ನವದೆಹಲಿ: ಚೀನಾದಲ್ಲಿ ಮೃತ್ಯುಕೂಪವಾಗಿರುವ ಕೊರೊನಾ ವೈರಸ್ ಮತ್ತಷ್ಟು ಹರದಂತೆ ತಡೆಯಲು ಸೋಂಕು ತಗುಲಿರುವ 20 ಸಾವಿರ ರೋಗಿಗಳನ್ನು ಕೊಲ್ಲಲು ಚೀನಾ ಸರ್ಕಾರ ಅತ್ಯುನ್ನತ ನ್ಯಾಯಾಲಯ ಅನುಮತಿಯನ್ನು ಕೋರಿದೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಒಂದು ಗಿರಕಿ ಹೊಡೆಯುತ್ತಿದ್ದು, ಇದು ಸತ್ಯಕ್ಕೆ ದೂರವಾದದ್ದು ಎಂದು ಇಂಡಿಯಾ ಟುಡೆ ನಡೆಸಿದ ಫ್ಯಾಕ್ಟ್ಚೆಕ್ನಲ್ಲಿ ಬಹಿರಂಗವಾಗಿದೆ.
ವೈರಲ್ ಪೋಸ್ಟ್ ಬಗ್ಗೆ ತನಿಖೆಗೆ ಮುಂದಾದ ಇಂಡಿಯಾ ಟುಡೆ ಮೊದಲು ab-tc.com ಹೆಸರಿನ ವೆಬ್ಸೈಟ್ನಲ್ಲಿ ಲೇಖನವೊಂದ ಪ್ರಕಟವಾಗಿರುವುದನ್ನು ಗಮನಿಸಿದೆ. ಈ ಲೇಖನ ಹೇಳುವ ಪ್ರಕಾರ ಮತ್ತಷ್ಟು ರೋಗ ಹರಡದಂತೆ ತಡೆಯಲು 20 ಸಾವಿರ ರೋಗಿಗಳನ್ನು ಸಾಯಿಸಲು ಚೀನಾ ಸರ್ಕಾರ ಸುಪ್ರೀಂ ಕೋರ್ಟ್ ಅನುಮತಿಯನ್ನು ಕೋರಿದೆ ಎಂದು ಹೇಳಿದೆ.
ಚಂದ್ರಭಲ್ ಸಿಂಗ್ ಎಂಬ ಫೇಸ್ಬುಕ್ ಬಳಕೆದಾರ ab-tc.com ವೆಬ್ಸೈಟ್ ಲೇಖನದ ಸ್ಕ್ರೀನ್ ಶಾಟ್ ತೆಗೆದುಕೊಂಡು ತನ್ನ ಖಾತೆಯಲ್ಲಿ ಪೋಸ್ಟ್ ಮಾಡಿಕೊಂಡಿದ್ದಾರೆ. ರೋಗ ಹರಡದಂತೆ ತಡೆಯಲು 20 ಸಾವಿರ ರೋಗಿಗಳನ್ನು ಚೀನಾ ಸರ್ಕಾರ ಕೋರ್ಟ್ ಅನುಮತಿ ಕೋರಿದೆ. ಈಗಾಗಲೇ ಕೆಲ ರೋಗಿಗಳನ್ನು ಕೊಂದಿದೆ ಎಂಬ ಊಹಾಪೋಹ ಹರಿದಾಡುತ್ತಿದೆ ಎಂದು ಬರೆದು ಫೋಸ್ಟ್ ಮಾಡಿದ್ದಾರೆ. ಅಲ್ಲದೆ, ಈ ಪೋಸ್ಟ್ ಅನ್ನು ಸಾಕಷ್ಟು ಮಂದಿ ಶೇರ್ ಕೂಡ ಮಾಡಿಕೊಂಡಿದ್ದಾರೆ.
