ಟೊರಾಂಟೊ: ಕ್ಯಾಂಡಿಡೇಟ್ಸ್ ಚೆಸ್ ಟೂರ್ನಿಯಲ್ಲಿ ಅದ್ಭುತ ಪ್ರದರ್ಶನ ಮುಂದುವರಿಸಿರುವ ಭಾರತದ ಗ್ರಾಂಡ್ ಮಾಸ್ಟರ್ ಡಿ.ಗುಕೇಶ್ ಟೂರ್ನಿಯ 12ನೇ ಸುತ್ತಿನಲ್ಲಿ ಗೆಲುವಿನೊಂದಿಗೆ ಅಗ್ರಸ್ಥಾನಕ್ಕೆ ಮರಳಿದ್ದಾರೆ. ಇದರೊಂದಿಗೆ ಹಾಲಿ ವಿಶ್ವ ಚೆಸ್ ಚಾಂಪಿಯನ್ಗೆ ಸವಾಲೊಡ್ಡುವ ಅಭ್ಯರ್ಥಿಯನ್ನು ಆಯ್ಕೆ ಮಾಡುವ ಟೂರ್ನಿಯ ಅಗ್ರಸ್ಥಾನಕ್ಕೆ ಮೂವರು ಆಟಗಾರರ ನಡುವೆ ಪೈಪೋಟಿ ಏರ್ಪಟ್ಟಿದೆ. ಮತ್ತೊಂದೆಡೆ ಭಾರತದ ಇತರ ಸ್ಪರ್ಧಿಗಳಾದ ಆರ್. ಪ್ರಜ್ಞಾನಂದ ಮತ್ತು ವಿದಿತ್ ಗುಜರಾತಿ ರೇಸ್ನಿಂದ ಹೊರಬಿದ್ದಿದ್ದಾರೆ.
ಶುಕ್ರವಾರ ನಡೆದ ಪಂದ್ಯದಲ್ಲಿ 17 ವರ್ಷದ ಗುಕೇಶ್, ಅಜರ್ಬೈಜಾನ್ನ ನಿಜತ್ ಅಬಾಸೊವ್ ಎದುರು ಜಯಗಳಿಸಿ, ಅಮೆರಿಕದ ಹಿಕರು ನಕಮುರಾ, ರಷ್ಯಾದ ಇಯಾನ್ ನೆಪೊಮ್ನಿಯಾಚಿ ಅವರೊಂದಿಗೆ 7.5 ಅಂಕ ಕಲೆಹಾಕಿ ಜಂಟಿ ಅಗ್ರಸ್ಥಾನ ಪಡೆದುಕೊಂಡಿದ್ದಾರೆ. ಇನ್ನೊಂದು ಮುಖಾಮುಖಿಯಲ್ಲಿ ಪ್ರಜ್ಞಾನಂದ, ಇಯಾನ್ ನೆಪೊಮ್ನಿಯಾಚಿ ವಿರುದ್ಧ ಡ್ರಾ ಸಾಧಿಸಿದ್ದು, ಆರು ಅಂಕಗಳೊಂದಿಗೆ ಐದನೇ ಸ್ಥಾನದಲ್ಲಿದ್ದಾರೆ. ಐದು ಅಂಕ ಹೊಂದಿರುವ ವಿದಿತ್ ಗುಜರಾತಿ ನಂತರದ ಸ್ಥಾನದಲ್ಲಿದ್ದಾರೆ. ಮಹಿಳಾ ವಿಭಾಗದಲ್ಲಿ ಭಾರತದ ಕೊನೆರು ಹಂಪಿ ರಷ್ಯಾದ ಅಲೆಕ್ಸಾಂಡ್ರಾ ಗೊರಿಯಾಚ್ಕಿನಾ ವಿರುದ್ಧ ಡ್ರಾಗಳಿಸಿದರೆ, ಆರ್. ವೈಶಾಲಿ ಯೂಕ್ರೇನ್ನ ಅನ್ನಾ ಮುಜಿಚುಕ್ ವಿರುದ್ಧ ಸತತ ಎರಡನೇ ಗೆಲುವು ಸಾಧಿಸಿದರು. ಕೊನೆರು ಹಂಪಿ ಆರು ಪಾಯಿಂಟ್ನೊಂದಿಗೆ ಜಂಟಿ ಮೂರನೇ ಸ್ಥಾನ, ವೈಶಾಲಿ 5.5 ಅಂಕಗಳಿಸಿ ಆರನೇ ಸ್ಥಾನ ಪಡೆದಿದ್ದಾರೆ.
ಡಿಡೇಟ್ ಟೂರ್ನಿಯ ವಿಜೇತರು 43 ಲಕ್ಷ ರೂ. ಬಹುಮಾನ ಪಡೆಯಲಿದ್ದರೆ, 2ನೇ ಸ್ಥಾನ ಪಡೆದವರಿಗೆ 32 ಲಕ್ಷ ರೂ. ಮತ್ತು 3ನೇ ಸ್ಥಾನ ಪಡೆದವರಿಗೆ 21 ಲಕ್ಷ ರೂ. ಬಹುಮಾನ ನೀಡಲಾಗುವುದು. ಜತೆಗೆ ಟೂರ್ನಿಯಲ್ಲಿ ಆಟಗಾರರು ಗಳಿಸುವ ಪ್ರತಿ 0.5 ಅಂಕಗಳಿಗೆ ತಲಾ 3 ಲಕ್ಷ ರೂ. ಬಹುಮಾನ ನೀಡಲಾಗುತ್ತದೆ. ಪುರುಷರ ವಿಭಾಗದ ವಿಜೇತರು ವರ್ಷಾಂತ್ಯದಲ್ಲಿ ಹಾಲಿ ವಿಶ್ವ ಚಾಂಪಿಯನ್ ಚೀನಾದ ಡಿಂಗ್ ಲಿರೆನ್ಗೆ ಸವಾಲೊಡ್ಡಲಿದ್ದಾರೆ.