ಶಿವಾನಂದ ಹಿರೇಮಠ ಗದಗ
ಮಳೆ ಅಭಾವದಿಂದ ಬರ ಕೂಪದಲ್ಲಿ ಬದಕುತ್ತಿರುವ ರೈತರಿಗೆ ಜಿಲ್ಲೆಯಲ್ಲಿನ ಹವಾಮಾನ ವೈಪರಿತ್ಯದಿಂದ ಉಂಟಾದ ವಿದ್ಯುತ್ ಕೊರತೆ ಆತಂಕ ತಂದೊಡ್ಡಿದೆ. ಹವಾಮಾನ ವೈಪರಿತ್ಯದಿಂದ ರಾಜ್ಯದ ಸೋಲಾರ್ ಮತ್ತು ಪವನ ವಿದ್ಯುತ್ಗಳಿಂದ ಅಗತ್ಯವಿರುವ ವಿದ್ಯುತ್ ಉತ್ಪಾದನೆ ಸಾಧ್ಯವಾಗುತ್ತಿಲ್ಲ. ಹೆಸ್ಕಾಂ ಮೂಲಗಳ ಪ್ರಕಾರ ಕಳೆದ ಒಂದು ವಾರದಿಂದ ಜಿಲ್ಲೆಯಲ್ಲಿ ಶೇ. 50ಕ್ಕಿಂತ ಕಡಿಮೆ ರಷ್ಟು ಮಾತ್ರ ವಿದ್ಯುತ್ ಉತ್ಪಾದನೆ ಜರುಗುತ್ತಿದೆ. ರಾಜ್ಯದಲ್ಲಿ ವಿದ್ಯುತ್ ಅಭಾವದ ಹಿನ್ನೆಲೆ ಗದಗ ಜಿಲ್ಲೆಗೂ ಪ್ರತಿಗಂಟೆಗೊಮ್ಮೆ ಶೇ.60 ರಷ್ಟು ವಿದ್ಯುತ್ ಕೊರತೆಯ ವಿದ್ಯುತ್ ಹಂಚಿಕೆ ಕಡಿಮೆ ಮಾಡಲಾಗುತ್ತಿದೆ. ಹೀಗಾಗಿ ಜಿಲ್ಲೆಯಲ್ಲಿ ಅನಿಯಮಿತ ಲೋಡ್ ಶೇಡ್ಡಿಂಗ್ ಅನಿವಾರ್ಯವಾಗಿದೆ.
ಗದಗ ಜಿಲ್ಲೆಯಲ್ಲಿ ಪ್ರಸ್ತುತ ಹೈಡ್ರೋ ಪವರ್(ಜಲವಿದ್ಯುತ್) ಪೂರೈಕೆ ಸಾಧ್ಯವಾಗುತ್ತಿಲ್ಲ. ಜಿಲ್ಲೆಯ ವಿದ್ಯುತ್ ಬೇಡಿಕೆ ಅನುಸಾರ ಸೌರ ಮತ್ತು ವಿಂಡ್ ಪವರ್ ಜತೆಗೆ ಹೈಡ್ರೋ ಪವರ್ ಖರೀದಿ ಮಾಡಲಾಗುತ್ತಿತ್ತು. ಮಳೆ ಕೊರತೆ ಹಿನ್ನೆಲೆ ರಾಜ್ಯಾದ್ಯಂತ ಹೈಡ್ರೋ ಪವರ್ ಉತ್ಪಾದನೆ ಗಣನೀಯ ಕುಸಿದಿದೆ. ಹೀಗಾಗಿ, ಒಂದು ಯುನಿಟ್ ವಿದ್ಯುತ್ಗೆ 9 ರಿಂದ 15 ರೂ. ವರೆಗೂ ವೆಚ್ಚ ಭರಿಸಿ ಜಿಲ್ಲೆಯ ಜನರಿಗೆ ವಿದ್ಯುತ್ ಪೂರೈಕೆ ಮಾಡಬೇಕಾದ ಅನಿವಾರ್ಯತೆ ಹೆಸ್ಕಾಂಗೆ ಬಂದೊದಗಿದೆ.
