ಮಗುವಿನ ಚಿನ್ನದ ಕಾಲ್ಗೆಜ್ಜೆ ಕಳ್ಳನ ಹೊಟ್ಟೆ ಸೇರಿತು- ಮೂರು ವರ್ಷದ ಹಿಂದಿನ ಸಿನಿಮಾ ದೃಶ್ಯ ನೆನಪಿಸಿದ ಕಳ್ಳತನ!

ತಿರುವನಂತಪುರ: ಮಲಯಾಳಂ ಚಿತ್ರರಂಗದಲ್ಲಿ ಮೂರು ವರ್ಷ ಹಿಂದೆ ಒಂದು ಸಿನಿಮಾ ತೆರೆಕಂಡಿತ್ತು. ಅದರಲ್ಲೊಂದು ದೃಶ್ಯವಿದೆ. ಬಸ್ ಪ್ರಯಾಣ ಮಾಡುತ್ತಿದ್ದ ನಾಯಕಿಯ ಕತ್ತಿನಲ್ಲಿದ್ದ ಸರವನ್ನು ಹಿಂದಿನ ಸೀಟಿನಲ್ಲಿ ಕುಳಿತಿದ್ದಾತ ಆಕೆಯ ಅರಿವಿಗೆ ಬಾರದಂತೆ ಕಟ್​ ಮಾಡಿ ತೆಗೆಯುತ್ತಿದ್ದ. ಆಗ ಎಚ್ಚೆತ್ತ ನಾಯಕಿ ಹಿಂದೆ ತಿರುಗಿ ನೋಡುತ್ತಾಳೆ. ಅಷ್ಟರೊಳಗೆ ಆತ ಆ ಸರವನ್ನು ನುಂಗಿ ಬಿಟ್ಟಿದ್ದ!

ಬಸ್ ಪೊಲೀಸ್ ಠಾಣೆಗೆ ಹೋಯಿತು. ಸರಗಳ್ಳ ಪೊಲೀಸರ ಬಳಿಯೂ ಅದನ್ನೇ ಹೇಳಿದ - ನಾನು ಸರ ಕಳವು ಮಾಡಿಲ್ಲ. ಸಾಕ್ಷಿ ಏನಿದೆ ಎಂದು?. ಆತ ಸರ ನುಂಗುವುದನ್ನು ಕಣ್ಣಾರೆ ನೋಡಿದ್ದೇನೆ ಎಂದು ನಾಯಕಿ ಪ್ರತಿಪಾದಿಸಿದ ಕಾರಣ, ಪೊಲೀಸರು ಆತನನ್ನು ವಶಕ್ಕೆ ಪಡೆದು ಎಕ್ಸ್​ರೇ ತೆಗೆಸಿ ಆಸ್ಪತ್ರೆಗೆ ದಾಖಲಿಸುತ್ತಾರೆ. ಸರ ನುಂಗಿದ್ದರೆ ಮಲವಿಸರ್ಜನೆ ಮಾಡುವಾಗ ಹೊರಬರಲೇ ಬೇಕಲ್ಲ ಎಂದು ಕಾಯುತ್ತಿರುವ ದೃಶ್ಯವದು.. ಅಂದ ಹಾಗೆ ಸಿನಿಮಾದ ಹೆಸರು ತೋಂಡಿಮೊದಲೂಂ ದೃಕ್​ಸಾಕ್ಷಿಯೂಂ.

ಸಿನಿಮಾ ದೃಶ್ಯದ ವಿಷಯ ಹಾಗಿರಲಿ. ಇಂಥದ್ದೇ ಘಟನೆ ನಿಜ ಜೀವನದಲ್ಲೂ ನಡೆದಿದೆ. ತಂಪನೂರು ಪೊಲೀಸ್​ ಠಾಣಾ ವ್ಯಾಪ್ತಿಯ ತಂಪನೂರು ಬಸ್​ನಿಲ್ದಾಣದಲ್ಲಿ ನಡೆದಿರುವ ಕಳವು ಪ್ರಕರಣವಿದು. ಇಲ್ಲಿ ಆರೋಪಿ ಸ್ಥಾನದಲ್ಲಿರುವಾತ ಪೂಂತುರ ಪಳ್ಳಿತೆರವು ನಿವಾಸಿ ಶಫೀಕ್​ (42). ಅಜಿಕುಮಾರ್ ಮತ್ತು ಮಿನಿ ಎಂಬ ಶಿಕ್ಷಕ ದಂಪತಿಯ ಮೂರು ವರ್ಷದ ಪುತ್ರಿ ಧರಿಸಿದ್ದ ಪಾದಸರವನ್ನು ಶಫೀಕ್ ಕಳವುಗೈದು ನುಂಗಿಬಿಟ್ಟಿದ್ದ. 4.5 ಗ್ರಾಂ ತೂಕದ ಚಿನ್ನದ ಪಾದಸರವಾಗಿತ್ತದು.

ಇದನ್ನೂ ಓದಿ: ಹಳೇ ವೈಮನಸ್ಯ ಮರೆತು ಜೆಡಿಎಸ್​ನತ್ತ ಹೊರಟುನಿಂತ ಇಬ್ರಾಹಿಂ ಮನವೊಲಿಕೆಗೆ ಡಿಕೆಶಿ ಯತ್ನ

ಶಫೀಕ್ ಓಡಿ ಹೋಗುವ ಮೊದಲೇ ಹಿಡಿದ ಸ್ಥಳೀಯರು ಆತನನ್ನು ಪೊಲೀಸ್ ಠಾಣೆಗೆ ಕರೆದೊಯ್ದು ಕೇಸ್ ದಾಖಲಿಸಿದರು. ಆತನನ್ನು ಕೂಡಲೇ ಆಸ್ಪತ್ರೆಗೆ ಕರೆದೊಯ್ದು ಎಕ್ಸ್ ರೇ ತೆಗೆಸಿದಾಗ ಹೊಟ್ಟೆಯಲ್ಲಿ ಪಾದಸರ ಇರುವುದು ದೃಢಪಟ್ಟಿತು. ಕೋರ್ಟ್​ಗೆ ಹಾಜರುಪಡಿಸಿದ ಬಳಿಕ ಆರೋಪಿಯನ್ನು ಮೆಡಿಕಲ್ ಕಾಲೇಜಿಗೆ ದಾಖಲಿಸಲಾಗಿದ್ದು, ಹೊಟ್ಟೆಯಿಂದ ಪಾದಸರ ಹೊರಬರುವುದನ್ನು ಪೊಲೀಸರು ಕಾಯುತ್ತಿದ್ದಾರೆ. (ಏಜೆನ್ಸೀಸ್)

ಕ್ಷಣ ಕ್ಷಣದ ಸುದ್ದಿಗಳ ಅಪ್ಡೇಟ್ಸ್​ಗಾಗಿ ನಮ್ಮ ಫೇಸ್​ಬುಕ್​ ಪುಟ ಲೈಕ್ ಮಾಡಿ ಮತ್ತು ಫಾಲೋ ಮಾಡಿ.. 

https://www.vijayavani.net/transport-workers-strike-aituc-anantha-subbarao/