ಈ ಬಗ್ಗೆ ಫ್ಯಾಕ್ಟ್ಚೆಕ್ ನಡೆಸಿದ ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಮ್ ಇದು ಸತ್ಯಕ್ಕೆ ದೂರವಾದದ್ದು ಎಂದು ಹೇಳಿದೆ. ab-tc.com ಅನುಮಾನಾಸ್ಪದ ವೆಬ್ಸೈಟ್ ಎಂದು ತಿಳಿದುಬಂದಿದೆ.
ಈ ಬಗ್ಗೆ ಮತ್ತಷ್ಟು ಖಚಿತಪಡಿಸಿಕೊಳ್ಳಲು ಕೀವರ್ಡ್ಸ್ ಮೂಲಕ ಗೂಗಲ್ನಲ್ಲಿ ಹುಡುಕಾಡಿದಾಗ, ಈ ಸಂಬಂಧ ಯಾವುದೇ ವಿಶ್ವಾಸಾರ್ಹ ಮಾಹಿತಿ ಖಚಿತವಾಗಲಿಲ್ಲ. ಜಾಗತಿಕ ಮಟ್ಟದಲ್ಲಿ ಕೊರೊನಾ ವೈರಸ್ ದೊಡ್ಡ ಸುದ್ದಿಯಾಗಿರುವುದರಿಂದ ಒಂದು ವೇಳೆ ಈ ದೊಡ್ಡ ಬೆಳವಣಿಗೆಯಾಗಿದ್ದರೆ, ಯಾವುದೇ ಮಾಧ್ಯಮಗಳು ಇದನ್ನು ವರದಿ ಮಾಡದೆ ಇರುತ್ತಿರಲಿಲ್ಲ ಎಂದು ಅಭಿಪ್ರಾಯಪಡಲಾಗಿದೆ.
ಚೀನಾದ ಸುಪ್ರೀಂಕೋರ್ಟ್ಗೆ ಸಂಬಂಧಿಸಿದ ನ್ಯೂಸ್ಗಳನ್ನು ಹುಡುಕಾಡಿದಾಗಲೂ ಈ ಸಂಬಂಧ ಯಾವುದೇ ಸುಳಿವು ಸಿಕ್ಕಿಲ್ಲ. ಕೊರೊನಾ ಸಂಬಂಧ ಈಗಾಗಲೇ ಸಾಕಷ್ಟು ನಕಲಿ ಸುದ್ದಿಗಳನ್ನು ಚೀನಾದಲ್ಲಿ ಪೋಸ್ಟ್ ಮಾಡಿರುವುದನ್ನು ಪತ್ತೆ ಹಚ್ಚಲಾಗಿದೆ.
ಇನ್ನು ab-tc.com ವೆಬ್ಸೈಟ್ ಮಾಹಿತಿ ಬಗ್ಗೆ ಹುಡುಕಾಡಿದಾಗ ಇದೊಂದು ಅನುಮಾನಾಸ್ಪದ ವೆಬ್ಸೈಟ್ ಎಂದು ತಿಳಿದುಬಂದಿದೆ. ಪ್ರಾಂತ್ಯದ ಹೆಸರು ಹೊರತುಪಡಿಸಿದರೆ, ಕಚೇರಿ ವಿಳಾಸ, ನಗರದ ಹೆಸರು ಹಾಗೂ ಇಮೇಲ್ ವಿಳಾಸವನ್ನು ಎಲ್ಲಿಯೂ ಉಲ್ಲೇಖಿಸಿಲ್ಲ. ಹೀಗಾಗಿ ಇದೊಂದು ಅವಿಶ್ವಾಸಾರ್ಹ ನ್ಯೂಸ್ ವೆಬ್ಸೈಟ್ ಎಂದು ತಿಳಿದುಬಂದಿದೆ. ಈ ಮೂಲಕ ಸ್ಪಷ್ಟವಾಗುವುದೇನೆಂದರೆ ರೋಗಿಗಳನ್ನು ಸಾಯಿಸುವಂತಹ ಯಾವುದೇ ಬೆಳವಣಿಗೆ ಚೀನಾದಲ್ಲಿ ನಡೆದಿಲ್ಲ. (ಏಜೆನ್ಸೀಸ್)
