ನವದೆಹಲಿ: ಜರ್ಮನಿಯಲ್ಲಿರುವ ಬೆರಳಚ್ಚಿನ ಆಕಾರದ ಗ್ರಾಮದ ಸುಂದರ ವೈಮಾನಿಕ ಫೋಟೋ ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ಅಧಿಕವಾಗಿ ಹರಿದಾಡುತ್ತಿದೆ.
ಅರ್ಬಿಲ್ ಗ್ರಾಮ ಬೆರಳಚ್ಚಿನ ಆಕಾರದಲ್ಲಿ ಇರುವುದು ವೈಮಾನಿಕ ಚಿತ್ರದಿಂದ ಪತ್ತೆಯಾಗಿದೆ. ಗ್ರಾಮ ಸುತ್ತಲು ಹಸಿರಿನಿಂದ ಕೂಡಿದೆ ಎನ್ನುವ ಮಾಹಿತಿ ಹಾಗೂ ಛಾಯಾ ಚಿತ್ರವನ್ನು ಸಾಮಾಜಿಕ ಜಾಲತಾಣದಲ್ಲಿ ಅಧಿಕವಾಗಿ ಅಪ್ಲೋಡ್ ಮಾಡಲಾಗುತ್ತಿದೆ.
ರಿಫ್ಲೆಕ್ಷನ್ ಎಂಬ ಫೇಸ್ಬುಕ್ ಪುಟ ಈ ಚಿತ್ರವನ್ನು ಜರ್ಮನಿಯಲ್ಲಿರುವ ಬೆರಳಚ್ಚಿನ ಆಕಾರದ ಗ್ರಾಮ ಅರ್ಬಿಲ್ಎಂಬ ಶೀರ್ಷಿಕೆಯೊಂದಿಗೆ ಪೋಸ್ಟ್ ಮಾಡಿದೆ. ಇದನ್ನು ಹಲವು ಫೇಸ್ಬುಕ್ ಬಳಕೆದಾರರು ಮರು ಹಂಚಿಕೆ ಮಾಡಿದ್ದಾರೆ.
ಮೊದಲ ನೋಟಕ್ಕೆ ಇದು ವೈಮಾನಿಕ ಚಿತ್ರದಂತೆ ಕಂಡುಬಂದರೂ ಅದು ವೈಮಾನಿಕ ಚಿತ್ರ ಅಲ್ಲ. ಅಲ್ಲದೆ ಈ ಹೆಸರಿನ ಗ್ರಾಮ ಜರ್ಮನಿಯಲ್ಲಿ ಇಲ್ಲ ಎಂಬುದು ಫ್ಯಾಕ್ಟ್ಚೆಕ್ನಿಂದ ಪತ್ತೆಯಾಗಿದೆ.
ಕಲಾವಿದ ಜಾಕೋಬ್ ಐಸಿಂಗ್ ಎಂಬುವವರು ತಯಾರಿಸಿದ ಚಿತ್ರ ಎಂಬುದನ್ನು ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಮ್ (ಎಎಫ್‌ಡಬ್ಲ್ಯೂಎ) ಪತ್ತೆ ಮಾಡಿದೆ.
ಜರ್ಮನಿಯ ಮೊಡಸ್ ಎಂಬ ನಿಯತಕಾಲಿಕಕ್ಕೆ 2015ರ ಫೆಬ್ರವರಿಯಲ್ಲಿ ಕಲಾವಿದ ಜಾಕೋಬ್ ಐಸಿಂಗ್ ತಯಾರಿಸಿದ ಡಿಜಿಟಲ್ ಚಿತ್ರ ಇದು. ಮೊಡಸ್ನಲ್ಲಿ ಈ ಚಿತ್ರ ಪ್ರಕಟವಾಗಿದೆ. ಅಲ್ಲದೆ ಈ ಕಲಾಕೃತಿಯ ಹಲವು ಚಿತ್ರಗಳನ್ನು ಕಲಾವಿದ ಐಸಿಂಗ್ ಅವರು ಬೆಹನ್ಸ್ ಎಂಬ ಮಾಧ್ಯಮದಲ್ಲಿ ಪ್ರಕಟಮಾಡಿದ್ದಾರೆ. ಮೊಡಸ್ ನಿಯತಕಾಲಿಕದ ಮಾಲೀಕರು 2015ರ ಫೆಬ್ರವರಿ ಸಂಚಿಕೆಗಾಗಿ ಬೆರಳಚ್ಚು ಆಕಾರದ ನಗರ ಅಥವಾ ಹಳ್ಳಿಯ ಸುಂದರ ಚಿತ್ರ ತಯಾರಿಸಿಕೊಡುವಂತೆ ಮನವಿ ಮಾಡಿದ್ದರು. ಮನವಿಯಂತೆ ಹಲವು ಚಿತ್ರಗಳನ್ನು ಬರೆದುಕೊಟ್ಟಿದ್ದೆ. ಅದರಲ್ಲಿ ಈ ಚಿತ್ರ ಪ್ರಕಟವಾಗಿದೆ ಎಂದು ಅವರು ಬರೆದುಕೊಂಡಿದ್ದಾರೆ.
ಜರ್ಮನಿಯಲ್ಲಿ ಅರ್ಬಿಲ್ ಎಂಬ ಗ್ರಾಮ ಇದೆಯೇ ಎಂದು ಹುಡುಕಾಟ ನಡೆಸಲಾಯಿತು. ಜರ್ಮನಿಯಲ್ಲಿ ಈ ಹೆಸರಿನ ಗ್ರಾಮ ಇಲ್ಲ. ಇರಾಕ್ನ ಕುರ್ದಿಸ್ತಾನ್ನ ರಾಜಧಾನಿ ಅರ್ಬಿಲ್ ನಗರ ಇರುವುದು ಪತ್ತೆಯಾಯಿತು. ಆದರೆ ಆನಗರ ಬೆರಳಚ್ಚಿನ ಆಕಾರದಲ್ಲಿ ಇಲ್ಲ. ಹೀಗಾಗಿ ವೈರಲ್ ಆದ ಫೋಟೋ ಗ್ರಾಮದ ವೈಮಾನಿಕ ಚಿತ್ರ ಅಲ್ಲ ಎಂಬುದು ಫ್ಯಾಕ್ಟ್ ಚೆಕ್ನಿಂದ ಪತ್ತೆಯಾಗಿದೆ. (ಏಜೆನ್ಸೀಸ್)