ಜಿಲ್ಲೆಯಯಲ್ಲಿ ಮನೆಗಳಿಗೆ, ಸಂಕೀರ್ಣಗಳು, ವಾಣಿಜ್ಯೋದ್ಯ ಸಂಸ್ಥೆ, ಕೈಗಾರಿಕೆ, ರೈತರ ಪಂಪಸೆಟ್ ಸೇರಿದಂತೆ ಎಲ್ಲ ಮೂಲಗಳಿಗೆ ವಿದ್ಯುತ್ ಪೂರೈಕೆ ಅತ್ಯಗತ್ಯ. ಕಳೆದೊಂದು ವಾರದಿಂದ ಗಾಳಿ ಮತ್ತು ಸೂರ್ಯನ ಬೆಳಕಿನ ಶಕ್ತಿ ನಿಯಮಿತ ಇಲ್ಲದ ಹಿನ್ನೆಲೆ ಸೋಲಾರ್ ದಿಂದ ಸರಾಸರಿ 30 ಮೆಗಾವ್ಯಾಟ್, ಪವನ ವಿದ್ಯುತ್ ಮೂಲದಿಂದ 3 ರಿಂದ 5 ಮೆಗಾವ್ಯಾಟ್ ಸರಾಸರಿ ವಿದ್ಯುತ್ ಹಾಗೂ ಒನ್ ನೇಷನ್ ಒನ್ ಗ್ರಿಡ್ ಯೋಜನೆಯಡಿ ಜಿಲ್ಲೆಗಳಿಗೆ ವಿದ್ಯುತ್ ಹಂಚಿಕೆ ಸೇರಿ ಜಿಲ್ಲೆಗೆ ಪ್ರಸ್ತುತ ಪ್ರತಿನಿತ್ಯ ಸರಾಸರಿ 70 ರಿಂದ 80 ಮೆಗಾವ್ಯಾಟ್ ವಿದ್ಯುತ್ ಜಿಲ್ಲೆಗೆ ಲಭ್ಯವಿದೆ. ಆದರೆ, ಜಿಲ್ಲೆಗೆ ಪ್ರತಿನಿತ್ಯ ಸರಾಸರಿ 190 ಮೆಗಾವ್ಯಾಟ್ ವಿದ್ಯುತ್ ಅಗತ್ಯತೆ ಇದ್ದು, ಶೇ.60 ರಷ್ಟು ಕೊರತೆ ಎದುರಾಗಿದೆ. ಜಿಲ್ಲೆಗೆ ಈಗಿರುವ ಹಂಚಿಕೆ ವಿದ್ಯುತ್ ನಲ್ಲಿ ರೈತರ ಪಂಪಸೆಟ್ ಗಳಿಗೆ ವಿದ್ಯುತ್ ಪೂರೈಕೆ ಸಾಧ್ಯವಿಲ್ಲದ ಕಾರಣ ಜಿಲ್ಲೆಯಾದ್ಯಂತ ಪ್ರತಿಭಟನೆಗಳು ಜರುಗುತ್ತಿವೆ. ಹೀಗಾಗಿ ರೈತರ ಪಂಪಸೆಟ್ಗಳಿಗೆ 7 ಗಂಟೆ ಬದಲಾಗಿ 3 ರಿಂದ 4 ಗಂಟೆ ವರೆಗೂ ವಿದ್ಯುತ್ ಪೂರೈಕೆ ಮಾಡಲಾಗುತ್ತಿದೆ.
ಜಿಲ್ಲೆಗೆ ವಿದ್ಯುತ್ ಹಂಚಿಕೆ:
ಅವಧಿ — ಪ್ರಸ್ತುತ ವಿದ್ಯುತ್ ಪೂರೈಕೆ(ಪಂಪಸೆಟ್ ಹೊರತುಪಡಿಸಿ) — ವಿದ್ಯುತ್ ಅಗತ್ಯತೆ(ಪಂಪಸೆಟ್ ಒಳಗೊಂಡು) — ಕೊರತೆ
ಬೆಳಗ್ಗೆ 1ರಿಂದ 6 ಗಂಟೆವರೆಗೆ — 40 ಮೆಗಾವ್ಯಾಟ್ — 60 ಮೆಗಾವ್ಯಾಟ್ — 20 ಮೆಗಾವ್ಯಾಟ್
ಬೆಳಗ್ಗೆ 6 ರಿಂದ 9 ಗಂಟೆವರೆಗೆ — 60 ಮೆಗಾವ್ಯಾಟ್ — 100 ಮೆಗಾವ್ಯಾಟ್ — 40 ಮೆಗಾವ್ಯಾಟ್
ಬೆಳಗ್ಗೆ 9 ರಿಂದ ಮಧ್ಯಾಹ್ನ 2 ಗಂಟೆವರೆಗೆ — 135 ಮೆಗಾವ್ಯಾಟ್ — 160 ಮೆಗಾವ್ಯಾಟ್ — 25 ಮೆಗಾವ್ಯಾಟ್
ಬಾಕ್ಸ್:
ಮುಂಡರಗಿ, ಶಿರಹಟ್ಟಿ, ಲೆ$್ಮಶ್ವರ, ಗದಗ ತಾಲೂಕು ಸೇರಿ ಗದಗ ವಿಭಾಗದಲ್ಲಿ ಒಟ್ಟಾರೆ 2.51 ಲಕ್ಷ ಹಾಗೂ ರೋಣ, ಗಜೇಂದ್ರಗಡ, ನರಗುಂದ ತಾಲೂಕು ಸೇರಿ ರೊಣ ವಿಭಾಗದಲ್ಲಿ 1.27 ವಿದ್ಯುತ್ ಸಂಪರ್ಕಗಳಿವೆ. ಗದಗ ಮತ್ತು ರೊಣ ವಿಭಾಗ ಸೇರಿ ಸರಾಸರಿ 190 ಮೆಗಾವ್ಯಾಟ್ ಪ್ರತಿನಿತ್ಯ ಅಗತ್ಯವಿದೆ. ಆದರೆ, ವಿದ್ಯುತ್ ಕೊರತೆ ಹಿನ್ನೆಲೆ ಸೆಪ್ಟಂಬರ್ 30 ರಂದು ಗದಗ ವಿಭಾಗಕ್ಕೆ 35 ಮೆಗಾವ್ಯಾಟ್ ಮತ್ತು ರೊಣ ವಿಭಾಗದಲ್ಲಿ 10.9 ಮೆಗಾವ್ಯಾಟ್ ವಿದ್ಯುತ್ ಮಾತ್ರ ಪೂರೈಕೆ ಆಗಿದೆ. ಮಂಗಳವಾರ ಮುಂಡರಗಿ ಭಾಗದಲ್ಲಿ ಭಾಗಶಃ ಲೋಡ್ ಶೆಡ್ಡಿಂಗ್ ಉಲ್ಭಣಿಸಿತ್ತು. ಹೀಗಾಗಿ ರೋಣ, ನರೇಗಲ್ ಮತ್ತು ಮುಂಡರಗಿಯಲ್ಲಿ ರೈತರು ವಿದ್ಯುತ್ ಅಸಮರ್ಪಕ ಪೂರೈಕೆ ಕುರಿತು ಆಕ್ರೋಶ ವ್ಯಕ್ತಪಡಿಸಿದ್ದರು.
ವಿದ್ಯುತ್ ಉತ್ಪಾದನಾ ಸಾಮರ್ಥ್ಯ: ಜಿಲ್ಲೆಯಲ್ಲಿ ಸೌರ ಮೂಲದಿಂದ 220 ಮೆಗಾವ್ಯಾಟ್, ಪವನ ವಿದ್ಯುತ್ ಮೂಲದಿಂದ 713 ಹಾಗೂ ಮುಂಡರಗಿ ಸಕ್ಕರೆ ಕಾರ್ಖಾನೆಯಿಂದ 31 ಸೇರಿ ಪ್ರತಿನಿತ್ಯ 964 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯವಿದ್ದರೂ ಈವರೆಗೂ ದಿನವೊಂದಕ್ಕೆ 170 ಮೆಗಾವ್ಯಾಟ್ ಅತೀ ಹೆಚ್ಚು ಉತ್ಪಾದನೆ ಮಾತ್ರ ಜರುಗಿದೆ.
ವಿದ್ಯುತ್ ಸಂಪರ್ಕಗಳು(ಗದಗ ಡಿವಿಸನ್)
ಪಂಪ್ಸೆಟ್ಗಳು: 28207
ಮನೆ: 49332
ವಾಣಿಜ್ಯ ಮಳಿಗೆ: 19451
ಸಣ್ಣ ಕೈಗಾರಿಕೆ: 3651
ಕುಡಿಯುವ ನೀರಿನ ಸಂಪರ್ಕ: 5296
ಬೀದಿ ದೀಪ ಸಂಪರ್ಕ: 1673,
11ಕೆವಿ ಕೈಗಾರಿಕೆ ಸಂಪರ್ಕ: 99
ವಿದ್ಯುತ್ ಸಂಪರ್ಕಗಳು(ರೋಣ ಡಿವಿಸನ್)
ಪಂಪಸೆಟ್ಗಳು & 12315
ಮನೆ: 31359
ವಾಣಿಜ್ಯ ಮಳಿಗೆ: 8341
ಸಣ್ಣ ಕೈಗಾರಿಕೆ: 2029
ಕುಡಿಯುವ ನೀರಿನ ಸಂಪರ್ಕ: 1076
ಬೀದಿ ದೀಪ ಸಂಪರ್ಕ: 642
11ಕೆವಿ ಕೈಗಾರಿಕೆ ಸಂಪರ್ಕ: 55
ಕೋಟ್:
ಉಡುಪಿಯ ಥರ್ಮಲ್ ಪ್ಲಾಂಟ್ ತನ್ನ ವಿದ್ಯುತ್ ಉತ್ಪಾದನೆ ಆರಂಭಿಸಿದೆ. ಥರ್ಮಲ್ ಪ್ಲಾಂಟ್ ಮೂಲಕ ಜಿಲ್ಲೆಗೆ ವಿದ್ಯುತ್ ಖರೀದಿಸುವ ಯೋಜನೆ ಇದೆ. ಕೆಲವೇ ದಿನಗಳಲ್ಲಿ ವಿದ್ಯುತ್ ಸಮಸ್ಯೆ ಬಗೆ ಹರಿಯಲಿದೆ.
– ಕಲ್ಯಾಣ ಶೆಟ್ಟರ್, ಇಇ – ಹೆಸ್ಕಾಂ ಗದಗ