ಅಹಮದಾಬಾದ್: ಕೊವಿಡ್-19ರೋಗಿಗಳಿಗೆ ನೀಡಲಾಗುವ ಚುಚ್ಚುಮದ್ದನ್ನು ಅಕ್ರಮವಾಗಿ ವಿತರಿಸುತ್ತಿದ್ದ ಐವರನ್ನು ಗುಜರಾತ್ ಪೊಲೀಸರು ಬಂಧಿಸಿದ್ದಾರೆ.
ಗಂಭೀರಸ್ಥಿತಿಯಲ್ಲಿರುವ ಕೊವಿಡ್-19 ರೋಗಿಗಳಿಗೆ ನೀಡಲಾಗುವ ಟೋಸಿಲಿಜುಮಾವನ್ನು ನಕಲಿಯಾಗಿ ತಯಾರಿಸಿ, ಮಾರಾಟ ಮಾಡುವ ದಂಧೆಯಲ್ಲಿ ಇವರು ತೊಡಗಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಈ ಐವರು ಸೇರಿಕೊಂಡು ಸೂರತ್ನಲ್ಲಿ ನಕಲಿ ಔಷಧ ತಯಾರಿಕಾ ಕಂಪನಿಯನ್ನು ಪ್ರಾರಂಭಿಸಿದ್ದರು. ಈ ಫಾರ್ಮಾ ಕಂಪನಿ ಮೇಲೆ ಆಹಾರ ಮತ್ತು ಔಷಧಿ ನಿಯಂತ್ರಣಾ ಆಡಳಿತಾಧಿಕಾರಿಗಳು ದಾಳಿ ಮಾಡಿದಾಗ ಸತ್ಯ ಹೊರಬಿದ್ದಿತ್ತು.
ಆರೋಪಿಗಳನ್ನು ಆಶೀಶ್ ಶಾ, ಅಕ್ಷಯ್ ಶಾ, ಹರ್ಷ ಠಾಕೂರ್, ನೀಲೇಶ್ ಲಾಲಿವಾಲಾ ಮತ್ತು ಸೋಹೆಲ್ ಥಾಯ್ ಎಂದು ಗುರುತಿಸಲಾಗಿದೆ. ಇದನ್ನೂ ಓದಿ: ಪತ್ನಿ ಜತೆ ಟ್ರೆಕ್ಕಿಂಗ್ ಹೋದ ನೆನಪಲ್ಲಿ ಕ್ರಿಕೆಟಿಗ ಅಜಿಂಕ್ಯ ರಹಾನೆ
ಸೂರತ್ನಲ್ಲಿರುವ ಈ ನಕಲಿ ಕಂಪನಿಯ ಹೆಸರು ಜೆನಿಕ್ ಫಾರ್ಮಾ. ಇಲ್ಲಿಂದ ಅಹಮದಾಬಾದ್ಗೆ ನಕಲಿ ಟೋಸಿಲಿಜುಮಾ ಚುಚ್ಚುಮದ್ದನ್ನು ಪೂರೈಕೆ ಮಾಡುತ್ತಿದ್ದರು.
ಕೊವಿಡ್-19 ಇರುವ ಸಂದರ್ಭದಲ್ಲಿ ಸುಲಭವಾಗಿ ಹಣ ಗಳಿಸಲು ಆರೋಪಿಗಳು ಈ ಮಾರ್ಗ ಕಂಡುಕೊಂಡಿದ್ದರು. ಇವರು ಪೂರೈಕೆ ಮಾಡಿದ ಔಷಧಿಯನ್ನು ಪಡೆದ ಖಾಸಗಿ ಆಸ್ಪತ್ರೆಯ ವೈದ್ಯರೋರ್ವರು ಫುಡ್ ಆ್ಯಂಡ್ ಡ್ರಗ್ ಕಂಟ್ರೋಲ್ ಅಥೊರಿಟಿಗೆ ದೂರು ನೀಡಿದ್ದರು. ತನಿಖೆಯ ಬಳಿಕ ಸತ್ಯ ಹೊರಬಿದ್ದಿದೆ. ಪ್ರಕರಣ ದಾಖಲಿಸಿಕೊಂಡಿದ್ದೇವೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. (ಏಜೆನ್ಸೀಸ್)