆಯುವ ಅವಕಾಶವಿತ್ತು. ಯುವಕರಿಗೆ ಮಾತ್ರ ಪ್ರವೇಶಾವಕಾಶ ನೀಡುವ ಯುಪಿಎಸ್ಸಿಯ ನಿಯಮಗಳನ್ನು ಪ್ರಶ್ನಿಸಿದ್ದ ಕುಶ್ ಕಾಲ್ರ ಅರ್ಜಿಯ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್, ಆಗಸ್ಟ್ 18 ರಂದು ಹೆಣ್ಣುಮಕ್ಕಳಿಗೆ ಎನ್ಡಿಎ ಪ್ರವೇಶ ಪರೀಕ್ಷೆ ಬರೆಯಲು ಅವಕಾಶ ನೀಡಬೇಕೆಂದು ಆದೇಶಿಸಿತ್ತು. ರಕ್ಷಣಾ ಪಡೆಗಳಲ್ಲಿ ಲೈಂಗಿಕ ಸಮಾನತೆ ಸಾಧಿಸಲು ತಾಕೀತು ಮಾಡಿತ್ತು. ಸರ್ಕಾರ ನಿಯಮ ಬದಲಿಸಿ ಮುಂದಿನ ವರ್ಷದಿಂದ ಮಹಿಳಾ ಅಭ್ಯರ್ಥಿಗಳಿಗೆ ಅವಕಾಶ ನೀಡಲು ಕಾಲಾವಕಾಶ ಕೋರಿತ್ತು. ಅದಕ್ಕೊಪ್ಪದ ಕೋರ್ಟ್, ಈ ವರ್ಷದಿಂದಲೇ ಬದಲಾವಣೆ ಆಗಬೇಕೆಂದು ಆದೇಶಿಸಿ, ನವೆಂಬರ್ 14 ರಂದು ನಡೆಯಲಿರುವ ಎನ್ಡಿಎ ಮತ್ತು ಎನ್ಎಇ ಪ್ರವೇಶ ಪರೀಕ್ಷೆಗೇ ಹೆಣ್ಣುಮಕ್ಕಳಿಗೆ ಅವಕಾಶ ಒದಗಿಸಿ ಎಂದು ಆದೇಶಿಸಿತ್ತು.
ಇದನ್ನೂ ಓದಿ: ಸೈನಿಕ ಶಾಲೆಗಳಲ್ಲಿ ಇನ್ನು ಮುಂದೆ ಹೆಣ್ಣುಮಕ್ಕಳಿಗೂ ಪ್ರವೇಶಾವಕಾಶ
ಎನ್ಡಿಎ ಪರೀಕ್ಷೆ ಉತ್ತೀರ್ಣರಾದವರನ್ನು ಸರ್ವೀಸ್ ಸೆಲೆಕ್ಷನ್ ಬೋರ್ಡ್ಗೆ ಸಂದರ್ಶನಕ್ಕಾಗಿ ಆಹ್ವಾನಿಸಲಾಗುತ್ತದೆ. ವೈದ್ಯಕೀಯ ಪರೀಕ್ಷೆಯ ನಂತರ ಅಭ್ಯರ್ಥಿಗಳನ್ನು ಎನ್ಡಿಎನ ಭೂಸೇನೆ, ನೌಕಾದಳ ಮತ್ತು ವಾಯುಪಡೆಯ ವಿಭಾಗಗಳಿಗೆ ನಿಯುಕ್ತಿ ಮಾಡಲಾಗುತ್ತದೆ ಮತ್ತು ಐಎನ್ಎನ ಪ್ರೀಕಮಿಷನ್ ಟ್ರೈನಿಂಗ್ಗೆ ದಾಖಲು ಮಾಡಿಕೊಳ್ಳಲಾಗುತ್ತದೆ. ಆಸಕ್ತ ಮಹಿಳಾ ಅಭ್ಯರ್ಥಿಗಳು ಯುಪಿಎಸ್ಇ ವೆಬ್ಸೈಟ್ನಲ್ಲಿ (upsconline.nic.in) ಸೆಪ್ಟೆಂಬರ್ 24 ರಿಂದ ಅಕ್ಟೋಬರ್ 8 ರವರೆಗೆ ತೆರೆಯಲಾಗಿರುವ ಪೋರ್ಟಲ್ ಮೂಲಕ ಅರ್ಜಿ ಸಲ್ಲಿಸಬಹುದಾಗಿದೆ. (ಏಜೆನ್ಸೀಸ್)
ನಾಯಿ ವಿಷಯಕ್ಕೆ ಜಗಳ… ಸಂಧಾನಕ್ಕೆ ಕರೆದ ರಾತ್ರಿ ನಡೆದೇ ಹೋಯ್ತು ದುರಂತ
ಇಲ್ಲಿ ಶಾಲೆ ಪುನರಾರಂಭದ ನಂತರ 400 ವಿದ್ಯಾರ್ಥಿಗಳಿಗೆ ಕರೊನಾ ಸೋಂಕು