ಗೂಗಲ್ ಸಂಸ್ಥೆ ಭಾರತದಲ್ಲಿ ಜಾರಿಗೊಳಿಸಬೇಕು ಎಂದುಕೊಂಡಿದ್ದ ಶೇ. 30 ಗೂಗಲ್ ಪ್ಲೇ ಸ್ಟೋರ್ ನಿಯಮಗಳನ್ನು ಸದ್ಯಕ್ಕೆ ತಡೆ ಹಿಡಿದಿದೆ. ಪರಿಣಾಮವಾಗಿ ಭಾರತೀಯ ಡೆವೆಲಪರ್ಸ್ 2022ರ ವರೆಗೂ ನಿರಾಳರಾಗಿರಬಹುದು.
ಜಾಗತಿಕವಾಗಿ ಈ ನಿಯಮ ಮುಂದಿನ ಸೆಪ್ಟೆಂಬರ್ನಿಂದಲೇ ಜಾರಿಗೆ ಬರಲಿದೆ. ಆದರೆ ಇದಕ್ಕೆ ಭಾರತೀಯ ಡೆವೆಲಪರ್ಸ್ ಅಸಮಾಧಾನ ವ್ಯಕ್ತಪಡಿಸಿದ್ದನ್ನು ಗಮನಿಸಿರುವ ಗೂಗಲ್ ಸಂಸ್ಥೆ, ಇದೀಗ 2022ರ ಏಪ್ರಿಲ್ ವರೆಗೂ ಜಾರಿಗೊಳಿಸದಿರಲು ನಿರ್ಧರಿಸಿದೆ.
ನಮ್ಮ ಪಾಲುದಾರರಿಗೆ ಒಪ್ಪಿಗೆ ಆಗಿಲ್ಲ ಎಂದರೆ ಅದು ಯಾರಿಗೂ ಒಳಿತಲ್ಲ. ಅದರಿಂದ ಅವರು ಬೆಳೆದು ಯಶಸ್ವಿಯಾಗಲು ಸಾಧ್ಯವಿಲ್ಲ. ಹೀಗಾಗಿ ಭಾರತೀಯ ವ್ಯವಸ್ಥೆಗೆ ನಾವು ಬದ್ಧರಾಗಿದ್ದೇವೆ ಎಂಬುದಾಗಿ ಗೂಗಲ್ನ ಪ್ರಾಡಕ್ಟ್ ಮ್ಯಾನೇಜ್ಮೆಂಟ್ನ ವಿಪಿ ಸಮೀರ್ ಸಾವಂತ್ ಸುದ್ದಿಗಾರರಿಗೆ ಪ್ರತಿಕ್ರಿಯಿಸಿದ್ದಾರೆ.
ನಮ್ಮ ಪೇಮೆಂಟ್ ಪಾಲಿಸಿ ಹೊಸದೇನಲ್ಲ. ಜಾಗತಿಕವಾಗಿ ಅದು ಜಾರಿ ಇದ್ದು, ಶೇ. 97 ಡೆವೆಲಪರ್ಸ್ ಅದನ್ನು ಅನುಸರಿಸುತ್ತಿದ್ದಾರೆ. ಅದರಲ್ಲೂ ಡೆವೆಲಪರ್ ಆ್ಯಪ್ ಡೌನ್ಲೋಡ್ ಮಾಡಿಕೊಳ್ಳುವಾಗ ಚಾರ್ಜ್ ಮಾಡಿದರೆ ಮಾತ್ರ ಈ ನಿಯಮ ಅನ್ವಯಿಸಬಹುದು ಎಂಬುದಾಗಿ ಹೇಳಿರುವ ಅವರು, ಅಂಥವರ ಸಂಖ್ಯೆ ತೀರಾ ಕಡಿಮೆ ಇರುವುದಾಗಿ ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್)